‘Ẹbịne Se Ifọnde Kpukpru Ini’
1 Usụn̄ uwem Christian abuana ‘ndibịne se ifọnde kpukpru ini ye kpukpru owo.’ (1 Thess. 5:15) Ke ini idụkde mme mbono district nnyịn, nnyịn imesinyene ediwak ifet ndinam se ifọnde nnọ mbon efen. Ke mme utọ idaha oro, mme owo ke ẹse nnyịn, ndien se kpukpru owo oro ẹsobode ye nnyịn ẹkerede ẹban̄a nnyịn esitiene nte nnyịn inamde n̄kpọ ye mmọ. Man inyene eti enyịn̄ nte Mme Ntiense Jehovah, nnyịn inyene ndida mme edinam nnyịn n̄wụt nte ke ‘imokpono kpukpru owo.’ (1 Pet. 2:17) Oro abuana ‘nditre ndise n̄kpọ eke nnyịn, edi ndikam nse n̄kpọ owo en̄wen.’ (Phil. 2:4) Kere nte emi enyenede ebuana ye ndutịm ufọkidụn̄ ke akamba mbono.
2 Nte afo ama esesịn eben̄e oyom itieidụn̄? (1) Sia Itieutom Unọ Ufọkidụn̄ oyomde ẹdụn̄ ke kpukpru ubet oro ẹdude ke ufọk, kûbọ ubet awak akan se afo oyomde ndidụn̄. (2) Kûdori enyịn Itieutom Unọ Ufọkidụn̄ ndinịm ubet nnọ fi ibọhọke afo ama ọnọ n̄wed eben̄e ufọkidụn̄ mbemiso afo akade ekesịm. (3) Ke ini esịmde itie mbono, nyene ime nyụn̄ kpono nditọete oro ẹdude ke Itieutom Unọ Ufọkidụn̄ nte mmọ ẹdomode ndinọ fi itieidụn̄. (4) Kpeme kpukpru ibet enyene-ebiet (m̀mê ibet ufọkisen edieke odụn̄de ke ufọkisen) ke nte ẹkpenamde n̄kpọ ke esịt-ebiet oro.
3 Ndikpep Nditọ nte Ẹkpenamde Se Ifọnde: Ke ndusụk idaha, nditọ oro ikpọ owo mîsehe enyịn ke mme ufọkidụn̄ ẹsisịn ntịme. (N̄ke 29:15) Ke ndusụk idaha, mme ete ye eka ẹma ẹbuana ke mme edinam efen ẹnyụn̄ ẹfre enyịn ẹban̄a nditọ mmọ ke ubet, ke itie ewọk, m̀mê ke mme itie efen. Ndusụk nditọ ẹma ẹnam uyom tutu enyene-ebiet akpan mmọ ndida ndusụk n̄kpọ ke ufọkidụn̄ nnam n̄kpọ. Emi ama afịna onyụn̄ etịmede ifụre Mme Ntiense ye mbon eken oro ẹkedụn̄de do.
4 Mme ete ye eka, eyetịm an̄wam edieke mbufo ẹbiatde ndusụk ini ye nditọ mbufo ndidụn̄ọde utọ edu Christian oro ẹyomde ẹto mmọ kpukpru ini ye ke kpukpru ebiet mbemiso mbono. (Eph. 6:4) Ke uwụtn̄kpọ, nam mmọ ẹdiọn̄ọ nte ke ata ima Christian “inamke ido eke mîdotke, iyomke ufọn esiemmọ, isọpke iyatesịt.” (1 Cor. 13:5) Ikpọ owo ẹkeme ndisọn̄ọ emi ebe ke ndinịm eti uwụtn̄kpọ nnọ kpukpru owo. Nditọ, mbufo ẹmekeme ndibịne se ifọnde ebe ke ndikop item ete ye eka mbufo, ndiwụt ukpono nnọ mme n̄kpọ ufọk, ndinyụn̄ n̄kere mban̄a mbon oro ẹdude ẹkpere mbufo. (Col. 3:20) Nte nnyịn idomode ndinam se ifọnde ye kpukpru owo ke edidianakiet, nnyịn ‘inam ukpep-n̄kpọ Abasi Andinyan̄a nnyịn enyene uku ke kpukpru usụn̄.’—Titus 2:10.
5 Nti edu nnyịn inyeneke eti utịp sụk ke idem mbon oro ẹkụtde se nnyịn inamde edi enyene n̄ko ke idem mbon oro ẹsikụtde ndudue ẹnọ nnyịn ke ntak kiet m̀mê eken. Ke kpukpru se nnyịn inamde ke itie mbono ye ke obio mbono—edide isan̄a ke efak, idia n̄kpọ ke itie unyamudia, iduọk odudu ke ufọkisen, m̀mê ida mme ifet oro ẹbererede inọ ikọ ntiense ido nneme—ikọ ye edinam nnyịn nte mme Christian ẹkpenyene ndiwụt nte ke nnyịn imebịne se ifọnde.
[Ekebe ke page 4]
Mbọk Ti:
■ Nyene ime nyụn̄ kpono nditọete oro ẹdude ke Itieutom Unọ Ufọkidụn̄.
■ Kpeme mme ibet enyene-ebiet m̀mê ibet ufọkisen oro ẹnọde ke ufọn kpukpru mme andidụn̄.
■ Ẹnen̄ede ẹkpeme nte nditọ mbufo ẹnamde n̄kpọ.