Nte Afo ke Ada Ediye Uduot Ekpri N̄wed Oyom Ọtọn̄ọ Ukpepn̄kpọ?
1 Nte afo ama ọfiọk ete ke imọ inịm ukpepn̄kpọ Bible edieke isiode ibuotikọ ke kiet ke otu n̄wed oro ẹtorode ẹnọ itọn̄ọ ndineme nneme Bible ke nde ke nde kpukpru ini ye owo oro enyenede udọn̄, okposụkedi nneme oro ẹdide mbio mbio? Ke akpanikọ, emi edi ukpepn̄kpọ Bible idem ọkpọkọm ẹnịm enye ke enyịnusụn̄ m̀mê ke urụk ukopikọ. Ntak mûsịnke akpan ukeme ke May ye June nditọn̄ọ utọ ukpepn̄kpọ oro ke ediye uduot ekpri n̄wed Oyom?
2 Tịm Idem man Okụt Unen: Ke ini ọnọde ediye uduot ekpri n̄wed Oyom, nyene se afo oyomde nditịn̄ in̄wan̄-in̄wan̄ ke ekikere. Edieke afo anamde mfiakn̄ka, kere ban̄a nneme oro afo ekenyenede ke akpa ediwaha. Bụp idemfo: ‘Mme ikpehe ekikere ewe ke ediye uduot ekpri n̄wed emi ke ami n̄keme ndida nnam nneme oro aka iso onyụn̄ ada esịm ukpepn̄kpọ Bible?’ Edieke anamde utom ke ufọk ke ufọk, kere utọ ibuot nneme oro edidemerede udọn̄ uyen, akwa owo, eren, m̀mê n̄wan. Dụn̄ọde mme ibuotikọ ediye uduot ekpri n̄wed oro, nyụn̄ mek ibuotikọ oro edemerede owo udọn̄. Ke ama ekebiere nte editọn̄ọde, nam ndomonse ediwak ini. Emi edi kiet ke otu usụn̄ ndikụt unen.
3 Esịne-esịt Utom Obio Ubọn̄ Nnyịn eke January 2002 ọnọ ekikere itiaita ke idak ibuotikọ oro “Mme Ekikere Kaban̄a Edinọ Ediye Uduot Ekpri N̄wed Oyom.” Ekebe oro “Nnennen Nneme” owụt nte ẹkemede ndida ediye uduot ekpri n̄wed emi ntọn̄ọ ukpepn̄kpọ. Afo emekeme ndikpụhọ akpa ekikere oro nsịn nte etienede mi:
◼ “Ndi afo ọmọfiọk ete ke ndida n̄kpasịp minit ifan̄, afo emekeme ndinyene ibọrọ nnọ akpan mbụme Bible? Ke uwụtn̄kpọ, ntak emi ata ediwak ido ukpono ẹdude emi ẹdọhọde ke idi Christian? Nte akanam afo emekere aban̄a emi?” Ke owo oro ama ọkọnọ ibọrọ, kụbọde ka ukpepn̄kpọ 13 nyụn̄ neme akpa ikpehe ekikere iba. Nte ini ayakde, kot nyụn̄ tịn̄ ban̄a itie N̄wed Abasi kiet m̀mê iba. Ekem kot akpatre mbụme ke enyọn̄ page oro, nyụn̄ dọhọ ete: “Mme ukpepn̄kpọ eken ẹwụt n̄kpọ ition oro ẹdade ẹdiọn̄ọ ido ukpono akpanikọ. Nyama ndifiak ndi man nneme mmọ emi ye afo.”
4 Sọn̄ọ Yịre: Da kpukpru ifet oro ẹbererede nam n̄kpọ nte ọfọnde ke ndinam n̄wụt nte ẹdade ediye uduot ekpri n̄wed Oyom ẹnịm ukpepn̄kpọ Bible. Ben̄e edidiọn̄ Jehovah. (Matt. 21:22) Ebede ke ndisọn̄ọ nyịre ke mme ukeme fo, afo emekeme ndikop idatesịt otode edin̄wam owo anam n̄kpọ aban̄a eti mbụk!