Ufọkn̄wed Oro Etịmde Nnyịn Idem ọnọ Ata Akpan N̄kpọ
1 Mme owo ẹsika ufọkn̄wed man ẹkebọ ukpep oro edin̄wamde mmọ ẹsịm utịtmbuba mmọ ke uwem. Nte ededi, utịtmbuba ewe ekeme ndinen̄ede ndi akpan n̄kpọ n̄kan editoro Andinọ uwem nnyụn̄ n̄n̄wam mbon efen ndikpep uduak ye mme usụn̄ esie? Ndomokiet idụhe. Uduak Ufọkn̄wed Utom Ukara Abasi edi nditịm nnyịn idem ndikpep mbon efen se nnyịn inịmde ke akpanikọ. Ntem, nte nnyịn ibuanade ke ufọkn̄wed ke urua kiet kiet, nnyịn ke ibọ mme usọ oro ẹtịmde nnyịn idem ẹnọ ata akpan utom ke uwem.
2 Ẹma ẹsịn “Ndutịm Ufọkn̄wed Utom Ukara Abasi eke 2003” ke nsiondi Utom Obio Ubọn̄ Nnyịn ọfiọn̄ oko. Ndutịm oro esịne ọyọhọ ntọt ke nte ẹdinịmde ufọkn̄wed oro. Ọyọfọn afo esịn ndutịm emi ke n̄wed Bọ Ufọn to Ukpepn̄kpọ Ufọkn̄wed Utom Ukara Abasi fo, emi afo enyenede ndida ndi Ufọkn̄wed Utom Ukara Abasi kpukpru urua. Kere ban̄a ndusụk ikpehe ke Ufọkn̄wed Utom Ukara Abasi eke 2003.
3 Ido Utịn̄ikọ: Ọtọn̄ọde ke January, ẹditọn̄ọ ufọkn̄wed ke ndida minit ition nneme ido utịn̄ikọ m̀mê ikpehe aban̄ade ukotn̄wed ye unọ ukpep. Esenyịn ufọkn̄wed edinọ utịn̄ikọ edida mberede emi, mîdịghe enye ọyọdọhọ ebiowo efen oro odotde ọnọ utịn̄ikọ emi. Etịn̄ikọ ekeme nditịn̄ nte ido utịn̄ikọ edide akpan n̄kpọ ye se enye ọwọrọde. Enye ndien ekpenyene nditat utịn̄ikọ oro ebe ke ndineme mme uwụtn̄kpọ N̄wed Abasi nnyụn̄ n̄wụt nte ẹkpedade edu emi ẹnam n̄kpọ, owụkde ntịn̄enyịn akpan akpan ke nte ndinam oro ekemede ndifori utom an̄wautom nnyịn.
4 Utịn̄ikọ Nọ. 1: Ẹfiak ẹti nditọete oro ẹdinọde utịn̄ikọ item “ndiwụk ntịn̄enyịn ke nte mme n̄kpọ oro ẹnemede ẹtịmde ẹnyene ufọn.” Emi ọwọrọ ndiwụt esop nte ẹkpedade ntọt oro ẹnam n̄kpọ. Edieke ẹnọde fi emi anam, dụn̄ọde page 48-49 ke n̄wed ukpepn̄kpọ Ufọkn̄wed Utom kaban̄a mme ekikere ke nte ẹkpetịmde idem, nyụn̄ nam ndụn̄ọde ke se ẹwụtde ke mme ibuot nneme oro ẹsion̄ode ẹwet ẹtiene abisi enyịn̄ ke n̄wed emi ke idak “Nte ẹkpedade se ẹtịn̄de ẹsịn ke edinam.”
5 Ndutịm Edikot Bible: Edieke afo mûkekemeke nditiene edikot Bible eke urua ke urua ke ini edem, ntak mûbiereke nditiene ndutịm oro isua emi? Mbon oro ẹnamde emi ẹyekot N̄wed Abasi Christian Usem Greek ẹkụre ke utịt isua. Ẹwụt mme ufọn ẹdude ke nditọn̄ọ ndutịm edikot Bible ke N̄wed Abasi Usem Greek ke page 10, ikpehe ekikere 4, ke n̄wed Ufọkn̄wed Utom.
