Tịm Nịm

Mme Ekikere Ẹnọde Kaban̄a Mme Nneme An̄wautom

Da mme ekikere oro ẹtienede mi tịm idem nọ nneme oro ọkọn̄ọde ke mme n̄wed oro ẹdinọde ke ọfiọn̄ emi.

San̄a Kpere Jehovah

“Ediwak mbon oro ẹnịmde Abasi ke akpanikọ ẹyema ndisan̄a n̄kpere enye. Ndi afo ama ọfiọk ke Abasi ọdọhọ nnyịn isan̄a ikpere imọ? [Kot James 4:8.] Ẹtịm n̄wed emi ndin̄wam mme owo ẹkot Bible mmọ man ẹsan̄a ẹkpere Abasi.” Kot ikpehe ekikere 1 ke page 16.

“Mfịn ukwan̄ikpe ẹyọyọhọ. Enye edi kpa nte ẹtịn̄de mi. [Kot Ecclesiastes 8:9b.] Ediwak owo ẹyịk m̀mê Abasi akam ekere aban̄a nnyịn. [Kot akpa udịmikọ iba ke ikpehe ekikere 4 ke page 119.] Ibuot n̄wed emi anam an̄wan̄a ntak emi Abasi ayakde ukwan̄ikpe odu ke ndusụk ini.”

Ẹdu ke Ukpeme!

“Ediwak owo ẹtịmede esịt ẹban̄a ikpọ mfịna ye mme enyene-ndịk n̄kpọntịbe oro ẹdide ọsọ n̄kpọ mfịn. [Siak n̄kpọntịbe kiet oro ẹdiọn̄ọde ke n̄kann̄kụk.] Ndi afo ama ọfiọk ke mme utọ n̄kpọntịbe oro ẹdi ubak idiọn̄ọ ofụri ekondo oro ẹwụtde ke ukara Abasi ọmọn̄ ọsọp ndikara isọn̄? [Bet ibọrọ. Ekem kot itie N̄wed Abasi oro odotde, utọ nte Matthew 24:3, 7, 8; Luke 21:7, 10, 11; m̀mê 2 Timothy 3:1-5.] Ediye uduot ekpri n̄wed emi eneme ntak enen̄erede edi akpan n̄kpọ nnyịn ndidu ke ukpeme idahaemi mban̄a se mme n̄kpọntịbe emi ẹdade ẹban̄a.”

“Ediwak owo mfịn ẹsifụhọ ẹban̄a mme ẹnyene-ndịk n̄kpọntịbe mîdịghe ẹsifụhọ ke ini ẹsobode n̄kpọ mmọn̄eyet. Ndusụk owo ẹsikere m̀mê nsinam Abasi mîsikpanke mme utọ n̄kpọ oro. Bible ọsọn̄ọ ọnọ nnyịn ke Abasi ọyọsọp ndinam n̄kpọ man osio ndutụhọ oro ubonowo ẹsobode efep. [Kot Ediyarade 14:6, 7.] Tịm fiọk se ubiereikpe Abasi ediwọrọde ọnọ ubonowo. [Kot 2 Peter 3:10, 13.] Ediye uduot ekpri n̄wed emi enyene ntọt efen efen ke akpan ibuot nneme emi.”

Ifiọk Oro Adade Osịm Nsinsi Uwem

“Edieke ẹkpedọhọde fi edidụn̄ ke utọ ediye n̄kann̄kụk emi, ndi akpama? [Wụt ndise oro odude ke page 4-5, nyụn̄ bet ibọrọ.] Kop se Ikọ Abasi ọdọhọde nte edide ukpọhọde edidara utọ uwem emi ke nsinsi. [Kot John 17:3.] N̄wed emi ayan̄wam fi enyene ifiọk oro adade esịm nsinsi uwem.” Diomi ndineme akpa ikpehe ekikere ition ke ibuot 1 ke ini efen emi edikade.

