Kwọrọ Ikọ Nyụn̄ Nọ Ọyọhọ Ikọ Ntiense
1 Nte “ọbọn̄ ye etubom,” Jesus ama etịm mme mbet esie idem ọnọ akwa utom ukwọrọikọ oro okodude ke iso. (Isa. 55:4; Luke 10:1-12; Utom 1:8) Apostle Peter eketịn̄ ntem aban̄a utom oro Jesus ọkọdọn̄de mmọ: “Abasi onyụn̄ ọnọ nnyịn uyo ete ikwọrọ inọ mbio-obio, inyụn̄ idi ntiense ite Emi edi Enye emi Abasi ekenịmde ete edi Ebiereikpe ọnọ mme odu uwem ye mme akpa-n̄kpa.” (Utom 10:42) Nso isịne ke ndinọ ọyọhọ ikọ ntiense?
2 Nnyịn imekeme ndikpep ediwak n̄kpọ ke ikerede iban̄a uwụtn̄kpọ apostle Paul. Ke ini okosobode ye mbiowo ke Ephesus, enye ama eti mmọ ete: “N̄kefeheke ndisian mbufo se ededi eke odorode mbufo n̄kpọ, mma nnyụn̄ n̄kpep mbufo n̄kpọ an̄wa-an̄wa, nnyụn̄ n̄kpep mbufo ke ufọk ke ufọk, n̄kwọrọ nnọ mme Jew ye mme Greek [“nnọ ọyọhọ ikọ ntiense,” NW], nte mmọ ẹkabade esịt ẹtiene Abasi, ẹnyụn̄ ẹbuọt idem ye Ọbọn̄ nnyịn Jesus Christ.” Okposụkedi okosobode mme idomo, Paul ama anam utom ọkpọsọn̄ ndikwọrọ eti mbụk nnọ adan̄a ediwak owo nte ekekeme. Enye ikoyụhọke ye edinọ mme andikpan̄ utọn̄ nnọ enye mme akpan ukpepn̄kpọ kpọt, edi enye ama anam utom ọkpọsọn̄ nditịn̄ “ofụri uduak Abasi” nnọ mmọ. Man anam emi, enye ama enyịme ndisịn̄ede idem nnyụn̄ nnam n̄waidem. Enye ama adian do ete: “Mbatke uwem mi ke n̄kpọ, man n̄keme ndifehe mbuba mi mma, nnyụn̄ nnam utom oro Ọbọn̄ Jesus ọnọde mi, ete n̄kwọrọ [“nnọ ọyọhọ ikọ ntiense mban̄a,” NW] gospel mfọn Abasi.”—Utom 20:20, 21, 24, 27.
3 Didie ke nnyịn ikeme ndikpebe uwụtn̄kpọ Paul mfịn? (1 Cor. 11:1) Ebe ke ndidụn̄ọde nyom mme ubon oro ẹdotde idem ke ini nnyịn isobode mme idomo, ke ndidomo ndida eti mbụk nsịm mme owo ẹtode kpukpru orụk ye usem, ye ke ndisịn ifịk nnam udọn̄ oro nnyịn ikụtde ọkọri. (Matt. 10:12, 13) Emi oyom ini ye ukeme, onyụn̄ oyom ima mme owo.
4 Nte Afo Emekeme Ndinam Utom nte Asiakusụn̄ Unọ Un̄wam? March ye April ẹkeme ndidi eti ini afo ndinọ ọyọhọ ikọ ntiense ebe ke ndinam utom usiakusụn̄ unọ un̄wam. Ekedi n̄kpọ nsịnudọn̄ didie ntem ndikụt ediwak owo ẹsịnde san̄asan̄a ukeme ndinam utom usiakusụn̄ unọ un̄wam isua oko!
5 Nsịnudọn̄ oro esop Jehovah ọkọnọde ama edemede udọn̄ eyenete an̄wan kiet edide isua 80 emi ọkọdọn̄ọde ediwak udọn̄ọ. Enye ekewet ete: “Ama edemede udọn̄ oro n̄kenyenede ke anyan ini, onyụn̄ anam mi n̄kere ke ana nnam utom usiakusụn̄ unọ un̄wam ke nsụhọde n̄kaha ini kiet efen.” Enye ama ebiere ndinam emi ke March. Enye ọkọdọhọ ete: “Akpa n̄kpọ oro n̄kanamde ekedi ndisụhọde ntie nnyụn̄ mbat se iditakde. Mma nneme n̄kpọ emi ye eyen mi an̄wan sia ndiyomde un̄wam esie. Enye ama anam idem akpa mi ke ndika n̄kọbọ n̄wed eben̄e usiakusụn̄ esiemmọ.” Ke ọfiọn̄ oro, eyenete emi ama abiat hour 52 ke utom ukwọrọikọ. “Mma nsibọn̄ akam ediwak ini mben̄e Jehovah nte afiak ọnọ mi odudu ke ini odudu mi okụrede. Ke utịt ọfiọn̄ oro, esịt ama enen̄ede enem mi, mma nnyụn̄ n̄kop uyụhọ, mma n̄kọm Jehovah ediwak ini ke ndikan̄wam mi. Nyafiak ndomo ndinam utom emi.” Inem inem ifiọkutom esie ekeme ndisịn udọn̄ nnọ mbon en̄wen oro ẹnen̄erede ẹyom ndinam utom usiakusụn̄ unọ un̄wam kpa ye oro ẹdọn̄ọde idiọk idiọk.
