Nte Afo ke Anam Se Ekekpepde ke Mbono District “Mme Andikpep Ikọ Abasi”?
1 Owo ekededi oro okodụkde mbono district emi osụk okụrede mi ekeme ndikụt nte ke uduak ikọt Jehovah edi ndinam utom mmọ mma nte mme andikpep Ikọ Abasi. (Matt. 28:19, 20) Nte afo ọkọnyọn̄de ufọk, mme akpan item ewe ke afo ekebiere ndida nsịn ke edinam ke uwem fo ye ke an̄wautom?
2 Mme N̄wed, Eke Ẹdade Odudu Spirit Abasi Ẹwet, Ẹdi Se Ifọnde Ndida N̄kpep Owo N̄kpọ: Ibuotikọ akpa usen ama atat 2 Timothy 3:16. Utịn̄ikọ ibuotikọ mbono ama owụt ete ke man ikeme “Ndiben̄e Idem ke Kpukpru Nde nte Mme Andikpep Ikọ Abasi,” ana nnyịn inen̄ede ida Ikọ Abasi ke ọsọn̄urua n̄kpọ, ikpono enye ikan ekikere m̀mê ukpepn̄kpọ owo ekededi, inyụn̄ ida enye isịn ke edinam kpukpru ini. Ana nnyịn n̄ko ibọn̄ akam ke usen ke usen iben̄e edisana spirit man an̄wam nnyịn ke utom ukwọrọikọ nnyịn inyụn̄ inam n̄kpọ ndikọri n̄wọrọnda mbun̄wụm esie—ima. Ndien ana nnyịn iyak esop Jehovah eke isọn̄ ọnọ nnyịn ukpep nte mme asan̄autom ebe ke kpukpru mbono esop.
3 Nneme Friday, “Ndikpep Idem Nnyịn ke Adan̄aemi Ikpepde Mbon Efen,” ama anam an̄wan̄a nte ke nnyịn inyene ndinịm nti uwụtn̄kpọ ke (1) ndisọn̄ọ nyịre ke mbet Abasi ke kpukpru ikpehe eti ido uwem Christian, (2) ndika iso nnyene ifịk ifịk edu ukpepn̄kpọ, ye (3) ndiduọn̄ọ mme edu ye mme idaha esịt ye ekikere emi Devil ekemede ndida nnam n̄kpọ ke idiọk usụn̄. Ekem, nnyịn ima ikpep nti usụn̄ ndikpeme ubon nnyịn nsio ke akama-n̄kpa ndise idan̄ eke ererimbot. Ẹma ẹsịn udọn̄ ẹnọ mme ete ye eka ndinịm nti uwụtn̄kpọ ke ndifep ọkpọkọm sụk editop enyịn nse ikpehe edinam idan̄ ke ekpri ini ndinyụn̄ n̄kpeme nte nditọ mmọ ẹdade Intanet ẹnam n̄kpọ ye nte ẹsede ekebe ndise. Mme akpan n̄kpọ ewe ke ndutịm Friday ke afo ọtọn̄ọ ndida nsịn ke edinam?
4 Akpatre utịn̄ikọ usen oro ama ọsọn̄ọ ubiere nnyịn ndima un̄wana Jehovah, ndisịk n̄kpere otu anam-akpanikọ ikọt Abasi oro ẹyetde aran, ndinyụn̄ ntịp nsịn ke emem ikọt Jehovah. Nte afo omokot obufa n̄wed oro, Ntịn̄nnịm Ikọ Isaiah—Un̄wana Ofụri Ubonowo II?
5 Ndikeme Ndikpep Mbon En̄wen: Itien̄wed emi ọkọbọpde ibuotikọ ọyọhọ usen iba ekedi 2 Timothy 2:2. Nte afo akakpan̄de utọn̄ ọnọ nneme usenubọk Saturday, ndi afo ama etịn̄ enyịn ke mme ekikere ke nte (1) ẹkpeyomde mbon oro ẹdotde, (2) ẹkpekọride udọn̄ mmọ, ye (3) nte ẹkpekpepde mmọ ẹnam kpukpru se Christ eketemede? Nte afo ke anam se afo ekekpepde—ndiwụt mme enyeneufọk ke nsụhọde n̄kaha akpan n̄kpọ kiet ke N̄wed Abasi ye ndinịm itiat idakisọn̄ nnọ mfiakn̄ka ini iso?
