Ndutịm Oro Ẹnamde man Ẹn̄wam Mme Ubon
1. Didie ke mme ubon ke Israel ẹkesibọ ufọn ẹto Sabbath oro ẹkesinịmde kpukpru urua?
1 Edinịm Sabbath ekedi ima ima ndutịm oro Jehovah akanamde, emi mme ubon ẹkesibọde ufọn ẹto. Nditọ Israel ikesinamke utom usen oro, mmọ ẹma ẹnyụn̄ ẹnyene ini nditie n̄kere mban̄a mfọnido Jehovah ye itie ebuana mmọ ye enye. Mme ete ye eka ẹma ẹkeme ndida ifet emi ndọdiọn̄ n̄kpep nditọ mmọ Ibet man esịm esịt mmọ. (Deut. 6:6, 7) Sabbath ama anam ikọt Jehovah ẹnyene ini kpukpru urua ndikere mban̄a itie ebuana mmọ ye Abasi.
2. Nso ke Sabbath ekpep nnyịn aban̄a Jehovah?
2 Nte ededi, Jehovah iyomke mme ubon ẹnịm Sabbath aba. Edi ibet oro ekpep nnyịn n̄kpọ aban̄a Abasi nnyịn. Oro edi, ke enye esinen̄ede enyene udọn̄ ke mfọnọn̄kpọ eke spirit ikọt esie. (Isa. 48:17, 18) Mfịn, ndutịm mbubreyo Utuakibuot Ubon edi usụn̄ kiet oro Jehovah adade owụt ima ima edikere mban̄a emi.
3. Nso idi uduak mbubreyo Utuakibuot Ubon?
3 Nso Idi Uduak Mbubreyo Utuakibuot Ubon? Ke January 2009, ẹma ẹtọn̄ọ ndinịm Ukpepn̄kpọ N̄wed Esop n̄ko ke mbubreyo oro ẹsinịmde Ufọkn̄wed Utom Ukara Abasi ye Esoputom. Ntak kiet oro ẹkenamde ukpụhọde emi ekedi man mme ubon ẹnyene ifet ndisọn̄ọ itie ebuana mmọ ye Jehovah ke ndisio mbubreyo kiet nnịm kpukpru urua nnọ utuakibuot ubon. Ẹma ẹsịn udọn̄ ẹnọ ubon kiet kiet ndinịm ukpepn̄kpọ ubon mmọ ke mbubreyo oro ẹkesinịmde Ukpepn̄kpọ N̄wed Esop, edieke oro edifọnde ye mmọ, ẹnyụn̄ ẹda ini oro ẹneme nneme Ikọ Abasi ẹnyụn̄ ẹnịm ukpepn̄kpọ Bible oro mîtiehe itọk itọk edi oro ẹtịmde ekekem ye udọn̄ ubon.
4. Ndi akpana ubon ẹnam nneme mmọ edi hour kiet kpọt? Nam an̄wan̄a.
4 Man idụk Ukpepn̄kpọ N̄wed Esop, ama esiyom ida ini itịm idem, ika ebiet oro ẹkenịmde, ye ntre ntre eken. Ediwak nnyịn ima isibiat se ikande hour kiet man idụk mbono esop oro ẹkesinịmde hour kiet mi. Ke emi ẹma ẹkenam ukpụhọde ke ndutịm mbono esop nnyịn, imenyene mbubreyo emi ndida ntuak ibuot nnọ Jehovah nte ubon. Ke ntre, iyomke inam mbubreyo Utuakibuot Ubon nnyịn edi hour kiet kpọt. Utu ke oro, ikpenyene ndikere mban̄a udọn̄ ye idaha ubon nnyịn inyụn̄ inịm ini oro edikemde ndida nse mban̄a emi.
