‘Ẹfọn Ido ye Kpukpru Owo’
1 “Kwọrọ Ikọ Abasi Ọyọhọ Ọyọhọ” ye “Ẹnam Nti Utom Uwak Uwak” ẹkedi mme ibuotikọ oro ẹkedude ke mme esịne-esịt Utom Obio Ubọn̄ Nnyịn eke February ye March 2002. (Col. 1:25; 1 Tim. 6:18) Ke mme nsiondi oro, ẹma ẹsịn udọn̄ ẹnọ nnyịn ndisịn ukeme efen efen man in̄wam mbon oro ẹnyenede udọn̄ ẹdụk Editi, man in̄wam mbon oro mînamke utom aba ndifiak nsịn idem ke mme edinam esop, ndinyụn̄ n̄n̄wam nditọ nnyịn ye nditọ ukpepn̄kpọ Bible oro ẹdotde nditọn̄ọ ndisuan eti mbụk. Nte eyịghe mîdụhe, nti ukeme oro nnyịn isịnde ẹkụt unen ke ndusụk usụn̄. Idahaemi, “adan̄a nte ikụtde ifet, ẹyak nnyịn [ika iso] ifọn ido ye kpukpru owo.”—Gal. 6:10.
2 Kot Mmọ Ẹfiak Ẹdidụk: Ke Nigeria, se ibede owo 250,000 oro mîdịghe mme asuanetop eti mbụk ẹsidụk Editi ke isua kiet kiet. Sia mmọ ndidụk owụtde ke mmọ ẹnyene udọn̄, nso ke ana nnyịn inam man idemede udọn̄ mbon oro ‘ẹkenịmde ẹnọ nsinsi uwem ndibuọt idem’? (Utom 13:48) Ẹsịn udọn̄ ẹnọ mmọ ndifiak ndi mme mbono esop usọp usọp nte ẹkekeme.
3 Ntak mûdọhọke owo emi enyenede udọn̄ edidụk Ukpepn̄kpọ N̄wed Esop man okop inem inem nneme ntịn̄nnịm ikọ Isaiah? Edieke afo edide iman m̀mê ọdiọn̄ọ owo emi ndien ẹnọ fi n̄kpọ ndinam ke Ufọkn̄wed Utom Ukara Abasi oro edide, afo emekeme ndikot owo oro edi edikop utịn̄ikọ fo. Sian enye mme ibuotikọ utịn̄ikọ an̄wa oro ẹdinọde ke mme urua oro ẹdide. (Ẹkpenyene ndidian ndutịm utịn̄ikọ an̄wa eke idahaemi ke obukpọk ntọt.) Yom ifet ekededi ndidemede udọn̄ owo oro nnọ utuakibuot Jehovah. Ndien, edieke mîdụhe owo ke esop emi ekpepde Bible ye enye, afo emekeme ndiwụt mfọnido ke nditọn̄ọ ukpepn̄kpọ ye enye.
4 Ẹka Iso Ndisịn Udọn̄ nnọ Owo Oro Mînamke Utom Aba: Ediwak ke otu mbon oro ẹdụkde Editi ẹma ẹyeyak idem mmọ ẹnọ Jehovah. Nte ededi, ke ndusụk idaha mmọ ẹma ẹtre ndikwọrọ eti mbụk ifịk ifịk. Ndien, Paul eteme nnyịn ete “ifọn ido . . . akpan-akpan ye mmọ emi ẹtode ke ufọk mme andinịm ke akpanikọ.” (Gal. 6:10) Ntem, nnyịn ikpenyene ndiwụt akpan udọn̄ ke idem mbon oro mînamke utom aba.
5 Ekeme ndidi ndusụk mmọ ẹma ẹtọtọn̄ọ ndinam n̄kpọ mban̄a nsịnudọn̄ oro mbiowo ye mbon eken ẹnọde mmọ ndifiak mbuana ke utom ukwọrọikọ. Edieke mbiowo ẹdọhọde fi anam utom ye asuanetop oro ẹfiakde ẹdemede udọn̄, fiọk ete ke ima oro afo enyenede ọnọ Jehovah ye an̄wautom edinam mbuọtidem owo emi ọsọn̄ idem. Wụt enye nte afo esibuanade ke nsio nsio ikpehe an̄wautom man enye okụt idatesịt emi odude, aka iso ke utom ukwọrọikọ, onyụn̄ ekeme ndinyene mme edidiọn̄ Jehovah.
6 Nọ Mbufa Asuanetop Eti Ntọn̄ọ: Ke ini n̄wan emi ekenyenede udọn̄ obufa ọkọfiọkde ke imọ imokụt ata esop Abasi, enye ama oyom nditọn̄ọ utom ukwọrọikọ iwiwa. Ke ama ọkọfiọk se ẹyomde ẹto enye, enye ama ọdọhọ ete: “Ẹyak itọn̄ọ enye usọp usọp.” Edieke ẹtorode owo emi afo ekpepde Bible idahaemi nditọn̄ọ nditiene mbuana ke utom an̄wautom, n̄wam enye okụt ke oyom imọ “itọn̄ọ enye usọp usọp,” ke ntem anamde obufa asuanetop emi enyene eti ntọn̄ọ. Yak enye enyene edu editịm idem nnọ nnyụn̄ mbuana kpukpru ini ke an̄wautom ke urua kiet kiet.
7 Edieke edide eyen fo akabade edi obufa asuanetop oro mînaha baptism, nam utom ye enye man enye anam n̄kọri nte ekemde ye isua emana ye ukeme esie. Ye esisịt un̄wam oro afo ọnọde, ekeme ndikpa fi idem ndikụt unen oro enye edinyenede ke ndineme nneme ye owo, ndikot Bible, ndinyụn̄ nnọ n̄wed. Edieke enye okụtde owo emi enyenede udọn̄ ke an̄wautom, kpep enye nte ekemede ndinam mfiakn̄ka nnyụn̄ nnam n̄kpọ mban̄a udọn̄ oro ẹwụtde.
8 Tat Utom Ukwọrọikọ Fo: Nte mme idaha fo ẹyak fi ofori ebuana fo ke utom ukwọrọikọ idem ke ini Editi ebede? Nte afo emekeme ndidian hour kiet m̀mê iba ke urua kiet kiet ke se afo esibiatde ke utom ukwọrọikọ? Nte afo emese n̄wed usenọfiọn̄ man ọfiọk ini emi afo ekemede ndifiak nnam usiakusụn̄ unọ un̄wam? Mîdịghe nte afo emekeme ndinam ndutịm ke uwem fo man odụk utom uyọhọ ini? Kpukpru ukeme oro nnyịn isịnde ke utom ukwọrọikọ ẹkeme ndin̄wam owo ndinyịme akpanikọ! (Utom 8:26-39) Nte nnyịn isakde iso ise ini iso, yak kpukpru nnyịn ‘ibịne se ifọnde, owo anam ntre ye kiet eken onyụn̄ anam ntre ye kpukpru owo.’—1 Thess. 5:15.
[Ekebe ke page 3]
Ka Iso Ndin̄wam:
□✔ Mme andidụk Editi
□✔ Mme asuanetop oro ẹfiakde ẹdemede udọn̄
□✔ Mbufa asuanetop oro mînaha baptism