Ẹkpaha Ẹdiana Kiet
1 Adan̄a ediwak ini didie ke afo esikop n̄kpaidem aban̄a akakan usụn̄ oro ẹdiọn̄de idem owo? (Ps. 139:14) Mme ndido idem owo kiet kiet ẹnam utom ke edidianakiet ye mbon eken. Ikọ Abasi emen esop Christian odomo ye idem owo emi etịmde adiana kiet anam n̄kpọ. Ke idak enye oro edide Ibuot, kpa Christ, kpukpru mme andibuana ke esop ‘ẹkpaha ẹdiana kiet ẹnyụn̄ ẹnam utom ọtọkiet ebe ke kpukpru ikek oro ọnọde se ẹyomde.’ (Eph. 4:16a, NW) Ntem, Jehovah ekeme ndida ikọt esie emi ẹdianade kiet nnam mme utịbe utịbe n̄kpọ.
2 Mme andibuana ke esop akpa isua ikie ẹkenam n̄kpọ ye “esịt kiet” ke ndise mban̄a udọn̄ n̄kpọ eke spirit ye eke obụk kiet eken. (Utom 2:44-47) Ke un̄wam Jehovah, mmọ ẹma ẹdiana kiet ẹyọ enyụn̄ ẹkan ọkpọsọn̄ ubiọn̄ọ. (Utom 4:24-31) Mmọ ẹma ẹtan̄a etop Obio Ubọn̄ ke ebiet ekededi oro mmọ ẹkekade, ẹyọhọde isọn̄ eke ini oro ye eti mbụk. (Col. 1:23) Ke eyomfịn, esop Christian adiana kiet anam mme ukem n̄kpọ emi ke udomo emi akam okponde akan. Mme n̄kpọ ewe itịp isịn ke edidianakiet emi?
3 Ukpepn̄kpọ Abasi Odụri Adian Kiet: Ke ofụri ererimbot, utuakibuot anam nnyịn idiana kiet. Emi asan̄a didie etịbe? Nnyịn imenyịme ndutịm Jehovah oro ẹkụtde ke enyịn ndida nnọ “udia [eke spirit] ke edikem ini.” (Matt. 24:45) Nnyịn n̄ko imowụt esịtekọm iban̄a “mme enọ ke owo” (NW) oro enye ọnọde nte mme andikpep ke esop. Nte nnyịn ke nsụhọdeidem inyịmede ndutịm Jehovah ndinọ nnyịn udia eke spirit, ifiọk nnyịn ke Ikọ Abasi ọkọri onyụn̄ edemede udọn̄ kpukpru nnyịn ndikpebe Jesus nte mme mbet esie. Ana nnyịn ika iso ikpep Ikọ Abasi, idomode ifịk ifịk ‘ndikabade ndi kiet ke mbuọtidem.’ (Eph. 4:8, 11-13) Nte afo ke etịp esịn ke edidianakiet eke spirit nnyịn ebe ke edikot Bible ke usen ke usen?
4 Ẹdiana Kiet Ebe ke Ebuana Christian: Ima odụri nnyịn adian ọtọkiet ke n̄kpet n̄kpet itie ebuana ke mme mbono esop Christian. Ke mme mbono esop emi, nnyịn ‘imesikere kiet eken.’ (Heb. 10:24, 25) Emi idịghe ndise nte mme owo ẹtiede ke enyọn̄ idem edi edi nditịm ndiọn̄ọ nditọete nnyịn, ndise mmọ ke ọsọn̄urua nte Jehovah esede. (Hag. 2:7, ikọ idakisọn̄, NW) Nte nnyịn ikpan̄de utọn̄ ke mme ikọ mbuọtidem mmọ, ima oro nnyịn inyenede inọ mmọ etetịm okpon onyụn̄ ọsọn̄ọ edidianakiet nnyịn. Nte ẹdiọn̄ọ fi nte owo emi esidụkde mme mbono esop kpukpru ini?
5 Mme Ekemmọ Nsan̄autom ke An̄wautom: Ndikwọrọ eti mbụk ye ekemmọ mme andinịm ke akpanikọ anam nnyịn idiana kiet ke ndinam uduak Abasi. Apostle Paul ama ama ‘mme nsan̄a esie ke utom Obio Ubọn̄ Abasi.’ (Col. 4:11) Ndibuana mme ifiọkutom nnyụn̄ n̄n̄wam kiet eken ke adan̄aemi idude ke an̄wautom an̄wam nnyịn ndinam utom Christian nnyịn nnyụn̄ nsọn̄ọ mbọbọ edidianakiet nnyịn.—Col. 3:14.
6 Odudu Edisana Spirit Oro Anamde Ẹdiana Kiet: Nte nnyịn isịnde ifịk ke ndinam uduak esie, Jehovah ọyọnọ nnyịn spirit esie. Emi an̄wam nnyịn ndibiere mme ndutan̄uyo nnyụn̄ ndụn̄ ọtọkiet ke edidianakiet. (Ps. 133:1) Emi onụk nnyịn ‘ndida emem nte urụk mbọp idem ndian ọtọkiet ke spirit.’ (Eph. 4:3) Nnyịn owo kiet kiet imekeme nditịp nsịn ke emem oro odude ke otu ikọt Abasi ebe ke ndision̄o mbun̄wụm spirit ke nte nnyịn inamde n̄kpọ ye kiet eken.—Gal. 5:22, 23.
7 Ndinam utom ọtọkiet ke edidianakiet ke idak itieibuot Christ ‘anam idem ọdọdiọn̄ ọkọri adaha ada ke ima.’ (Eph. 4:16b) Akan oro, enye ada ubọn̄ ọsọk Jehovah, kpa “Abasi emem.”—Rome 16:20.