Obufa Ndutịm Mbono Circuit
1 Eteufọk nnyịn ama ebem iso etịn̄ ete ke mme mbet imọ ẹyekụt ukụt. (Matt. 24:9) Didie ke nnyịn ikpese mme idomo? Nso idin̄wam nnyịn ndiyọ ukụt? Ndutịm mbono circuit eke isua utom 2004 ọyọbọrọ mme mbụme emi. Ibuotikọ edi “Edat Esịt ke Idotenyịn; Ẹnyene Ime ke Ukụt.”—Rome 12:12.
2 Nneme Iba: Akpa nneme oro ibuotikọ edide, “Ẹn̄wụm Mfri ye Ime,” oyowụt mme usụn̄ oro nnyịn in̄wụmde mfri. Ẹyenam ndụn̄ọde ye ediwak mme asuanetop ke nte mmọ ẹkwọrọde ikọ ẹnyụn̄ ẹkpepde mme owo n̄kpọ ye usọp usọp ini ke ekikere. Oyoyom mme ete ye eka akpan akpan ẹnọ n̄kpan̄utọn̄ ke ikpehe oro, “Ke Ini Jehovah Ọnọde Nnyịn Ntụnọ,” emi ẹdinemede nte mme ete ye eka ẹkemede ndikọk ibuot ye nditọ mmọ. Akpatre etịn̄ikọ ke nneme oro oyowụt se anade nnyịn inam man ibiọn̄ọ ererimbot nditap nnyịn nnyụn̄ nnam nnyịn inana mfri.—Mark 4:19.
3 “Ẹfehe Mbuba ye Ime” edi ibuotikọ udiana nneme. Enye ayanam an̄wan̄a nte usụn̄ uwem nnyịn ebietde mbuba. Ntak emi oyomde nnyịn ifehe nte ẹtemede? Didie ke nnyịn ikeme ndikụt unen ke ndikpọnọde kpukpru mbiomo nnịm n̄kan̄ kiet, nnyụn̄ ntre ndikpa mba ke mbuba uwem? Ekemini item N̄wed Abasi oro ẹdinọde ayan̄wam kpukpru nnyịn ndika iso mfehe mbuba ye ime.
4 Ime Anam Ẹnyene Unyịme Abasi: Utịn̄ikọ oro mme esenyịn oro ẹsan̄ade-san̄a ẹdinọde ọyọsọn̄ọ mbuọtidem mbon oro ẹkopde ẹnyụn̄ ẹdade mme item emi ẹsịn ke edinam. Kiet ke otu ibuotikọ esenyịn district edi “Ime Ada Esịm Idaha Oro Ẹnyịmede.” Utịn̄ikọ an̄wa ọyọbọrọ mme mbụme emi: Mme idụt ẹkpedori enyịn ke enyịn̄ anie, ndien ndinam ntre abuana nso? Akpatre utịn̄ikọ oro, “Ẹdida Ime Ẹbọ Ukpọn̄ Mbufo Ẹda Ẹnyene,” oyowụt nte Jesus ekekemede ndiyọ ukwan̄ikpe ye unana edikop idiọkesịt.
5 Ti ndimen n̄wed Ufọkn̄wed Utom ye Enyọn̄-Ukpeme fo oro ẹdikpepde urua oro ndi. Wet mme akpan n̄kpọ man an̄wam fi owụk ntịn̄enyịn, man okponyụn̄ ada anam n̄kpọ ke ini iso. Ẹyefiak ẹdụn̄ọde ndutịm emi ke esop ke ini iso.
6 Edi Jehovah ke idemesie etem ọkpọmiọk udia eke spirit emi. Ẹdi! Ẹdidia! Nnyịn iyọkwọ ke idatesịt edieke idude do man ibọ ufọn ito ofụri ndutịm emi.—Isa. 65:14.