Mme Ibuot Ufọk—Ẹka Iso ke Eti Ndutịm eke Spirit
1 Kpa ye oro okodụn̄de ke ediwak iduọk isua ke Babylon oro ukpono ndem ye mbiara ido uwem ẹkeyọhọde, ẹma ẹfiọk Daniel nte owo oro anamde n̄kpọ Jehovah “kpukpru ini.” (Dan. 6:16, 20) Enye akasan̄a didie aka iso enyene idaha eke spirit esie? Bible owụt ete ke enye ama enyene eti ndutịm oro enye ekesitienede ke mme n̄kpọ oro ẹnyenede ebuana ye utuakibuot akpanikọ. Ke uwụtn̄kpọ, ekedi ido esie ndisibọn̄ akam ikata ke usen ke “ubet enyọn̄” esie. (Dan. 6:10) Nte eyịghe mîdụhe, enye n̄ko ama enyene ndutịm mme edinam eke spirit eken, utọ nte edikot Ibet. Ntem, ke ini okosobode idomo oro ekesịnde uwem esie ke itiendịk, Daniel ikesehekede ke utuakibuot esie nnọ Jehovah, ndien ẹma ẹnyan̄a enye ke utịbe utịbe usụn̄.—Dan. 6:4-22.
2 Ukem ntre mfịn, ana nnyịn in̄wana ‘ndidu ke edidemede kpukpru ini.’ (Eph. 6:18, NW) Ererimbot emi nnyịn idude “esịne ke ubọk andidiọk.” (1 John 5:19) Idomo m̀mê ubiọn̄ọ ekeme ndidemede ke mbuari onyụn̄ odomo mbuọtidem nnyịn. Ke ini akwa ukụt, Gog eke Magog eyenen̄ede an̄wana ye ikọt Abasi tutu etie nte n̄kpọ emi mmọ mîdikemeke ndibọhọ. Emi oyoyom ọyọhọ mbuọtidem ke Jehovah.—Ezek. 38:14-16.
3 “Akpan ukpọhọde kiet edi ndinam uforo uforo edikot, edikpep, ye edineme Bible edi usụn̄ uwem.” Ntre ke ntọn̄ọikọ drama mbono district eke 1998 oro ibuotikọ ekedide “Mme Ubon—Ẹnam Edikot Bible ke Usen ke Usen Edi Usụn̄ Uwem Mbufo!” ọkọdọhọ. Enye ama aka iso ete: “Ke ini mme ubon ẹtienede utọ ndutịm oro kpukpru ini ye ke usụn̄ oro anamde Bible enyene uwem, usụn̄ edinam emi Bible akarade mi ekeme ndinyene akwa odudu ke idem ubon. Enye anam ifiọk nnyịn ọkọri. Enye ọsọn̄ọ mbuọtidem nnyịn. Enye onyụn̄ ọnọ nnyịn mme owo ndikpebe—iren ye iban oro ẹkenen̄erede ẹnyene mbuọtidem ke eset—emi ẹkemede ndidemede nnyịn, ẹnụkde nnyịn ndida nnọ akpanikọ.” Nte nnyịn ikerede iban̄a nsio nsio ikpehe eti ndutịm eke spirit, mme ibuot ufọk ẹkpenyene ndikere mban̄a mme usụn̄ oro mmọ ẹkemede ndifori ndutịm eke spirit ubon mmọ.
4 Neme Ikọ Abasi ke Usen ke Usen: “Ke ini Obio Ubọn̄ Abasi edikarade ye unana ubiọn̄ọ, ẹnyụn̄ ẹnamde uduak Abasi ke isọn̄ kpa nte ẹnamde ke heaven, idiọkowo ndomokiet—ọkpọkọm idiọk unam—‘idinamke idiọk, idinyụn̄ ibiatke n̄kpọ.’ (Isa. 11:9; Matt. 6:9, 10)” Mme ikọ oro ẹkedu ke Ẹdụn̄ọde N̄wed Abasi ke Usen ke Usen—2001 ke utịn̄ikọ itien̄wed eke September 11. Editi emi ọkọnọ ndọn̄esịt didie ntem! Nte ibuot ufọk, ndi edi ido fo ndineme itien̄wed Bible ye mme utịn̄ikọ ẹtienede ye ubon fo ofụri usen? Emi enen̄ede enyene ufọn. Edieke mbufo mîkemeke ndisobo usenubọk, eyedi ẹmekeme ndinam ntre ke mbubịteyo. Ete kiet ọkọdọhọ ete: “Ini udia mbubịteyo esidi eti ini ọnọ nnyịn ndineme itien̄wed Bible eke usen ke usen.”
