“Owo eke Ekemede Ndibọ, Yak Ọbọ”
1 Isan̄ kiet, ke ini enye ekenyenede nneme ye mme mbet esie aban̄a ndọ, Jesus ama ọdọhọ ke itie unana ndọ edi ‘enọ.’ Ekem enye ama ọdọhọ ete: “Owo eke ekemede ndibọ, yak ọbọ.” (Matt. 19:10-12) Ndusụk isua ke ukperedem, apostle Paul ama ewet aban̄a mme ufọn itie unana ndọ onyụn̄ esịn udọn̄ ọnọ mbon en̄wen ete ẹkpebe uwụtn̄kpọ imọ ke nditre ndidọ ndọ. (1 Cor. 7:7, 38) Ediwak owo mfịn ‘ẹbọ’ itie unana ndọ ẹnyụn̄ ẹbọ mme ufọn esie. Nso idi ndusụk ufọn emi?
2 Ndinam Utom ‘ye Unana N̄kpọ Ndifịna’: Paul ama ọfiọk ke itie unana ndọ ama ọnọ imọ ifet ndinam n̄kpọ Jehovah ‘ye unana n̄kpọ ndifịna’ imọ. Kpasụk ntre mfịn, eyenete eren oro mîdọhọ ndọ ekeme ndinyanade mbịne Ufọkn̄wed Unọ Mme Asan̄autom Ukpep, ndien esikam enen̄ede emem utom ọnọ owo oro mîdọhọ ndọ ndidụk utom usiakusụn̄, ndikpep usem en̄wen, ndiwọrọ n̄ka ebiet oro udọn̄ okponde akan, ndinam utom ke Bethel, m̀mê ndikeme ndinyanade mbịne mme san̄asan̄a ifetutom en̄wen. Enye ekeme ndinyene ini ye ifet oro okponde akan ọnọ ntotụn̄ọ ukpepn̄kpọ idemowo ye editie n̄kere nnyụn̄ nnyene nneme ye Jehovah ke akam ofụri esịt. Owo oro mîdọhọ ndọ esiwak ndinyene ini ndida n̄n̄wam mbon en̄wen. Kpukpru utọ edinam emi ẹdi ke “ufọn” owo oro.—1 Cor. 7:32-35; Utom 20:35.
3 Utọ utom oro ẹnamde ẹnọ Abasi mi oro n̄kpọ mîfịnake ada ekese utịp edi. Ke ama okodu isua 27 ke Kenya, eyenete an̄wan kiet oro mîdọhọ ndọ ekewet ete: “Mma nnyene ata ediwak ufan ye ekese utom ndinam! Nnyịn ikesinam n̄kpọ ọtọkiet ima isinyụn̄ ika ikese kiet eken. . . . Ami mma n̄keme ndida udiana ifụre oro n̄kenyenede ye ifet oro itie unana ndọ ọnọde ke ndisịn idem ke utom ukwọrọikọ, ndien emi amada akwa idatesịt ọsọk mi.” Enye ama adian do ete: “Ke ofụri isua oro ẹbede itie ebuana mi ye Jehovah otụn̄ọ.”
4 Ndibọ Enye: Jesus ọkọdọhọ ke uduak edibọ enọ itie unana ndọ ekpedi “kaban̄a Obio Ubọn̄ Heaven.” (Matt. 19:12) Ukem nte enọ efen ekededi, ẹkpenyene ndida itie unana ndọ nnam n̄kpọ nte odotde man ọnọ idatesịt ye mme ufọn. Ebede ke ndida mme ifet oro itie unana ndọ ọnọde nnam n̄kpọ nte odotde, onyụn̄ ebede ke ndiberi edem ke Jehovah kaban̄a ọniọn̄ ye ukeme, ediwak mbon oro mîdọhọ ndọ ẹmekụt ufọn edibọ enọ emi.