6 Eyenete oro ẹkesiode ke utom ke unana idotenyịn ama ada ifet oro anam utom usiakusụn̄ unọ un̄wam. Ke ọfiọn̄ oro, enye ama enen̄ede esịn ifịk ke utom ukwọrọikọ, ndien etisịm utịt ọfiọn̄ oro, enye ama ọtọn̄ọ obufa ukpepn̄kpọ Bible. Ke ekerede aban̄a obufa ukpepn̄kpọ Bible oro, enye ama ọdọhọ ete: “Nso ọfiọn̄ oro ọnọde utịp ke emi ekedi ntem!” Enye akadat esịt didie ntem ndinyene ndausụn̄ ye un̄wam Jehovah! Ih, Jehovah ama ọdiọn̄ eyenete emi uwak uwak ke san̄asan̄a ukeme oro enye ekesịnde ke utom ukwọrọikọ, ndien enye ọyọdiọn̄ fi ntre.—Mal. 3:10.
7 Ndinam usiakusụn̄ unọ un̄wam idịghe mmemmem n̄kpọ inọ ediwak owo. Nte ededi, kpa ye mme mbiomo ẹsan̄ade ye utom idịbi udia ye mbiomo ubon ọkọrọ ye mme ọkpọkpọ mfịna, ediwak nditọete ẹma ẹkeme ndinam usiakusụn̄ unọ un̄wam. Ndinọ ọyọhọ ikọ ntiense esiwak ndibuana ndisịn ndusụk ini ye odudu nnyịn, edi mme ufọn ẹtode emi inyeneke mbiet.—N̄ke 10:22.
8 March ye April ẹdi eti ini ndinam usiakusụn̄ unọ un̄wam. March enyene utịturua ition. Ndida mmọ emi ye mme mbubịteyo nnam n̄kpọ nte ọfọnde ekeme ndinam mbon emi ẹnamde utom idịbi udia ofụri ini ẹnam usiakusụn̄ unọ un̄wam. Ke adianade do, afo emekeme ndida mme ini nduọkodudu ke ọfiọn̄ April nnam. Ndusụk owo ẹkeme ndinyene nduọkodudu ke ufọkn̄wed ye ke utom idịbi udia, emi ekemede ndiyak mmọ ẹsịm hour 50 oro ẹyomde. Man anam ndutịm ndisịn hour 50 ke an̄wautom ke March m̀mê April, nte afo emekeme ndida uwụtn̄kpọ ndutịm usiakusụn̄ unọ un̄wam oro ẹsịnde ke ibuotikọ emi? Neme ye mbon efen ban̄a ndutịm fo; nte eyịghe mîdụhe emi eyesịn udọn̄ ọnọ ndusụk owo nditiene fi n̄ka ukwọrọikọ. Edieke afo mûkemeke ndinam utom usiakusụn̄ unọ un̄wam, nịm mme akpan utịtmbuba ke mme ọfiọn̄ emi, nyụn̄ sịn un̄wam nọ mbon oro ẹkemede ndisiak usụn̄. Nam ndutịm idahaemi ndisịn ini okponde ke utom ukwọrọikọ ke March ye April.
9 Wụt Esịtekọm Ban̄a Editi: Ke ini Editi ke kpukpru isua, esịtekọm ẹnyenede ẹban̄a ufak esinụk ediwak tọsịn owo ‘ndidep ifet’ ndụk utom usiakusụn̄ unọ un̄wam. (Eph. 5:15, 16) Ke isua oko ke Nigeria, mme asiakusụn̄ unọ un̄wam ke March ẹkedi 16,101, ndien ke April ẹkedi 13,487. Oro ama anam ibat ke ọfiọn̄ emi kiet kiet esịm 14,794 ke ẹbaharede ukem ukem. Men oro domo ye owo 4,837 oro ẹkenamde utom asiakusụn̄ unọ un̄wam ke ọfiọn̄ kiet kiet ke isua utom oro ke ẹbaharede ukem ukem. Ini Editi isua emi edi eti ini efen ndiwụt ata esịtekọm mban̄a uwa ufak Christ ebe ke ndisịn ini okponde ke utom an̄wautom.
