Ndinam Ẹdiọn̄ọ Enyịn̄ Abasi
1. Nso odudu ke edikpep mban̄a ọkpọkpọ enyịn̄ Abasi ekeme ndinyene ke idem mme owo?
1 Afo akanam n̄kpọ didie ke akpa ini oro afo ekekpepde aban̄a enyịn̄ Abasi? Nte ediwak owo ẹsinamde n̄kpọ edi ukem ye eke n̄wan kiet oro ọkọdọhọde ete: “Ke ini n̄kokụtde enyịn̄ Abasi ke akpa ini ke Bible, mma ntua eyet. Ifiọk oro nte ke mmekeme ndinen̄ede mfiọk nnyụn̄ n̄kot ọkpọkpọ enyịn̄ Abasi ama enen̄ede otụk mi.” Ye enye, ndidiọn̄ọ enyịn̄ Abasi ekedi akpan usio-ukot ke ndifiọk Jehovah nte owo nnyụn̄ n̄keme ndinyene itie ebuana ye enye.
2. Ntak oyomde nnyịn isọsọp ikpep mbon en̄wen iban̄a Jehovah?
2 Ntak Ẹnamde Ẹdiọn̄ọ Enye? Ẹbuan enyịn̄ Abasi ye mme edu, mme uduak, ye mme edinam esie. Ẹbuan enye n̄ko ye edinyan̄a. Apostle Paul ekewet ete: “Owo ekededi eke edisemede okot enyịn̄ Jehovah ọyọbọhọ.” Edi Paul ama ọkọk ibuot ete, “mmọ ẹdinam didie ẹseme ẹkot Enye” ibọhọke mmọ ẹbem iso ẹkpep ẹban̄a Jehovah ẹnyụn̄ ẹbuọt idem ke enye? Ntem, oyom mme Christian ẹsọsọp ẹnam mbon en̄wen ẹfiọk enyịn̄ Abasi ye kpukpru se enyịn̄ oro adade aban̄a. (Rome 10:13, 14) Nte ededi, akam odu n̄kponn̄kan ntak emi anade ẹnam ẹfiọk enyịn̄ Abasi.
3. Nso idi akakan ntak oro anamde nnyịn ikwọrọ ikọ?
3 Ke iduọk isua 1920, ikọt Abasi ẹma ẹfiọk ẹto N̄wed Abasi eneni ofụri ererimbot oro abuanade unen itie edikara Abasi ye edinam enyịn̄ esie asana. Mbemiso Jehovah osobode ndiọi owo efep man etre esuene oro ẹsuenede enyịn̄ esie, ana ẹfiọk akpanikọ aban̄ade enye “ke ofụri ererimbot.” (Isa. 12:4, 5; Ezek. 38:23) Mmọdo, akakan ntak oro anamde nnyịn ikwọrọ ikọ edi man itoro Jehovah an̄wan̄wa inyụn̄ inam enyịn̄ esie asana ke iso ofụri ubonowo. (Heb. 13:15) Ima oro imade Abasi ye mbọhọidụn̄ oyonụk nnyịn ndibuana ọyọhọ ọyọhọ ke utom emi Abasi ọnọde mi.
4. Didie ke ẹda enyịn̄ Abasi ẹdiọn̄ọ Mme Ntiense Jehovah?
4 ‘Ikọt Enyịn̄ Esie’: Ke 1931 nnyịn ima ida enyịn̄ oro Mme Ntiense Jehovah, ikere. (Isa. 43:10) Toto ke ini oro, ikọt Abasi ẹmenam ẹdiọn̄ọ enyịn̄ Abasi tutu esịm udomo oro n̄wed Proclaimers, page 124, ọdọhọde ete: “Ke ofụri ererimbot, ẹsisọsọp ẹdiọn̄ọ owo ekededi emi okotde enyịn̄ Jehovah nte kiet ke otu Mme Ntiense Jehovah.” Nte ẹdiọn̄ọ fi ntre? Esịtekọm oro iwụtde iban̄a eti ido Jehovah ekpenyene ndinụk nnyịn ‘nditoro enyịn̄ esie,’ itịn̄de iban̄a enye ke kpukpru idaha oro odotde.—Ps. 20:7; 145:1, 2, 7.
5. Didie ke edu uwem nnyịn abuana ke edikere enyịn̄ Abasi?
5 Nte ‘ikọt enyịn̄ esie,’ ana nnyịn imụm mme idaha esie ikama. (Utom 15:14; 2 Tim. 2:19) Se mme owo ẹsiwakde ndibem iso n̄kụt ke idem Mme Ntiense Jehovah edi nti edu mmọ. (1 Pet. 2:12) Tutu amama nnyịn idiyomke ndisabade enyịn̄ Abasi ebe ke ndibiat mme edumbet esie m̀mê ndisịk utuakibuot esie nnịm ke udiana itie ke uwem nnyịn. (Lev. 22:31, 32; Mal. 1:6-8, 12-14) Utu ke oro, usụn̄ uwem nnyịn akpakam owụt nte ke nnyịn imama ifet edikere enyịn̄ Abasi!
6. Nso ifet ke nnyịn ikeme ndinyene idahaemi ye ke nsinsi-nsinsi?
6 Mfịn, nnyịn imokụt nte ikọ Jehovah emi osude: “Enyịn̄ mi oyokpon ke otu mme idụt ọtọn̄ọde ke edem usiaha-utịn tutu esịm ke edem [usoputịn].” (Mal. 1:11) Ẹyak nnyịn ika iso ndinam ẹdiọn̄ọ akpanikọ aban̄ade Jehovah inyụn̄ ‘ikọm edisana enyịn̄ esie ke nsinsi-nsinsi.’—Ps. 145:21.