5. Ndi akpana ẹda ofụri ini ẹtie ọtọkiet ẹneme n̄kpọ? Nam an̄wan̄a.
5 Ndi Akpana Ẹda Ofụri Ini Ẹtie Ọtọkiet Ẹneme N̄kpọ? Ke ini mme ọdọ ndọ ye mme ubon oro ẹnyenede nditọ ẹsinemede nneme Ikọ Abasi ọtọkiet, mmọ ẹsisịn udọn̄ ẹnọ kiet eken. (Rome 1:12) Ubon ẹsinen̄ede ẹdiana kiet. Ke ntre, nneme Ikọ Abasi ekpenyene ndidi akpan ikpehe ke mbubreyo Utuakibuot Ubon. Edi, owo kiet kiet ke ubon ekeme ndinam ọkpọkpọ ukpepn̄kpọ esie. Ke uwụtn̄kpọ, ke ẹma ẹkeneme n̄kpọ ọtọkiet ẹkụre, mbonubon ẹkeme ndisụk ndu ọtọkiet ke adan̄aemi owo kiet kiet akade iso ke ọkpọkpọ ukpepn̄kpọ esie, edide ndikụre nditịm idem nnọ mbono esop m̀mê ndikot mme magazine. Ndusụk ubon ẹsimek nditre ndikpọhọde ekebe ndise ofụri mbubreyo oro.
6. Nneme oro ekpetie didie?
6 Nneme Oro Ekpetie Didie? Iyomke ẹnam enye nte nneme mbụme ye ibọrọ kpukpru ini. Man ẹnam mbubreyo Utuakibuot Ubon etie ufiop ufiop onyụn̄ enem, ediwak ubon ẹnyene ndutịm oro edide ukem ye eke mbono esop ufọturua oro isinịmde. Mmọ ẹsibahade nneme mmọ ẹsịn ke nsio nsio ikpehe ẹnyụn̄ ẹse ẹban̄a mmọ ke nsio nsio usụn̄. Ke uwụtn̄kpọ, mmọ ẹkeme ndikot Bible ọtọkiet, ẹtịm idem ẹnọ ikpehe mbono esop kiet, ẹnyụn̄ ẹnam se ikemede nditịbe ke an̄wautom ẹwụt. Ẹnọ ndusụk ekikere ke page 6.
7. Mme ete ye eka ẹkpedomo ndinam ini ukpepn̄kpọ etie didie?
7 Mme Ete ye Eka Ẹkpedomo Ndinam Ukpepn̄kpọ Etie Didie? Ubon fo ẹyenen̄ede ẹkpep n̄kpọ edieke ẹnamde ini ukpepn̄kpọ etie ima ima ye ifụre ifụre. Ẹmekeme ndikpep n̄kpọ ndusụk ini ke an̄wa edieke mîbịtke ikaha, mînyụn̄ ifiopke ikaha. Ẹduọk odudu ke ini oyomde ẹnam ntre. Ndusụk ubon ẹsidia mfefere udia mîdịghe ẹn̄wọn̄ ekpri n̄kpọ ke ẹma ẹkekụre. Mme ete ye eka ẹyefep ndida ini mbubreyo Utuakibuot Ubon nsua nnọ nditọ m̀mê nditụnọ mmọ, edi mmọ ẹkeme ndida ndusụk ini ntịn̄ n̄kpọ mban̄a esen edu m̀mê mfịna oro mmọ ẹkụtde. Nte ededi, ọkpọfọn ndisio ini efen nnịm ke urua man ẹneme ọkpọkpọ mfịna oro eyen enyenede ye enye ikpọn̄, mbak ẹfep ndisuene enye ke iso nditọeka esie. Mbubreyo Utuakibuot Ubon ikpetiehe nte ufọk udomo, owo isakke ukpọk imam, edi akpana etie inem inem koro nnyịn ituak ibuot inọ Abasi inemesịt.—1 Tim. 1:11.
8, 9. Nso ntịmidem ke oyom mme ibuot ufọk ẹnam?
