Mme Ubon Oro Ẹsọn̄de Idem ke N̄kan̄ eke Spirit—Didie?
1 Ẹtoro mme ubon Christian ke ‘ndinam se idotde ye mbon ufọk mmọ.’ (1 Tim. 5:4) Nte ededi, ye ata ediwak ndiọi odudu oro ẹkande nnyịn ẹkụk emi ẹkemede ndinam mbuọtidem nnyịn emem, edi akpan n̄kpọ nte mme ubon ẹnam utom ọkpọsọn̄ man ẹka iso ẹsọn̄ idem ke n̄kan̄ eke spirit. Didie ke ẹkeme ndinam emi?
2 Kama Itieibuot nte Christ: Oyom mme ibuot ufọk ẹkpebe Jesus Christ ke usụn̄ oro mmọ ẹbiomde mbiomo edisọn̄ọ mbonufọk mmọ idem. Ke adianade ye ima oro enye okowụtde ini kiet ọnọ nnyịn ebe ke n̄kpa uwa esie, Jesus ke aka iso ‘ndibọk nnyụn̄ n̄kpeme’ esop. (Eph. 5:25-29) Mme ima ima ete ye eka ẹsitiene uwụtn̄kpọ ima ima ukpeme emi ebe ke ndise mban̄a mme udọn̄ n̄kpọ eke spirit eke ubon ke usen ke usen. Emi esịne ndinịm ukpepn̄kpọ Bible ubon ke urua kiet kiet, ndinyene nti nneme eke spirit ke ini ekededi oro ẹkemede, ye ndise mban̄a mme mfịna nte mmọ ẹdemerede.—Deut. 6:6, 7.
3 Ke An̄wautom: Kpukpru mme andibuana ke ubon ẹkpenyene ndifiọk nte ke ndinọ mbon efen ikọ ntiense mban̄a Jehovah ye mme uduak esie edi akpan ubak utuakibuot mmimọ. (Isa. 43:10-12) Edieke mbufo mme ete ye eka ẹyomde nditọ mbufo ẹdi mme anam-akpanikọ Ntiense Jehovah, mbufo ẹkpenyene ndibabak ntịm esịt mmọ nnọ utom ukwọrọikọ. Ẹtịn̄ mme ntak oro utom emi oyomde n̄waidem ye ufọn ndibuana ke enye ke urua kiet kiet. (Matt. 22:37-39) Ekem ẹnam ndutịm man mmọ ẹbuana ye mbufo kpukpru ini ke an̄wautom.
4 Ẹkọri esịtekọm oro ẹnyenede ẹnọ utom ukwọrọikọ ebe ke ndisio ini nnịm ke ndutịm ukpepn̄kpọ ubon eke urua ke urua man ẹtịm idem ẹnyụn̄ ẹdomo nneme oro enyenede uforo ẹse. Ẹnọ nditọ mbufo san̄asan̄a ukpep ke an̄wautom, ẹn̄wamde mmọ ndinam n̄kọri nte ekemde ye isua emana ye ukeme mmọ. Ke ẹma ẹkebiat ini ọtọkiet ke utom ukwọrọikọ, ẹtịn̄ ẹban̄a nte mmọ ẹkụtde eti ido Jehovah nnennen nnennen. Ẹbụk mme ifiọkutom oro ẹsọn̄ọde mbuọtidem. Adan̄a nte mme ubon ‘ẹtabide ẹfiọk ẹte ke Ọbọn̄ ọfọn ido,’ ntre ke mmọ ẹdinen̄ede ẹkpere Jehovah, ọsọn̄ọde mmọ idem ndibiọn̄ọ “kpukpru idiọkn̄kpọ” (NW).—1 Pet. 2:1-3.
5 Ke Mme Mbono Esop: Ọfọn didie ntem ke ini mme andibuana ke ubon ẹn̄wamde kiet eken ndidụk kpukpru mbono esop, akpan akpan edieke kiet ke otu mmọ okopde mmemidem, ananade udọn̄, m̀mê okopde editịmede esịt! Ekpri eyenete an̄wan kiet ọkọdọhọ ete, “Ke ini ete mi esinyọn̄de utom edi, enye esikop mmemidem. Edi mmesibuana nti n̄kpọ oro ẹdinemede ke mbono esop ke mbubịteyo oro ye enye, ndien emi esisịn udọn̄ ọnọ enye ndika. Ndien ke ini idem ememde mi enye esisịn udọn̄ ọnọ mi ndika.”—Heb. 10:24, 25.
6 Ndinam Mme N̄kpọ Ọtọkiet: Mme ubon ẹkpenyene ndinam mme n̄kpọ ọtọkiet, utọ nte edin̄wam ke mme utom esịtufọk. Ẹkpenyene n̄ko ndisio ini nnịm nnọ inem inem unọ idem nduọkodudu. Uwọrọ an̄wa, edinam isan̄ mbọ ofụm, edibre mbre, ye edika n̄kese mme iman m̀mê mme ufan ekeme ndiberede ifet nnọ ini inemesịt nnyụn̄ nnọ inem inem n̄kpọ editi.—Eccl. 3:4.
7 Mme ubon Christian oro ẹsọn̄de idem ẹsikan mme n̄kpọ oro ẹkemede ndibiọn̄ọ idaha eke spirit mmọ ke usen ke usen. Ebede ke nditịm nsan̄a n̄kpere Jehovah, mmọ ẹsibọ odudu oro enye ọnọde.—Eph. 6:10.