Ndidu Uwem Ekekem ye Uyakidem Nnyịn
1 Edide afo ana baptism ndondo emi m̀mê akana ke anyan ini emi ekebede, eyedi afo osụk eteti akpan edinam emi ke uwem fo. Baptism nnyịn idịghe utịt, edi edi ntọn̄ọ utom uyakidem nnọ oro ekemede ndibịghi ke nsinsi. (1 John 2:17) Nso ke ndidu uwem ekekem ye uyakidem nnyịn abuana?
2 Tiene Uwụtn̄kpọ Christ: Ke Jesus ama akana baptism, enye ama ‘ọtọn̄ọ ndikpep owo n̄kpọ,’ ọkwọrọ “eti mbụk Ubọn̄ Abasi.” (Luke 3:23; 4:43) Kpasụk ntre, ke ima ikayarade uyakidem nnyịn nnọ Jehovah ke ndina baptism, nnyịn ima ikabade idi mme asan̄autom eti mbụk oro ẹdoride ubọk. Ke adan̄aemi oyomde ekese ini ye ukeme man inyene mme n̄kpọ udu uwem, akpan utom nnyịn edi utom ukwọrọikọ Christian. (Matt. 6:33) Utu ke ndidomo ndikọ inyene m̀mê ndiwọrọ etop, mbon oro ẹyakde idem ẹnọ Abasi ẹdomo ‘ndisọn̄ọ n̄kpono itieutom mmọ’ nte apostle Paul okokponode. (Rome 11:13) Nte afo omowụt esịtekọm aban̄a ifet oro afo enyenede ndinam n̄kpọ Jehovah onyụn̄ enen̄ede esịn ofụri ukeme ke utom esie?
3 Ukem nte Jesus, ana nnyịn ‘in̄wana ye Satan.’ (Jas. 4:7) Ke Jesus ama akana baptism, Satan ama odomo enye, kpasụk ntre ke Satan an̄wana mfịn ye mme asan̄autom Jehovah oro ẹma ẹkeyak idem ẹnọ. (Luke 4:1-13) Sia idude ke ererimbot Satan, ana nnyịn inọ idem nnyịn ntụnọ, ifep n̄kpọ ekededi oro ekemede ndisabade m̀mê ndibiat ekikere nnyịn. (N̄ke 4:23; Matt. 5:29, 30) Ẹteme mme Christian ẹte ke mmọ “ikemeke nditiene ndia n̄kpọ ke okpokoro Ọbọn̄, nnyụn̄ ndia ke okpokoro mme demon.” (1 Cor. 10:21) Emi oyom nnyịn ikpeme ibiọn̄ọ idiọk usụn̄ unọ idem inemesịt, ndiọi nsan̄a, ye mme n̄kpọndịk oro ẹdude ke Intanet. Oyom nnyịn ikpeme idem n̄ko ye n̄wed mbon nsọn̄ibuot. Ndikpeme idem ke mme n̄kpọ emi ye mme n̄kari Satan efen ayan̄wam nnyịn ndidu uwem ekekem ye uyakidem nnyịn.
4 Da Mme N̄kpọ Oro Abasi Ọnọde Nam N̄kpọ: Man an̄wam nnyịn idu uwem ekekem ye uyakidem nnyịn, Jehovah ọnọ un̄wam ebe ke Ikọ esie ye esop Christian. Nam edikot Bible ye edibọn̄ akam nnọ Jehovah ẹdi ubak ndutịm fo eke usen ke usen. (Josh. 1:8; 1 Thess. 5:17) Dat esịt ndibuana ke mme mbono esop. (Ps. 122:1) Dụk nsan̄a ye mbon oro ẹbakde Jehovah ẹnyụn̄ ẹnịmde item esie.—Ps. 119:63.
5 Ye un̄wam Abasi, afo emekeme ndidu uwem ekekem ye uyakidem fo nnọ Jehovah onyụn̄ enyene idatesịt otode edinam n̄kpọ esie ke nsinsi.—Ps. 22:26, 27; Phil. 4:13.