N̄wam Mbon Oro “Ẹnyenede Eti Esịt”
1. Mmanie ke Jehovah atan̄ obok ọnọ idemesie ke eyo nnyịn?
1 Owo kiet kiet enyene edu oro otode ndamban̄a esịt esie. (Matt. 12:35) Bible etịn̄ aban̄a owo oro ‘ekọn̄ odude enye ke esịt.’ (Ps. 55:21) Ndusụk owo ẹdi mbon “ikpahesịt.” (N̄ke 29:22) Edi odu n̄ko mbon oro “ẹnyenede eti esịt ndinyene nsinsi uwem.” (Utom 13:48, NW) Ke eyo nnyịn, Jehovah ke atan̄ utọ mbon oro ẹnyenede eti esịt mi obok ọnọ idemesie. (Hag. 2:7) Didie ke nnyịn ikeme ndin̄wam mmọ ẹkabade ẹdi mme andituak ibuot nnọ Jehovah?
2. Nso ibuana ke utom edinam mbet oro ẹkedọn̄de nnyịn?
2 Tịn̄ Enyịn Nam Mfiakn̄ka: Ndinyene nnennen ekikere mban̄a edinam mme mfiakn̄ka edi akpan n̄kpọ man inam utom edinam mbet oro ẹkedọn̄de nnyịn. (Matt. 28:19, 20) Nte nnyịn imesisọp ifiak ibịne udọn̄ oro ikụtde? Nte nnyịn imesifiak ikese mbon oro ẹbọde n̄wed m̀mê ẹwụtde udọn̄ ke eti mbụk? Nte nnyịn imesisịn ukeme ndin̄wam mmọ ẹkọri ke n̄kan̄ eke spirit? Sia emi abuanade uwem, nnyịn ikpenyene ndikọri kpukpru udọn̄ oro ikụtde.
3. Nso ke ikpanam ke ima ikeneme nneme ye owo ke an̄wautom?
3 Ke adan̄aemi osụk etide nneme oro ekenemede ye owo oro enyenede udọn̄, kûbiat ini ndiwet enyịn̄ ye adres esie. Wet ibuotikọ oro ekenemede, mme itien̄wed ekededi oro okokotde, ye n̄wed oro ekenịmde. Ke oro ebede, sịn ofụri ukeme ndifiak n̄ka usọp usọp nte ekekeme.
4. Didie ke ikeme ndinam mme mfiakn̄ka oro ẹnyenede uforo?
4 Ndinam Mfiakn̄ka: Ke ini anamde mfiakn̄ka, ọfọn nditie ufan ufan nnyụn̄ n̄wụt ata ọkpọkpọ udọn̄ ke idem enyeneufọk. Nam nneme oro etie mmemmem mmemmem onyụn̄ ọkọn̄ọ ke N̄wed Abasi. Tịm edemede-owo-udọn̄ ibuotikọ Bible ndineme, ndien ke utịt mfiakn̄ka emi, bụp mbụme oro ekemede ndibọrọ ke mfiakn̄ka efen. Enen̄ede ọfọn nditre ndineni eneni oro mîdotke mban̄a mme ekikere oro mîkemke ye N̄wed Abasi, emi enyeneufọk ekemede ndinyene. Domo ndineme mme n̄kpọ oro mbufo mbiba ẹnyịmede.—Col. 4:6.
5. Nso ukeme ke asiakusụn̄ kiet ekesịn, ndien ye nso utịp?
5 Ndinam mme mfiakn̄ka oyom ukeme, edi mme utịp esie ẹsinọ uyụhọ. Asiakusụn̄ kiet ke Japan ama enịm utịt mbuba ndinam mme mfiakn̄ka efen efen kpukpru ọfiọn̄. Enye ama ọtọn̄ọ ndiwet enyịn̄ kpukpru mbon oro enye okosobode ke utom eke ufọk ke ufọk, ndien ke ufan̄ usen itiaba, enye ama esifiak ekese mmọ. Enye ama enen̄ede etịm se enye editịn̄de onyụn̄ anam utom esie ye ọyọhọ mbuọtidem ke etop oro enye ọkọnọde. Ke kiet ke otu mfiakn̄ka esie, enye ama ekeme nditọn̄ọ ukpepn̄kpọ ye owo oro ọkọdọhọde ete: “Mma nsiwak ndibịn mbon mbufo ẹnyọn̄ọ. Akpa edi emi akanam n̄kpan̄de utọn̄ nnọ mbufo.” Ima ima usụn̄ emi asiakusụn̄ oro ọkọsọn̄ọde eyịre ama ada mme utịp edi. Ke utịt ọfiọn̄ oro, enye ama ọtọt ukpepn̄kpọ Bible duop.
6. Ntak anade isọn̄ọ iyịre ke ndinam mfiakn̄ka?
6 Idaha mme owo ke ẹkpụhọde kpukpru ini. (1 Cor. 7:32) Ẹsinam ediwak mfiakn̄ka mbemiso ẹkụtde owo oro enyenede udọn̄ ke ufọk. Ebede ke ndinam mfiakn̄ka ye ntịn̄enyịn, nnyịn imekeme ndin̄wam mbon oro ẹnyenede eti esịt ndidụk usụn̄ nsinsi uwem.—Matt. 7:13, 14.