5 Edieke edide mbufo ẹmenyenyene eti ndutịm ke ndineme itien̄wed eke usen ke usen nte ubon, mbufo ẹmetịm ẹnam. Eyedi mbufo ẹmekeme ndika iso nnam n̄kọri ke ndikot itie kiet ke Bible ke ukem ini oro. Ndusụk owo ẹnam edi ido mmọ ndikot ofụri ibuotn̄wed oro ẹdade itien̄wed eke usen oro ẹto. Mbon eken ẹmek itien̄wed Bible oro ẹkotde, ẹnamde emi ke adiana ke adiana. Edikot Bible ke usen ke usen ayan̄wam ubon fo ndikọri eti mbak ediyat Jehovah esịt onyụn̄ ofori udọn̄ mmọ ndinam uduak esie.—Deut. 17:18-20.
6 Ndutịm edikot Bible ubon mbufo ye edineme itien̄wed eke usen ke usen eyenen̄ede enyene ufọn edieke mbufo ẹdade esisịt ini nditịn̄ nte ẹkpedade ntọt oro ẹsịn ke edinam. N̄wed ukpepn̄kpọ Ufọkn̄wed Utom ke page 60 ọnọ ekikere emi: “Mbufo ẹmekeme ndimek ndusụk ufan̄ikọ ke edikot Bible oro ẹdiomide ẹnọ urua oro, ẹneme se mmọ ẹwọrọde, ndien ekem ẹbụp mme utọ mbụme nte: ‘Didie ke emi ọnọ nnyịn ndausụn̄? Didie ke nnyịn ikeme ndida mme ufan̄ikọ emi nnam n̄kpọ ke utom ukwọrọikọ? Nso ke mmọ ẹyarade ẹban̄a Jehovah ye usụn̄ unam n̄kpọ esie, ndien didie ke oro anam esịtekọm oro nnyịn inyenede inọ enye ọkọri?’” Utọ nneme eke spirit emi ayan̄wam kpukpru owo ke ubon fo ‘nditịm mfiọk se Ọbọn̄ amade.’—Eph. 5:17.
7 Ukpepn̄kpọ Ubon: Ndinịm ukpepn̄kpọ ubon kpukpru urua edi eti usụn̄ mme ibuot ufọk ndiwụt nditọ mmọ nte ke mme n̄kpọ eke spirit ẹdi akpa. Akparawa kiet ama eti ete: “Ndusụk ini idem esimem Ete nnyịn etieti ke ini ọnyọn̄de utom tutu enye ikemeke ndimenede idem, kpa ye oro ima isinịm ukpepn̄kpọ emi, ndien emi ama an̄wam nnyịn ndifiọk nte ukpepn̄kpọ emi edide akpan n̄kpọ.” Nditọ n̄ko ẹkeme nditịp nsịn ke ndutịm oro ndikụt unen. Ubon kiet emi enyenede nditọ usụkkiet ẹsidemede ke n̄kanika ition man ẹnịm ukpepn̄kpọ ubon mmọ sia owo mîkemeke ndinịm enye ke ini efen.
8 Man ukpepn̄kpọ ubon enyene uforo, ana ibuot ufọk ‘etịm ekpeme idem esie ye se enye ekpepde owo.’ (1 Tim. 4:16) N̄wed ukpepn̄kpọ Ufọkn̄wed Utom ke page 32, ọdọhọ ete: “Ẹkeme nditịn̄ nte enende ẹte ke ukpepn̄kpọ ubon oro enyenede uforo ọtọn̄ọ ke nditịm mfiọk ubon fo. Didie ke mme andibuana ke ubon fo ẹkọri ke n̄kan̄ ke spirit? . . . Ke ini odude ke an̄wautom ye nditọ fo, nte mmọ ẹsinyene ifụre ndinam mme ubọkn̄ka mmọ ẹdiọn̄ọ mmọ nte Mme Ntiense Jehovah? Nte mmọ ẹma ndutịm edikot Bible ye eke ukpepn̄kpọ ubon mbufo? Nte mmọ ẹnen̄ede ẹnam usụn̄ Jehovah edi usụn̄ uwem mmọ? Nditịn̄ enyịn nse oyowụt se oyomde afo, nte ibuot ufọk, anam man otodo ọsọn̄ọ onyụn̄ ọbọp mme edu eke spirit ke idem owo kiet kiet ke ubon.”
9 Mme Mbono Esop: Nditịm idem nnọ nnyụn̄ ndụk mme mbono esop ẹkpenyene ndidi akpan ubak edinam eke urua ke urua. (Heb. 10:24, 25) Ke ndusụk idaha, mbufo ẹmekeme nditịm idem nnọ ndusụk mbono esop nte ubon. Utu ke ndibet tutu akpatre ini, nte mbufo ẹmekeme ndibabak ntịm idem? Ndinyene eti ndutịm oro ẹtienede ke afan̄ emi oyofori uduot ntịmidem ye mme ufọn oro ẹbọde ẹto mme mbono esop oro.—N̄ke 21:5.
