Ẹn̄wam Nditọ Mbufo Ndidiomi Nnyụn̄ Nda Mme Ini Nduọkodudu Nnam N̄kpọ ke Eti Ibuot
1 Nte idịghe akpanikọ nte ke nnyịn isiwak ndisịm mme utịtmbuba nnyịn oro ẹdotde ke ini nnyịn inamde ndutịm ke nte idade ini oro inyenede inam n̄kpọ ke mfọnn̄kan usụn̄? Mme ini nduọkodudu ẹnọ ediwak n̄kpri owo nnyịn ke ufọkn̄wed eti ifet nditre mme edinam ofụri ini mmọ ke ufọkn̄wed. Nte ededi, ekeme n̄ko ndinam nditọwọn̄ ẹnana ukpeme ke ini emi ndien ke ntem anamde mmọ ẹda ini mmọ ẹnam n̄kpọ ke idiọk usụn̄. (N̄ke 29:15) Nte utịp, ediwak uyen ẹkeme ndibiat ini nduọkodudu mmọ ndise ekebe ndise m̀mê nsio nsio vidio m̀mê ndibuana ke mme edinam eken oro ẹdiade ini m̀mê oro mîfọnke. Edi emi ikpenyeneke ndidi ntre.
2 Mme ete ye eka, mme ini nduọkodudu ẹnọ mbufo eti ifet ndinam ndutịm nnọ mme edinam oro ẹdotde nte ubon. Ediwak ete ye eka ẹmekụt nte enyenede ufọn ndinam ndutịm man ini nduọkodudu mmọ eke isua ke isua odụk ye ndusụk ke otu mme ini nduọkodudu nditọ mmọ man ubon ekeme ndidu ke nduọkodudu nnyụn̄ n̄ka isan̄ ọtọkiet nte usụn̄ edikpụhọ mme edinam ofụri ini eke usen ke usen. Enye ekeme n̄ko ndinọ ubon ifet edinyene ebuana ke ndinam mme udọn̄ ukara Abasi ẹka iso. (N̄ke 21:5) Didie ke oro ekeme nditịbe?
3 Ntak mûnamke ndutịm nte ubon ndinam n̄kọri ke utom an̄wautom mbufo ke mme ini nduọkodudu? Mme ini nduọkodudu ufọkn̄wed ẹnọ n̄kparawa owo ifet ndinam usiakusụn̄ unọ un̄wam. Edieke mme ete ye eka ẹnamde nti ndutịm, mmọ ẹkeme n̄ko ndinam utom usiakusụn̄ ye nditọ mmọ. Ke August emi, nte nnyịn ikụrede isua utom emi, kpukpru owo ẹkpenyene ndisịn ọkpọsọn̄ ukeme ndibuana ọyọhọ ọyọhọ nte ẹkekeme ke utom ukwọrọikọ. Edieke ẹnamde ndutịm ndinyene ntatara ebuana ke utom ukwọrọikọ nte ubon, do kpukpru owo ẹkeme ndinam n̄kpọ man enye okụt unen.—N̄ke 15:22.
4 Nte mbufo ẹmekeme ndinam ndutịm ndin̄wam n̄kpet n̄kpet esop emi oyomde un̄wam ndikụre efakutom esie? Mbufo ẹmekeme ndinam ndutịm nte ubon ndikwọrọ ikọ ke kiet ke otu efakutom oro owo mîsiwakke ndinam utom m̀mê efakutom oro mîbahakede inọ owo.—Matt. 24:14.
5 Ke n̄kan̄ eken, edieke mbufo ẹdikade nduọkodudu ye ubon mbufo ke itie en̄wen, ẹnam ndutịm ndidụk mme mbono esop ye ndibuana ke an̄wautom ye esop n̄kann̄kụk oro. Edieke ẹkade ndise mme iman oro mîdịghe Mme Ntiense, ẹbem iso ẹnam ndutịm ke mme usụn̄ oro mbufo ẹkemede ndibuana akpanikọ ye mmọ.—Se Enyọn̄-Ukpeme eke February 15, 1990, page 25-27.
6 Mme ndutịm ewe ke mbufo ẹnam ẹnọ ini nduọkodudu efen? Nte eyịghe mîdụhe mbufo ẹyom ubon mbufo ẹkop nsọn̄idem ke n̄kan̄ eke ikpọkidem. Edi ẹkûfụmi mme ata akpan ifet oro ẹdude ndidemede ubon mbufo ke n̄kan̄ eke spirit ebe ke ndika iso nnịm mme ufọn n̄kpọ Obio Ubọn̄ akpa ke uwem mbufo.—Matt. 6:33; Eph. 5:15, 16.