Ndutịm Ubon—Ukpepn̄kpọ Ubon
1 N̄kponn̄kan enọ oro afo nte ete m̀mê eka emi edide Christian ekemede ndinọ nditọ fo edi ndinam mmọ ẹma Jehovah ukem nte afo amade. Akpan ini emi ekemede ndinam emi edi “ke ini afo etiede ke ufọk fo” enịm ukpepn̄kpọ Bible ubon eke urua ke urua. (Deut. 6:5-7) Edide afo ọdọ owo emi enịmde ke akpanikọ, odu ke ubon oro kpukpru owo mîdịghe mme andinịm ke akpanikọ, m̀mê edi ete m̀mê eka oro ọbọkde nditọ ikpọn̄, afo emekeme ndin̄wam nditọ fo ẹsan̄a ẹkpere fi ẹnyụn̄ ẹsan̄a ẹkpere Jehovah ebe ke ndinịm ukpepn̄kpọ ubon kpukpru ini.
2 Nte Editọn̄ọde: Akpa n̄kpọ edi ndinam edi ido ndikpep n̄kpọ nte ubon. Edieke mûfiọkke ini oro ekpenịmde ukpepn̄kpọ emi, ntak mûnemeke emi ye ubon fo? (N̄ke 15:22) Edieke enyenede n̄kpri nditọ, emekeme ndinam mme ikpehe ukpepn̄kpọ emi ẹdi mbio mbio ke ofụri urua. Nam ndutịm oro ọfọnde akan nọ ikọtufọk fo. Nịm akpan ini nọ ukpepn̄kpọ emi ke ndutịm ubon fo, nyụn̄ biere nditiene ndutịm oro.
3 Nso ke afo ekeme ndikpep? Ndusụk owo ẹsikpep mme n̄kpọ oro ẹdikpepde ke Ukpepn̄kpọ N̄wed Esop m̀mê Ukpepn̄kpọ Enyọn̄-Ukpeme. Mbon en̄wen ẹsikpep mme n̄wed oro ẹnamde akpan akpan ẹnọ n̄kpri owo. Ete n̄kpri nditọ iba ọkọdọhọ ete: “N̄kpọ kiet oro esinamde ukpepn̄kpọ nnyịn edi akpan n̄kpọ udọn̄ ke urua ọnọ nditọ nnyịn edi nte ke nnyịn imesinam mme mbụk ẹtode N̄wed Mi eke Mme Mbụk Bible iwụt nte mbre. Udomo nte emi ẹsitụkde onyụn̄ an̄wan̄ade mmọ ẹdi akpan n̄kpọ ẹkan ibat ikpehe ekikere oro ikpepde.”
4 Kpep N̄kpọ Kpukpru Urua: Ẹkpenyene ndinịm ukpepn̄kpọ ubon kpukpru ini ndien kpukpru mme andibuana ke ubon ẹkpenyene ndiben̄e idem nnọ ukpepn̄kpọ emi ye idatesịt. Ẹkeme ndikpụhọ usen ye ini man ẹse ẹban̄a mme idaha oro owo mîkodorike enyịn iban̄a. Ekeme n̄ko ndiyom ẹkpụhọde ibuot nneme ke ndusụk idaha. Edi ukpụhọde ekededi oro ẹnamde ikpayakke ẹwọn̄ọde ke anyan ini ẹkpọn̄ ndutịm ukpepn̄kpọ oro ubon ama ekenyenyene. Eyenan̄wan emi odude ke ubon kiet ọdọhọ ete: “Edieke anade ẹkpụhọ ini ukpepn̄kpọ nnyịn, Papa esidian obufa ini ke enyịnusụn̄ ekebe ubịtn̄kpọ, man kpukpru nnyịn idiọn̄ọ ini ẹdinịmde enye.” Ọfọn didie ntem ndisịn utọ ukeme oro man ẹka iso ẹnyene ukpepn̄kpọ ubon ofụri ini! Nte afo akade iso ndikama nditọ mbufo “ke ntụnọ ye ke usụn̄ ukere n̄kpọ Jehovah,” afo owụt ke imama nditọ fo ye Ete nnyịn eke heaven.—Eph. 6:4.