10 Ẹdiọn̄ọ eti ndutịm eke spirit ẹto uduot ye iwụk oro enye enyenede. Nso edieke mme idaha mîyakke fi etịm idem ọnọ ofụri mbono esop? N̄wed ukpepn̄kpọ Ufọkn̄wed Utom ke page 31, ọnọ ekikere emi: “Feb ndudue edikot n̄wed itọk itọk n̄kukụre man okot enye ama, mîdịghe, ke ọdiọkde akan, nditetre ndikpep ofụri ofụri sia mûkemeke ndikpep ndomokiet. Utu ke oro, biere udomo oro afo ekemede ndikpep, nyụn̄ kpep enye mfọn mfọn. Nam enye ke urua kiet kiet. Nte ini akade, domo ndinam enye atara man esịm mme mbono esop eken.”
11 Ke ini mme ubon ẹbakde ẹka mbono esop, emi esin̄wam ndinam mmọ ẹnyene nnennen idaha ekikere nditoro Jehovah nnyụn̄ mbọ ufọn nto mme item oro enye ọnọde. Nte ubon fo enyene edu emi? Emi oyom eti ndutịm ye edidianakiet ofụri owo ke ubon. Edieke mbufo ẹkụtde ke ubon mbufo ẹsinam n̄kpọ itọk itọk ke usen mbono esop, nte ẹmekeme ndinam mme ukpụhọde ke ndutịm mbufo? Nte odu mme n̄kpọ oro ẹkpebakde-bak ẹnam? Edieke owo kiet ke ubon enyenede ediwak n̄kpo ndinam, nte mbon eken ẹkeme ndin̄wam? Nte mfịghe ẹkpesụhọde edieke kpukpru owo ẹkpebakde esisịt ẹtịm idem ndika mbono esop? Eti ntịmidem etịp esịn ke ndinyene emem ke ubon ye ke esop.—1 Cor. 14:33, 40.
12 An̄wautom: Ndisio akpan ini nnịm nnọ utom ukwọrọikọ edi ikpehe efen ke eti ndutịm eke spirit. Akparawa kiet emi ekerede Jayson eti ete: “Ke ubon nnyịn, ẹkesiyak usenubọk Saturday ẹsịn ke utom ukwọrọikọ. Emi ama ọfọn ye ami koro adan̄a nte n̄kọwọrọde an̄wautom, ntre ke n̄kokụt ufọn oro enye anamde ndien ntre ke n̄kenen̄ede n̄kop inem esie.” Ediwak mbon oro ẹkọride ẹkponi ke mme ubon Ntiense ẹkụt n̄ko nte ke ndisio nnennen ini nnịm nnọ utom ukwọrọikọ kpukpru urua ama an̄wam mmọ ẹkọri nte mme asan̄autom Christian.
13 Ndinyene eti ndutịm ekeme n̄ko ndin̄wam ndinam ini oro ubon fo abiatde ke an̄wautom enen̄ede enyene inem ye uforo. Didie ke ekeme ndinam emi? Enyọn̄-Ukpeme eke July 1, 1999, page 21, ama ọnọ mme ekikere oro ẹtienede mi: “Nte afo emesida ini ke ukpepn̄kpọ ubon mbufo ke ini ke ini an̄wam mme andibuana ke ubon mbufo nditịm idem nnọ utom an̄wautom eke urua oro? Ndinam ntre ekeme ndinen̄ede nnyene ufọn. (2 Tim. 2:15) Enye ekeme ndin̄wam ndinam utom mmọ enyene ufọn onyụn̄ on̄wụm mfri. Ke ini ke ini, mbufo ẹmekeme ndisio ofụri ini ukpepn̄kpọ nnịm nnọ utọ ntịmidem oro. Ediwak ini mbufo ẹmekeme ndinam n̄kpọ mban̄a ikpehe utom an̄wautom ke mbio mbio nneme ke utịt ukpepn̄kpọ ubon m̀mê ke ini efen ke urua.” Nte ubon fo ẹma ẹdomo emi ẹse?
14 Ẹka Iso Ndinam N̄kọri: Ke nneme emi, nte mbufo ẹmekụt ikpehe oro ubon mbufo anamde ọfọn? Ẹtoro mmọ, ẹnyụn̄ ẹdomo ndika iso nnam n̄kọri ke afan̄ emi. Edieke mbufo ẹkụtde uwak ikpehe oro oyomde ẹnam n̄kọri, ẹbem iso ẹmek kiet m̀mê iba ẹnam n̄kpọ ẹban̄a. Ke mmọ ẹma ẹkekabade ẹdi ubak edinam eke spirit ofụri ini mbufo, ẹnam n̄kpọ ẹban̄a kiet m̀mê iba efen. Ẹwụt eti ibuot, ẹkûduọk idotenyịn. (Phil. 4:4, 5) Ndinam eti ndutịm eke spirit nnọ ubon mbufo enen̄ede oyom ukeme, edi ukeme oro enen̄ede odot, sia Jehovah ọn̄wọn̄ọ ọnọ nnyịn ete: “Ama onyụn̄ edi owo eke etịmde ndinịm ido, nyowụt enye edinyan̄a eke Abasi anyan̄ade.”—Ps. 50:23.