Nịm Nduọkodudu ke Nnennen Itie Esie
1 Ke n̄kpọsọn̄ ini emi, kpukpru nnyịn imoyom ukpụhọde edinam ke ini ke ini. Ndusụk udomo unọ idem nduọkodudu ọfọn. Nte ededi, ediwak ini oro ẹbiatde ke nduọkodudu, unọ idem inemesịt, ye ebuana n̄kaowo ẹkeme ndinam owo abiat ata esisịt ini ndinam n̄kpọ eke spirit. Ana nnyịn inịm nduọkodudu ke nnennen itie esie. (Matt. 5:3) Didie ke emi ekeme nditịbe? Ebe ke nditiene item oro ẹkụtde ke Ephesus 5:15-17.
2 Nịm Mme Adan̄a: Paul ekewet ete ke mme Christian ẹkpenyene ‘nditịn̄ enyịn n̄kpeme’ ndidu uwem nte mbon eti ibuot. Ẹyom ufat ye mfara ke idem man ẹnịm adan̄a ke ini nduọkodudu ke se ẹnen̄erede ẹyom. Ọfọn ndinen̄ede n̄kere mban̄a usụn̄ oro nnyịn idade ini idem nnyịn inam n̄kpọ. Akpana unọ idem nduọkodudu enyene ndusụk uduak oro ẹnyenede ufọn utu ke ndinam nnyịn ikere ite ke imabiat ini nnyịn m̀mê ndinam nnyịn ikop mmemidem. Edieke esịt obiomde nnyịn ikpe ke ndusụk udomo ke ima ikabuana ke ndusụk edinam, emi oyowụt ete ke oyom inam mme ukpụhọde ke nte nnyịn idade ini inam n̄kpọ.
3 Nyene Eti Ibuot: Paul ama ọnọ item aban̄a ‘ndidedep ifet’ nnọ mme ata akpan n̄kpọ ke uwem, ikûdi “mme ọkọi.” Mme Christian oro ẹma ẹkeyak idem ẹnọ ikemeke ndiyak uwem mmọ owụhọ ke nduọkodudu. Okposụkedi nduọkodudu ye mbre ẹkemede ndinam nnyịn ifiak ikop odudu ke n̄kan̄ eke ikpọkidem, se inọde odudu eke spirit edi anamutom odudu Abasi. (Isa. 40:29-31) Nnyịn ibọ spirit esie ke ebuana ye mme utom ukara Abasi—edikpep Bible, edidụk mme mbono esop, edibuana ke utom an̄wautom—idịghe ke unọ idem nduọkodudu.
4 Nịm Mme Ebeiso N̄kpọ: Paul ama eteme mme Christian ete “ẹtịm ẹfiọk se Ọbọn̄ amade.” Jesus ekekpep ete ke mme edinam nnyịn ẹkpenyene ndiwụhọ ke Obio Ubọn̄ Abasi nte ebeiso n̄kpọ nnyịn ke uwem. (Matt. 6:33) Ẹyom ẹte nnyịn ibem iso inam mme n̄kpọ oro ẹdiyakde nnyịn idu uwem ekekem ye uyakidem nnyịn nnọ Jehovah. Ke oro ebede, ẹkeme ndinịm nduọkodudu ke nnennen itie esie. Ke ini ẹnamde emi, enye eyenyene eti utịp, ndien nnyịn iyenen̄ede ikop inem esie.—Eccl. 5:12.