8 Didie ke Mme Ibuot Ufọk Ẹkpetịm Idem? Ubon ẹyenen̄ede ẹbọ ufọn edieke ibuot ufọk ebemde iso etịm idem ọnọ mbubreyo Utuakibuot Ubon ke ndibiere se ẹdinemede ye mfọnn̄kan usụn̄ oro ẹdinemede enye. (N̄ke 21:5) Ọyọfọn ebe eneme n̄kpọ emi ye n̄wan esie. (N̄ke 15:22) Ọkpọfọn mbufo mme ibuot ufọk ẹsidọhọ nditọ mbufo ke ini ke ini ẹte ẹtiene ẹnọ ekikere mmọ. Edieke ẹnamde emi, mbufo ẹyenen̄ede ẹfiọk se mmọ ẹmade ye se idide mfịna mmọ.
9 Idịghe kpukpru ini ke ibuot ufọk edida anyan ini itịm idem. Etie nte ubon ẹyenyene mme akpan n̄kpọ oro mmọ ẹdinamde kpukpru urua, ndien idiyomke ibuot ufọk anam obufa ndutịm kpukpru ini. Ọkpọfọn enye etịm idem ọnọ utuakibuot ubon efen ke ẹkụrede utuakibuot ubon kiet kiet, ke adan̄aemi enye osụk etide se ubon esie ẹyomde ke n̄kan̄ eke spirit. Ndusụk ibuot ufọk ẹsiwet se ẹdinemede ibio ibio ẹdian ke ebiet oro ubon ẹkemede ndikụt, utọ nte ke ekebe ntụhube. Emi esinam idem aduai mbonubon, mmọ ẹsinyụn̄ ẹtetie ẹbet ukpepn̄kpọ oro, ndien emi esinọ mmọ ini nditịm idem edieke oyomde.
10. Didie ke mbon oro ẹdụn̄de ikpọn̄ ekeme ndida mbubreyo Utuakibuot Ubon nnam n̄kpọ?
10 Ndinam Didie Edieke Ndụn̄de Ikpọn̄? Mbon oro ẹdụn̄de ikpọn̄ ẹkeme ndida mbubreyo Utuakibuot Ubon nnam ọkpọkpọ ukpepn̄kpọ. Eti ndutịm ọkpọkpọ ukpepn̄kpọ ekpenyene ndisịne edikot Bible, editịm idem nnọ mme mbono esop, ye edikot Enyọn̄-Ukpeme ye Awake! Ndusụk mme asuanetop ẹsinyene ọkpọkpọ ndutịm ukpepn̄kpọ efen ọkọrọ ye emi. Ke ndusụk idaha, mmọ ẹkeme ndikot asuanetop efen m̀mê ubon efen ẹdidiana ye mmọ man ẹnyene nneme Ikọ Abasi oro ọbọpde-bọp.
11, 12. Nso idi ndusụk ufọn edinịm mbubreyo Utuakibuot Ubon kpukpru ini?
11 Nso Idi Mme Ufọn Ẹdinịm Mbubreyo Utuakibuot Ubon Kpukpru Ini? Mbon oro ẹsịnde idem ke utuakibuot akpanikọ ke ofụri esịt ẹsisan̄a ẹkpere Jehovah. Ke adianade do, mme ubon oro ẹsituakde ibuot ọtọkiet ẹsisọn̄ọ mbọbọ ubon mmọ. Ebe ye n̄wan kiet ẹkewet ntem ẹban̄a mme edidiọn̄ oro mmọ ẹnyenede: “Sia idide ebe ye n̄wan oro mînyeneke nditọ inyụn̄ inamde utom usiakusụn̄, isitetie ibet mbubreyo Utuakibuot Ubon. Imetetịm ikpere kiet eken inyụn̄ ikpere Ete nnyịn eke heaven. Idahaemi, ke ini idemerede idap ke usen oro inịmde ndida n̄kpep n̄kpọ ọtọkiet, imesidọhọ kiet eken ite: ‘N̄kọ emeti ke mbubreyo mfịn edi mbubreyo Utuakibuot Ubon?’”