10 Nte April 16 asan̄ade ekpere, kere se Editi ọwọrọde ọnọ fi. Kere ban̄a mme n̄kpọntịbe oro ẹkedade ẹkesịm n̄kpa Christ ye se ikenen̄erede ifịna enye. Kere n̄ko ban̄a idatesịt oro ẹkenịmde Jesus ke iso ye nte emi akan̄wamde enye ndiyọ utọ esuene oro. Kere ban̄a itie oro enye enyenede idahaemi nte Ibuot esop, esede aban̄a utom ukwọrọikọ ye edinam mbet. (1 Cor. 11:3; Heb. 12:2; Edi. 14:14-16) Nyụn̄ wụt esịtekọm ban̄a kpukpru se Christ akanamde ebe ke ndinyene ọyọhọ ebuana ke utom ukwọrọikọ nte idaha fo ayakde.
11 Sịn Udọn̄ nọ Mbon En̄wen Ndinọ Ọyọhọ Ikọ Ntiense: Mbiowo ye mme asan̄autom unamutom ẹdu ke eti idaha ndisịn udọn̄ nnọ mbon en̄wen, ebe ke ndidụk utom usiakusụn̄ unọ un̄wam. Ke ini ẹnamde utom ye mme asuanetop ke an̄wautom ye ke ini ẹnamde utom ubọkerọn̄, mmọ ẹnyene nti ifet ndin̄wam mbon efen ẹnyene ọyọhọ ebuana ke akpan utom emi. Kpukpru nnyịn ikpakam isịn n̄kpọ emi ke akam, ntem isịnde ọkpọsọn̄ ukeme ndinọ ọyọhọ ikọ ntiense.
12 Ke adan̄aemi kpukpru mbiowo ye mme asan̄autom unamutom ẹdidianade kiet ye ndutịm esop ndisịn ini okponde ke utom ukwọrọikọ ke ọfiọn̄ March ye April, esenyịn utom akpan akpan ekpenyene ndinam ndutịm kaban̄a utom ukwọrọikọ. Enye ekpenyene ndinam ndutịm kaban̄a itie, usen, ye mme ini oro ẹdifọnde ye ediwak mme asuanetop nnyụn̄ ndọhọ ẹtọt emi kpukpru ini. Ẹkeme ndinam ndutịm ndisobo ke nsio nsio ini ke usen kiet, ẹnọde kpukpru owo ke esop ifet ndibuana ke nsio nsio ikpehe unọ ikọ ntiense. Mmọ emi ẹkeme ndisịne ndinam utom ke itie mbubehe, ke efak, ke ufọk ke ufọk, ndinam mme mfiakn̄ka, ye unọ ikọ ntiense urụk ukopikọ. Ke adianade do, enye ekpenyene ndinam ndutịm man mme n̄wed, magazine, ye efakutom ẹdu ẹkem ke mme ọfiọn̄ oro.
13 Ẹdinọ n̄wed Ifiọk ke March ye uduak nditọn̄ọ ukpepn̄kpọ Bible. Nti ekikere ke ndinọ n̄wed Ifiọk ẹdu ke esịne-esịt Utom Obio Ubọn̄ Nnyịn eke January 2002. Ẹdinọ magazine Enyọn̄-Ukpeme ye Awake! ke April. Domo ndida mme ekikere oro ẹnọde ke “Se Ẹkpetịn̄de Ẹban̄a Mme Magazine” nnam n̄kpọ. Kpukpru owo ẹkpenyene ndida ini ntịm idem nte ọfọnde man ẹkpenọ ọyọhọ ikọ ntiense.
14 Ẹdiọn̄ nnyịn didie ntem ke ndinam utom ke idak ndausụn̄ Ibuot esop, kpa Christ Jesus, ndinyụn̄ nnyene ifet ndibuana eti mbụk ye mbon en̄wen! Nte ọfiọn̄ March ye April ẹsan̄ade ẹkpere, ẹyak nnyịn ifiak idomo ndinam mmọ ẹdi mfọnn̄kan ọfiọn̄ oro akanam inyenede nte nnyịn inamde ewụhọ Christ ndikwọrọ ikọ nnyụn̄ nnọ ọyọhọ ikọ ntiense.
[Ekebe ke page 4]
Nsio Nsio Usụn̄ Ndidiomi Usiakusụn̄ Unọ Un̄wam ke March ye April 2003
Usen Hour
Monday 1 2 — — 2 —
Tuesday 1 — 3 — — —
Wednesday 1 2 — 5 — —
Thursday 1 — 3 — — —
Friday 1 2 — — — —
Saturday 5 4 3 5 6 7
Sunday 2 2 3 2 2 3
March 56 56 54 55 50 50
April 50 50 51 53 — —
Ewe ke otu ndutịm emi edifọn ye afo?