6 Mme Akpan N̄kpọ Ẹtode Edikot Bible: Ẹnam ikpehe emi ọniọn̄ esịm minit duop man otuowo ẹkeme nditiene nsịn uyo ke edikot n̄wed eke urua oro. Mbon oro ẹnọde ẹkpenyene ndikụre ke ini oro ẹnọde. Ẹdinam emi kpukpru urua, esịnede urua oro ẹnamde edifiak ndụn̄ọde oro ẹnemede-neme. Nte afo okotde mme ibuot n̄wed oro ẹnọde, kere ban̄a mme akpan n̄kpọ oro ẹdinyenede ufọn inọ fi ke ukpepn̄kpọ ubon fo, ke utom ukwọrọikọ fo, m̀mê ke usụn̄ uwem fo. Mme edu Jehovah ewe ke ẹkewụt ke nte enye anamde n̄kpọ ye mme owo ọkọrọ ye mme idụt? Nso ke afo ekekpep oro ọsọn̄ọde mbuọtidem fo onyụn̄ anamde esịtekọm oro enyenede aban̄a Jehovah ọkọri? Ben̄e idem nditịn̄ mban̄a akpan n̄kpọ ekededi ke ibuot n̄wed oro ẹnọde, idem ke mme ufan̄ikọ oro ẹdikotde ke Utịn̄ikọ Nọ. 2, sia eyenete oro edisede aban̄a edikot n̄wed mîditịn̄ke n̄kpọ itụk mme ufan̄ikọ oro.
7 Utịn̄ikọ Nọ. 2: Akpa n̄kpọ oro ẹnọde ẹnam ke urua kiet kiet edidi edikot n̄wed nnọ otuowo. Ke ẹsiode akpatre urua ẹfep, kpukpru edikot n̄wed ke ọfiọn̄ kiet kiet edito itie Bible urua oro. Edikot n̄wed eke akpatre urua ke ọfiọn̄ edito Enyọn̄-Ukpeme. Eyen ufọkn̄wed emi ekpenyene ndikot ebiet oro ẹnọde enye ye unana editịn̄ ntọn̄ọikọ m̀mê utịtikọ. Ke utọ usụn̄ emi, enye eyekeme ndiwụk ntịn̄enyịn akpan akpan ke usọ ukotn̄wed esie.—1 Tim. 4:13.
8 Utịn̄ikọ Nọ. 3 ye Nọ. 4: Ndusụk utịn̄ikọ ẹdade ẹto n̄wed Ifiọk ẹdọn̄ọ uwak n̄kpọ ẹkan mbon eken; ndusụk ẹnyene sụk ibuotikọ. Mbon oro ẹnọde mme utịn̄ikọ oro ebiet ẹdade n̄kpọ ẹto mîwakke ikem, m̀mê mbon oro ẹnọde sụk ibuotikọ ẹyenyene ifet ndinam ndụn̄ọde ke n̄wed Christian nnyịn, nnyụn̄ nda oro mfori utịn̄ikọ mmọ. Emi ekeme ndinam edi mmemmem n̄kpọ ọnọ nditọete iban ndinam utịn̄ikọ mmọ ekekem ye utọ andin̄wam oro mmọ ẹnyenede.
