Ekebe Mbụme

◼ Ndi ẹkpenyene nditọt ukpepn̄kpọ Bible ubon nnọ esop?

Edieke ete m̀mê eka oro edide Christian enịmde ukpepn̄kpọ Bible ubon ndien nditọ oro mînaha baptism ẹtiene ẹbuana, ete m̀mê eka oro ekeme nditọt ke n̄kpon n̄kaha hour kiet ke urua, mfiakn̄ka kiet, ye ukpepn̄kpọ Bible kiet ke ọfiọn̄. Emi edi ntem idem ọkpọkọm ẹsinịm ukpepn̄kpọ oro ebịghi akan hour kiet, awak akan ini kiet ke urua, m̀mê ẹsinịm ukpepn̄kpọ emi ye eyen kiet kiet.—Se n̄wed Utom Nnyịn, p. 104.

Edieke kpukpru owo ke ubon ẹdide Mme Ntiense oro ẹma ẹkena baptism, do owo ikpenyeneke nditọt ini ukpepn̄kpọ m̀mê nditọt ukpepn̄kpọ emi ke ibatutom an̄wautom (ibọhọke edi eyen ke osụk ekpep ọyọhọ n̄wed iba ke ama akana baptism). Emi edi koro ibatutom an̄wautom esop esinen̄ede owụt se ẹnamde ke edikwọrọ eti mbụk ye edikpep mbon oro mîdịghe mme asan̄autom Jehovah oro ẹyakde idem ẹnọ ẹnyụn̄ ẹnade baptism, akpanikọ Bible. (Matt. 24:14; 28:19, 20) Nte ededi, emi ke baba usụn̄ kiet inamde edinịm utọ ukpepn̄kpọ oro kpukpru ini okûdi akpan n̄kpọ.

Edi mbiomo mme ete ye eka oro ẹdide Christian ndikpep n̄kpọ ye nditọ mmọ. Mbon oro ẹyomde un̄wam ke nditọn̄ọ m̀mê ndifori ukpepn̄kpọ ubon mmọ ẹkeme ndiyom un̄wam nto mbiowo. Edieke mme idaha ẹnamde owụt ifiọk asuanetop efen ndinịm ukpepn̄kpọ Bible ye eyen Christian oro mînaha baptism emi abuanade ke esop oro, ẹkpenyene ndinam esenyịn oro etiede ibuot m̀mê esenyịn utom ọfiọk aban̄a emi. Edieke ẹnyịmede ẹnịm utọ ukpepn̄kpọ oro, ada ukpepn̄kpọ ekeme nditọt ukpepn̄kpọ emi kpa nte enye esitọtde ukpepn̄kpọ Bible efen ekededi.

Ndinọ nditọ ukpep nte Jehovah etemede abuana se ikande ini ye ukeme oro ẹsitọtde ke ibatutom an̄wautom. (Deut. 6:6-9; N̄ke 22:6) Ẹkpenyene nditoro mme ete ye eka ẹdide Christian ke mmọ ndibiom akwa mbiomo edikama nditọ mmọ ke “ntụnọ ye item Ọbọn̄.”—Eph. 6:4.