12 Ndutịm edinyene mbubreyo oro ẹdade ẹnam utuakibuot ubon an̄wam n̄ko mme ubon oro ẹnyenede ekese ndinam. Eka kiet emi ọbọkde nditọiren iba ikpọn̄, emi onyụn̄ anamde utom usiakusụn̄ ofụri ini ekewet ete: “Enyene nte ukpepn̄kpọ ubon nnyịn ekesitiede ke ini edem. Nnyịn ikesinịmke enye kpukpru ini, enye ikesinyụn̄ inyeneke iwụk ke ntak oro idem ekesimemde mi. N̄kọfiọkke nte n̄kposiode ini nnịm nnọ enye. Ntre n̄wet leta emi ndikọm mbufo etieti ke mbubreyo Utuakibuot Ubon emi. Imenịm ukpepn̄kpọ ubon kpukpru ini idahaemi imonyụn̄ ibọ ufọn ke ndinam emi.”
13. Nso idibiere adan̄a nte ubon fo ẹdibọde ufọn ito ndutịm emi?
13 Ukem nte Sabbath, mbubreyo Utuakibuot Ubon edi enọ oro otode Ete nnyịn eke heaven, emi ekemede ndin̄wam mme ubon. (Jas. 1:17) Ufọn oro mme ubon ke Israel ẹkebọde ẹto edisọn̄ọ itie ebuana mmọ ye Jehovah ọkọkọn̄ọ ke nte mmọ ẹkedade ini Sabbath ẹnam n̄kpọ. Kpasụk ntre, nte nnyịn idade mbubreyo oro ẹnọde ubon ndida ntuak ibuot inam n̄kpọ edibiere adan̄a nte ubon nnyịn ẹdibọde ufọn. (2 Cor. 9:6; Gal. 6:7, 8; Col. 3:23, 24) Ke ini adade ndutịm emi anam n̄kpọ nte ọfọnde, ubon fo ẹkeme nditịn̄ nte andiwet psalm emi, ẹte: “Edi amaedi ami, ọfọn mi ndisan̄a n̄kpere Abasi. Ami mmada Jehovah, Akakan Ọbọn̄ Andikara, ke ebiet ubọhọ mi.”—Ps. 73:28.
[Se ẹwetde ke ikpọ abisi ke page 5]
Mbubreyo Utuakibuot Ubon ikpetiehe nte ufọk udomo, owo isakke ukpọk imam, edi akpana etie inem inem koro nnyịn ituak ibuot inọ Abasi inemesịt
[Ekebe ke page 6]
TỊM NỊM
Ndusụk Ekikere Oro Ẹnọde Kaban̄a Mbubreyo Utuakibuot Ubon
Bible:
• Ẹtie ọtọkiet ẹkot ikpehe itien̄wed Bible eke urua ke urua. Edieke itien̄wed oro ẹkotde ẹdide mbụk, owo kiet ekeme ndikot mbụk oro, ndien mbon eken ẹkeme ndikot ikọ nsio nsio owo ke mbụk oro.
• Ẹnam ikpehe itien̄wed Bible oro ẹkotde ẹwụt.
• Dọhọ owo kiet kiet ke ubon ebem iso okot mme ibuotn̄wed Bible oro ẹmekde onyụn̄ ewet mbụme kiet m̀mê iba oro enye enyenede ke itien̄wed oro. Ekem ẹnam ndụn̄ọde ọtọkiet ke mme mbụme oro owo kiet kiet enyenede.
• Kpukpru urua, ẹwet mme itien̄wed Bible ke n̄kpri babru, ẹdomo ndimụm mmọ ndọn̄ ke ibuot ẹnyụn̄ ẹdomo ndinam mmọ ẹn̄wan̄a. Ẹnam n̄kpri babru emi ẹwak, ẹnyụn̄ ẹfiak ẹdụn̄ọde mmọ kpukpru urua man ẹse m̀mê itie N̄wed Abasi ifan̄ ke mbufo ẹti.
• Ẹkpan̄ utọn̄ ẹkop nte ẹkotde itien̄wed Bible oro ke usan m̀mê ọkpọ umụmikọ ke adan̄aemi ẹtienede ẹse ke Bible mbufo.