6 Edinam uwemeyo ama ọsọn̄ọ etịn̄ nte edide akpan n̄kpọ ndikpebe Akwa Andikpep, kpa Jesus. Ke mme usụn̄ ewe ke afo odomo ndinen̄ede n̄kpebe enye? Ke se afo ekekpepde oto udiana nneme usen oro, ekere ke didie ke afo ekeme ‘Ndibọ Ufọn Ọyọhọ Ọyọhọ nto Ukpepn̄kpọ Ukara Abasi’? Mme ekikere ewe ke afo ada anam n̄kpọ man ọnọ n̄kpan̄utọn̄ oro ọniọn̄de ke ukpepn̄kpọ idemowo ye ke mme mbono esop?
7 Nte eyịghe mîdụhe, n̄wed oro, Bọ Ufọn to Ukpepn̄kpọ Ufọkn̄wed Utom Ukara Abasi oro ẹdisiode ayan̄wam nnyịn ndifori ukeme nnyịn nte mme etịn̄ikọ ye nte mme andikpep Ikọ Abasi. Ẹyenọ akpan ntịn̄enyịn ke mme edu utịn̄ikọ oro akanamde ẹdiọn̄ọ mme anam-akpanikọ asan̄autom Abasi ke mme ini Bible. Ukpepn̄kpọ kiet kiet ke obufa n̄wed ukpepn̄kpọ emi enyene ekebe oro owụtde ibio ibio se oyomde nnyịn inam, ntak emi enye edide akpan n̄kpọ, ye nte ẹkpenamde enye. Ẹdọn̄ mme utom oro ẹwụtde nte ẹnamde-nam. Nditọete iban ẹyenyene usụn̄ 29 oro ẹwụtde nte ẹtịmde ndimek kiet ke ini ẹnọde utịn̄ikọ mmọ. Nte ini akade, ẹyenam mme ukpụhọde oro ẹketọtde ke ndutịm ufọkn̄wed emi. Nte afo emenyene eti ndutịm ukpepn̄kpọ ye ntịmidem ofụri ini man ọbọ ọyọhọ ufọn oto Ufọkn̄wed Utom Ukara Abasi ke urua kiet kiet?
8 Ẹdi Mme Andikpep Adan̄aemi: Mme Hebrew 5:12 ama etịm mme owo ekikere eben̄e ndutịm Sunday. Nneme usenubọk oro, “Ntịn̄nnịm Ikọ Malachi Etịm Nnyịn Idem ọnọ Usen Jehovah,” ama esịn udọn̄ ọnọ nnyịn ndinọ Abasi se ifọnde ikan nnyụn̄ nsua kpukpru orụk abian̄a man nnyịn ikeme ndibọhọ akwa ye enyene-ndịk usen Jehovah. Drama oro, “Kpono Odudu Ukara Jehovah,” ama enen̄ede owụt nte Korah ye mme nsan̄a esie eke eset ndiwụt ntan̄idem, udọn̄ ikpọ n̄kpọ, ufụp, ye nsọn̄ọnda ke usụn̄ oro mîdotke akadade ekesịm ata ata edisọn̄ ibuot ye Jehovah ke idemesie. Utịn̄ikọ oro eketienede okowụk ntịn̄enyịn ke nte oyomde ẹsụk ibuot ẹnọ odudu ukara Abasi ke ubon ye ke esop ke eyomfịn. Utịn̄ikọ an̄wa oro, “Mmanie Ẹkpep Kpukpru Mme Idụt Akpanikọ?,” ama ọnọ uyarade nte ke Mme Ntiense Jehovah ke ẹnam ntre, ke edide isio ye Christendom, oro n̄kukụre ọdọhọde-dọhọ nte ikpepde akpanikọ Bible.
9 Nte an̄wan̄ade, Jehovah ke ọnọ nnyịn ukpep ndidi nti mme andikpep Ikọ esie. Ẹyak nnyịn ida se nnyịn ikpepde isịn ke edinam, ‘itịm ikpeme idem nnyịn ye se nnyịn ikpepde owo, man nnyịn ikeme ndinyan̄a idem nnyịn ye mmọ emi ẹkopde uyo nnyịn.’—1 Tim. 4:16.