Da Nti Utom Toro Jehovah
1 Ọfọn didie ntem ndikeme ndinyene itie udakibuot ke ini ọkpọsọn̄ oyobio esịmde fi! Edieke esịt ufọk ofiopde onyụn̄ ọnọde ifụre, ndien edieke mme andidụn̄ ẹfọnde ido, afo ayadat esịt ndidu do. Utom ukwọrọikọ Obio Ubọn̄ esida mme owo oto editịm n̄kpọ Satan aka utọ itie udakibuot oro. Nte edu uwem eke usen ke usen nnyịn ekeme ndin̄wam mbon efen ẹkụt inem oro odude ke ebiet ubọhọ emi? Ih, koro Jesus ọkọdọhọ ete ke mme owo ‘ẹyekụt nti utom nnyịn, ẹnyụn̄ ẹtoro Ete nnyịn emi odude ke heaven.’—Matt. 5:16.
2 Didie ke nnyịn ikeme ndidu uwem man mme utom nnyịn ẹdụri mbon efen ẹtiene Jehovah ye esop esie? Ebe ke ndiyak mme ikọ Jesus oro ẹdude ke Luke 6:31 ye 10:27 ẹkara uwem nnyịn ke usen kiet kiet. Emi oyonụk nnyịn ndiwụt ima ima edikere mban̄a nnọ ekemmọ owo, anamde nnyịn ikpụhọde ikpọn̄ ererimbot unana ima ye unana edikere mban̄a emi.
3 Eyenete an̄wan kiet oro okodude ke esịt ubom ama okụt nte n̄kaiferi kiet emi ndịk mmọn̄ akanamde tutu enye ikemeke ndise mban̄a ekpri eyen esie. Eyenete an̄wan oro ama an̄wam ndise mban̄a eyen emi. Ke ini n̄wan oro okobụpde nte ikpowụtde esịtekọm, eyenete an̄wan oro ama ọdọhọ ete: ‘Mbọk kpan̄ utọn̄ nọ Mme Ntiense Jehovah ke ini mmọ ẹwahade.’ N̄wan oro ama anam ntre, ndien idahaemi enye ye ebe esie ẹdi Mme Ntiense. Nti utom ẹkenam ukpụhọde oro odu ke nte mmọ ẹkenamde n̄kpọ ẹban̄a etop Obio Ubọn̄.
4 Abuana Ofụri Uwem Nnyịn: Edu uwem nnyịn ke n̄kann̄kụk, ke adan̄aemi idude ke itieutom m̀mê ke ufọkn̄wed, ye ke mme ini unọ idem nduọkodudu anam mbon efen ẹnyene se ẹkerede ẹban̄a nnyịn ye ido ukpono nnyịn. Ntem, nnyịn iyanam ọfọn ndibụp idem nnyịn ite: ‘Didie ke mme andida nse ẹkere ẹban̄a mi ye ubon mi? Nte mme mbọhọidụn̄ ẹse ufọk ye esịt okụre nnyịn nte enye oro ẹtịmde ẹnịm ọfọn ẹnyụn̄ ẹnamde asana? Nte mme nsan̄autom ye nsan̄a ufọkn̄wed nnyịn ẹse nnyịn nte mbon oro ẹkade n̄kpọ ke eti ini ẹnyụn̄ ẹnyenede ifịk? Nte mbon efen ẹyese ukamaidem nnyịn nte enye oro odotde onyụn̄ owụtde ukpono?’ Nti utom nnyịn ẹkeme ndinam utuakibuot nnọ Jehovah etịm edemede udọn̄ mbon efen.
5 Peter ama ọtọt ete ke mme Christian ẹdidi n̄kpọ nsahi. (1 Pet. 4:4) Nnyịn ikpenyene ndikụt nte ke edu uwem nnyịn inamke ẹtịn̄ ndiọi ikọ. (1 Pet. 2:12) Edieke mme utom eke usen ke usen nnyịn ẹdade ubọn̄ ẹnọ Abasi oro nnyịn ituakde ibuot inọ, do nnyịn iditie nte utuenikan̄ oro ẹwụkde ke enyọn̄, odụride mbon efen aka itie udakibuot oro ọnọde ifụre emi Jehovah ọnọde.—Matt. 5:14-16.