Mme Mbono Esop:
• Ẹtie ọtọkiet ẹtịm idem ẹnọ ikpehe mbono esop kiet kiet.
• Ẹkwọ mme ikwọ Obio Ubọn̄ oro ẹdidade ẹnịm mbono esop ke urua oro etienede.
• Edieke owo enyenede utịn̄ikọ ke Ufọkn̄wed Utom Ukara Abasi m̀mê nnamn̄wụt ke Esoputom, ẹneme nte ẹkpenamde enye, mîdịghe ẹnam ndomonse ke iso mbonubon.
Mme Udọn̄ Ubon:
• Ẹneme n̄kpọ ke n̄wed N̄kparawa Owo Ẹbụp m̀mê ke n̄wed Kpep N̄kpọ to Akwa Andikpep.
• Ẹnam ẹwụt nte ẹkpenamde n̄kpọ ẹban̄a idaha oro ekemede ndisobo ke ufọkn̄wed.
• Ke ini ẹnamde se ikemede nditịbe n̄wụt, ke idaha kiet yak ete m̀mê eka anam nte idi eyen, ke idaha efen eyen anam nte idi ete m̀mê eka. Nditọ ẹyenam ndụn̄ọde ke ibuotikọ ndien ekem ẹkọk ibuot ye ete ye eka.
An̄wautom:
• Ẹnam ẹwụt nte ẹtịmde nneme an̄wautom eke utịturua.
• Ẹneme ẹban̄a nti utịtmbuba oro ubon ẹkemede ndinịm man ẹnam ekese ke an̄wautom ke ini Editi m̀mê ke ini nduọkodudu.
• Ẹnọ owo kiet kiet ke ubon minit ifan̄ ndinam ndụn̄ọde ke nte enye ọkpọbọrọde nsio nsio mbụme oro ẹkemede ndibụp enye ke an̄wautom, ekem dọhọ ẹnam ẹwụt nte ẹkpebọrọde.
Mme Ekikere Efen Oro Ẹnọde:
• Ẹtie ọtọkiet ẹkot ibuotikọ ke mme magazine ndondo emi.
• Dọhọ owo kiet kiet ke ubon ebem iso okot ibuotikọ oro enye enen̄erede ama ke mme magazine ndondo emi, ndien ekem dọhọ enye etịn̄ n̄kpọ aban̄a ibuotikọ oro.
• Ke ini ke ini, kot asuanetop m̀mê n̄wan ye ebe ẹditiene ẹbuana ke mbubreyo Utuakibuot Ubon mbufo, emekeme n̄ko ndinam ndụn̄ọde ye mmọ.
• Ẹse ẹnyụn̄ ẹtịn̄ n̄kpọ ẹban̄a kiet ke otu mme vidio nnyịn.
• Ẹtie ọtọkiet ẹneme ibuotikọ oro “Young People Ask” m̀mê “For Family Review” oro odude ke Awake!
• Ẹtie ọtọkiet ẹneme ibuotikọ oro “Kpep Nditọ Fo” m̀mê “Eke N̄kparawa Owo” oro odude ke Enyọn̄-Ukpeme.
• Ẹkot ẹnyụn̄ ẹneme ikpehe kiet ke Yearbook ndondo emi m̀mê ke obufa n̄wed emi ẹkesiode ke mbono district emi okosụk ebede.
• Ke ẹma ẹkedụk mbono district, mbono circuit m̀mê usen akpan mbono, ẹdụn̄ọde mme akpan n̄kpọ ke mbono oro.
• Ẹdụn̄ọde mme edibotn̄kpọ Jehovah, ẹnyụn̄ ẹtịn̄ se mmọ ẹkpepde nnyịn ẹban̄a Jehovah.
• Ẹdiana kiet ẹnam n̄kpọ, utọ nte ndibot mme n̄kpọ, ndidrọ chart, m̀mê n̄wed ndise obio.