Yụhọ Udọn̄ N̄kpọ eke Spirit Fo
1 Mbono District “Ifịk Ifịk Mme Anditan̄a Obio Ubọn̄” nnyịn oro edide ọyọnọ nnyịn utịbe utịbe ifet ndiyụhọ udọn̄ n̄kpọ eke spirit nnyịn. Ukem nte eti udia eke obụk, ndutịm emi eyenen̄ede ada “ikọ mbuọtidem” ọbọk nnyịn ke n̄kan̄ eke spirit. (1 Tim. 4:6) Enye ayanam nnyịn inen̄ede isan̄a ikpere Jehovah. Ndien nnyịn imekeme ndidori enyịn ndibọ item ye nsịnudọn̄ oro ẹdin̄wamde nnyịn ndiyọ mme idomo ke uwem. Jehovah ọn̄wọn̄ọ ọnọ nnyịn ete: “Nyeteme fi, nnyụn̄ n̄wụt fi usụn̄ eke afo edisan̄ade: nyeteme fi, nyetịn̄ fi enyịn mi ke idem.” (Ps. 32:8) Ẹdiọn̄ nnyịn didie ntem ndinyene ima ima ndausụn̄ Jehovah ke uwem nnyịn! Kere ban̄a ndusụk nti n̄kpọ oro nnyịn ikemede ndinam man ibọ n̄kponn̄kan ufọn ito ndutịm mbono oro.
2 Oyom Itịm Esịt Nnyịn: Nnyịn owo kiet kiet imenyene mbiomo ndikpeme ndamban̄a esịt nnyịn. (N̄ke 4:23) Emi oyom inọ idem ntụnọ inyụn̄ inam akpanikọ ye idem nnyịn. Ini mbono emi edi ini nditie n̄kere itie ebuana nnyịn ye Jehovah, ini ‘ndiwụk enyịn nse ata edifọn ibet Abasi emi anamde owo ọwọrọ ufụn.’ Man itịm esịt nnyịn ‘ndibọ ikọ emi ẹtọde ke esịt,’ nnyịn ikpenyene ndiben̄e Jehovah ite odụn̄ọde esịt nnyịn ese m̀mê ‘ukwan̄ usụn̄’ odu oro oyomde inen̄ede, onyụn̄ ekpeme nnyịn ke “usụn̄ nsinsi uwem.”—Jas. 1:21, 25; Ps. 139:23, 24.
3 Kpan̄ Utọn̄ Nyụn̄ Tie Kere: Jesus ama otoro Mary ke ndinọ ọyọhọ n̄kpan̄utọn̄ ke mme ikọ esie, ọdọhọde ete: “Mary ememek eti udeme, eke mîdibọhọ enye ifep.” (Luke 10:39, 41) Edieke inyenede ukem ekikere oro, nnyịn idiyakke n̄kpri n̄kpọ ẹwọn̄ọde ntịn̄enyịn nnyịn. Nnyịn iyosụhọde itetie inọ n̄kpan̄utọn̄ ke ofụri ndutịm emi. Nnyịn iyefep nditịn̄ ikọ m̀mê ndisan̄a n̄kanade nte mîdotke, iyonyụn̄ ikpeme mbak idida urụk ukopikọ oro ẹkamade-kama ẹsan̄a, ekpri ukwak ubọ etop, ukwak usio ndise, ye ukwak umụm n̄kpọ vidio iwọn̄ọde ntịn̄enyịn mbon efen.
4 Ke ini nnyịn ikpan̄de utọn̄ inọ mme utịn̄ikọ, ọyọfọn iwet mme n̄kpọ mbio mbio man ẹn̄wam nnyịn ndifiọk nte ẹtatde ibuot nneme oro. Nnyịn ikpenyene ndimen se nnyịn ikopde n̄kabuan ye se nnyịn ima ikọfọfiọk. Emi ayan̄wam nnyịn ndifiọk nnyụn̄ nsịn mme n̄kpọ emi ke ekikere. Ke ini idụn̄ọrede mme n̄kpọ oro nnyịn ikewetde, nnyịn ikpenyene ndinam ntre ye ekikere edida mmọ nsịn ke edinam. Nnyịn owo kiet kiet iyanam ọfọn ndibụp nte: ‘Didie ke emi otụk itie ebuana mi ye Jehovah? Nso ukpụhọde ke oyom nnam ke uwem mi? Didie ke n̄keme ndida mme ntọt emi nsịn ke edinam ke ini nnamde n̄kpọ ye mbon efen? Didie ke n̄keme ndida enye nnam n̄kpọ ke utom an̄wautom mi?’ Nnyịn ikpenyene ndineme mme akpan n̄kpọ emi nnyịn inen̄erede ima ye mbon efen. Ndinam emi ayan̄wam nnyịn ndikpeme ikọ Jehovah ‘ke ọwọn̄ esịt nnyịn.’—N̄ke 4:20, 21.
5 Ẹyak Nnyịn Ida Se Ikpepde Isịn ke Edinam: Ke ama okodụk mbono district, eren kiet ọkọdọhọ ete: “Ndutịm oro ama enen̄ede otụk kpukpru owo, onụkde owo ndidụn̄ọde esịt esie, ye eke mbonubon esie, ndinyụn̄ nnọ ima ima un̄wam N̄wed Abasi oro ẹyomde. Enye anam mi nnen̄ede mfiọk mbiomo oro ami nnyenede ndinọ esop un̄wam efen efen.” Eyedi esitie ediwak nnyịn ntre ke idem. Edi ikụreke ke nnyịn ndinyọn̄ ufọk, ikerede ke ẹsọn̄ọ nnyịn idem ye nte ke imafiak ikop nsọn̄idem. Jesus ọkọdọhọ ete: “Edieke mbufo ẹfiọkde mme n̄kpọ emi, ọfọfọn ọnọ mbufo ke mbufo ẹnamde mmọ.” (Sịghisịghi ubọkn̄wed edi eke nnyịn; John 13:17) Ana nnyịn isịn ukeme ndida mme akpan n̄kpọ emi ẹbehede nnyịn nsịn ke edinam ọkpọkpọ. (Phil. 4:9) Emi edi usụn̄ ndinen̄ede nyụhọ mme udọn̄ n̄kpọ eke spirit nnyịn.
[Ekebe ke page 5]
Tie Kere Se Okopde:
■ Didie ke enye otụk itie ebuana mi ye Jehovah?
■ Didie ke enye otụk nte nnamde n̄kpọ ye mbon efen?
■ Didie ke ami n̄keme ndida enye esịn ke edinam ke uwem mi ye ke utom an̄wautom mi?