9 Nte Ẹtịmde: Nte ẹwụtde ke n̄wed Ufọkn̄wed Utom, page 45, esenyịn ufọkn̄wed ekeme ndiwụt nte ẹtịmde. Edieke enye mîwụtke, do nditọete iban ẹkeme ndimek usụn̄ nte ẹtịmde nto mbon oro ẹdude ke page 82. Edieke eyenete an̄wan ọnọde utịn̄ikọ kiet ke ọfiọn̄ iba, usụn̄ 30 oro ẹnọde ke nte ẹkpetịmde ẹdọn̄ọ nsio nsio usụn̄ oro ẹkemede ndida nnam n̄kpọ ke isua ition. Nditọete iban oro ẹmekde Nọ. 30, emi ọdọhọde, “Usụn̄ efen oro odotde ye n̄kann̄kụk mbufo,” ẹkpenyene ndiwet usụn̄ oro mmọ ẹtịmde ke utịt utịt m̀mê ke edem babru oro ẹdade ẹnọ owo n̄kpọ anam ke Ufọkn̄wed Utom Ukara Abasi (S-89). Esenyịn ufọkn̄wed eyewet usenọfiọn̄ oro eyen ufọkn̄wed ọnọde utịn̄ikọ ke page 82 ke n̄wed esie adiana usụn̄ oro enye eketịmde. Enye ekeme ndinam emi ke ukem ini oro enye enịmde idiọn̄ọ ke babru item eyen ufọkn̄wed.
10 Babru Item: Babru item fo odu ke esịt n̄wed fo. Enye odu ke page 79-81. Ke ntre, afo enyene ndinọ esenyịn ufọkn̄wed n̄wed fo ke ama ọkọnọ utịn̄ikọ ama. Oyoyom esenyịn ufọkn̄wed enyene n̄wetnnịm n̄kpọ aban̄ade mme akpan n̄kpọ item oro nditọ ufọkn̄wed ẹnamde n̄kpọ ẹban̄a.
11 Edifiak Ndụn̄ọde Oro Ẹnemede-Neme: Ẹdineneme ndụn̄ọde Ufọkn̄wed Utom Ukara Abasi. Ẹdinam enye ke kpukpru ọfiọn̄ iba ndien enye edida minit 30. Ẹyeka iso ẹmịn̄ mme mbụme oro ẹdinemede ke ini ndụn̄ọde emi ke Utom Obio Ubọn̄ Nnyịn. Edieke urua mbono circuit m̀mê edidi esenyịn circuit ọduọde ke urua edifiak ndụn̄ọde oro ẹnemede-neme, do ẹkpenyene ndimen mme utịn̄ikọ urua efen ndinọ urua oro nnyụn̄ nsio edifiak ndụn̄ọde oro ẹnemede-neme nnịm urua efen.
12 Mme Udiana Ufọkn̄wed: Ke mme esop oro nditọ ufọkn̄wed oro ẹsịnde enyịn̄ ẹwakde ẹbe 50, mbiowo ẹkpenyene ndikere mban̄a ndinịm udiana ufọkn̄wed. “Ẹkeme ndinam kpukpru ikpehe ufọkn̄wed ke udiana ufọkn̄wed emi, mîdịghe ẹnam sụk akpatre utịn̄ikọ iba.” (Ufọkn̄wed Utom, p. 285) Ẹnọ akpatre ekikere emi ke ufọn mme esop oro ediwak nditọete iban ẹdude, edi oro nditọete iren mîwakke ndise mban̄a edikot n̄wed. Mbiowo ẹkpenyene ndimek nditọete iren oro ẹdotde ndise mban̄a mme udiana ufọkn̄wed emi.
13 Udiana Ọnọitem: Nte ẹwụtde ke Ndutịm Ufọkn̄wed Utom Ukara Abasi, otu mbiowo ekpenyene ndimek udiana ọnọitem oro edinọde mbiowo ye mme asan̄autom unamutom oro ẹdinọde utịn̄ikọ item ye mme akpan n̄kpọ ẹtode edikot Bible, item ke ndịbe. Eyenete emi ẹmekde ndinam emi ekpenyene ndidi owo oro enyenede mbufiọk, oro mbiowo eken ẹdikponode item esie. Item esie ekpenyene ndidi se ibọpde-bọp, otorode eti utịn̄ikọ ye usọ unọ ukpep onyụn̄ esịnde udọn̄ ọnọ akpan n̄kpọ kiet m̀mê iba oro ẹyomde ẹnam n̄kọri. Ufọn idụhe ndinọ eyenete oro esinọde utịn̄ikọ ndien ndien item ke ofụri utịn̄ikọ oro enye ọnọde. Nte ededi, eyenete oro ẹdọhọde ọnọ item mi ekpenyene ndiwụt mbufiọk nnyụn̄ mfiọk nte ke idem nditọete oro ẹnọde utịn̄ikọ an̄wa idahaemi ẹkeme ndiyom un̄wam man ẹka iso ẹnam n̄kọri.—1 Tim. 4:15.
14 Se Ọnọitem Akpakpan̄de Utọn̄ Ọnọ: Nso ikeme ndin̄wam ọnọitem ndidụn̄ọde utịn̄ikọ oro ẹnọde? Ọyọhọ ekebe ita oro odude ke ediwak ke otu ibuotn̄wed 53 oro ẹnyenede nọmba ke n̄wed Ufọkn̄wed Utom esịne ibio ibio akpan n̄kpọ oro ẹkpenyenede ndikpan̄ utọn̄ nnọ. Esenyịn ufọkn̄wed ekpenyene n̄ko ndikpan̄ utọn̄ nnọ mme n̄kpọ editi m̀mê mme ekikere eken ke n̄wed oro ẹdin̄wamde enye ndisọsọp n̄kụt nte ẹmụmde ekikere kiet ẹyịri ye efen ediye ediye ye nte ẹnọde utịn̄ikọ oro uforo uforo. Ke uwụtn̄kpọ, tịm se udịm udịm mbụme ke enyọn̄ page 55 ye mme ekikere oro ẹnọde ke akpatre ikpehe ekikere ke page 163.
15 Wet N̄kpọ Yọhọ Mme Ukpọk Ufan̄: Ke adianade ye mme ntatara ufan̄ oro ẹdude ke mben esie, n̄wed Ufọkn̄wed Utom enyene ediwak ukpọk ufan̄ oro ẹnịmde ẹnọ fi ndiwet n̄kpọ ke ini anamde ọkpọkpọ ukpepn̄kpọ fo ye ke ini odụkde Ufọkn̄wed Utom Ukara Abasi. (Se page 77, 92, 165, 243, 246, ye 250.) Kụt ete ke amada n̄wed fo edi ufọkn̄wed kpukpru urua. Tiene se ke ini ẹnọde akpa utịn̄ikọ. Nịm n̄wed fo in̄wan̄ tutu ẹkụre ufọkn̄wed. Tịn̄ enyịn ke mme ekikere oro esenyịn ufọkn̄wed ọnọde. Kpan̄ utọn̄ nọ mme usụn̄ unọ ukpep, mme mbụme, mme uwụtn̄kpọ, mme ndamban̄a ikọ, mme n̄kpọ ẹkụtde ke enyịn, ye nsio nsio n̄kpọ oro mme etịn̄ikọ ẹdade ẹdomo ye efen. Ke anamde eti n̄wetnnịm n̄kpọ, afo eyekeme nditi nnyụn̄ nda ediwak nti n̄kpọ emi ọkọde ke ufọkn̄wed nnam n̄kpọ.
16 Jesus Christ ama ọfiọk ete ke ndikwọrọ eti mbụk Obio Ubọn̄ Abasi edi n̄kponn̄kan ifetutom oro ẹkemede ndinọ owo ekededi. Oro ekedi akpan utom esie. (Mark 1:38) Enye ọkọdọhọ ete: “Mmenyene ndikwọrọ eti mbụk Ubọn̄ Abasi nnọ mme obio en̄wen n̄ko: koro ẹkedọn̄ Mi ẹte ndinam oro.” (Luke 4:43) Nte mbon oro ẹkenyịmede ikot nditiene enye, nnyịn n̄ko imenen̄ede inyene ekese ndinam ke ndikwọrọ eti mbụk, inyụn̄ idomo kpukpru ini ndifori uduot “uwa ekọm” nnyịn. (Heb. 13:15) Ke ntak oro, nnyịn ikpakam ibiere nditiene mbuana kpukpru ini ke Ufọkn̄wed Utom Ukara Abasi, kpa ufọkn̄wed oro an̄wamde nditịm nnyịn idem nnọ mme ata akpan n̄kpọ ke uwem.