Kụbọde ka ndise oro odude ke page 188-189, ndien ke adade se ẹwetde ẹdian, bụp enyeneufọk mbụme emi: “Nte afo omodori enyịn ndidu uwem ke Paradise, ke ini ifiọk Abasi ediyọhọde isọn̄? [Bet ibọrọ. Ekem kot Isaiah 11:9.] N̄wed emi ayan̄wam fi ọfiọk se Bible etịn̄de aban̄a Paradise ye nte nnyịn ikemede ndidu do.” Diomi ndineme ikpehe ekikere 11-16 ke ibuot kiet ke ini efen emi edikade.

Kpep N̄kpọ to Akwa Andikpep

“Nte afo emekere ke ererimbot ọkpọfọn akan emi edieke mme owo ẹkpedade se ẹtịn̄de mi ẹsịn ke edinam? [Kot Matthew 7:12a. Ekem bet ibọrọ.] N̄wed emi ọdọn̄ọ ediwak ukpepn̄kpọ emi akakan andikpep oro akanam odude uwem ekekpepde.” Wụt mme ndise ye se ẹwetde ẹdian mmọ ke ibuot 17.

“Ata ediwak ete ye eka mfịn ẹsidomo ndikpep nditọ mmọ nti ido uwem. Ndi emekere ke emi edi akpan n̄kpọ? [Bet ibọrọ. Ekem kot Mme N̄ke 22:6.] Tịm fiọk ke ẹsịn udọn̄ ẹnọ mme ete ye eka nditọn̄ọ nnọ nditọ mmọ ukpep ke ini nditọ ẹdide ata n̄kpri. Ẹtịm n̄wed emi man an̄wam mmọ ndinam oro.” Wụt mme ndise ye se ẹwetde ẹdian mmọ ke ibuot 15, m̀mê 18.

“Ediwak ini, mme ete ye eka ẹsikop n̄kpaidem ẹban̄a mbụme oro nditọ mmọ ẹsibụpde. Ekeme ndisọn̄ ndibọrọ ndusụk mbụme oro, nte idịghe ntre? [Bet ibọrọ. Ekem kot Ephesus 6:4.] N̄wed emi ekeme ndin̄wam mme ete ye eka ndibọrọ mme mbụme oro nditọ mmọ ẹsibụpde mfịn.” Wụt ndise ifan̄ ye se ẹwetde ẹdian mmọ ke ibuot 11, 12 m̀mê 34 esịm 36.

Ediyarade—Ubọn̄ Ubọn̄ Ata-Utịt Esie Emekpere!

“Eyedi afo omokop aban̄a [siak mbụk n̄kpọntịbe]. Ke ini n̄kpọ mmọn̄eyet esịbede uwem owo omụhọ, ediwak owo ẹsikere m̀mê nso ndọn̄esịt ke ẹkeme ndinọ mme ubon mbon unọmọ emi. Afo ekere didie?” Bet ibọrọ. Ekem kụbọde ka page 299 nyụn̄ wụt ndise ediset ke n̄kpa oro ẹwụtde do. Ka iso ke ndidọhọ: “Ediwak owo ẹdu ke n̄kpaidem ndikop nte ke ẹyenam nti owo ye mme idiọk owo ẹfiak ẹdidu uwem ke Paradise isọn̄. [Kot Utom 24:15 nte ẹkotde ẹsịn ke ikpehe ekikere 9 ke page 297, ekem nam an̄wan̄a nte ẹkụtde ke ikpehe ekikere 10.] N̄wed emi eneme mme inem inem ntọt efen aban̄a uduak Abasi kaban̄a ini iso.

Akakan Owo Oro Akanam Odude Uwem

“Ke ini emi ediwak owo ke ẹkere ẹban̄a Jesus. Nte ededi, sia ata ekese ndiọi n̄kpọ ẹtịbede ke ofụri ererimbot, ndusụk owo ẹkeme ndiyịk m̀mê Jesus enen̄ede ekere aban̄a nnyịn. Afo ekere didie aban̄a oro?” Bet ibọrọ. Kụbọde ka ibuot 24, nyụn̄ tịn̄ ibio ibio ban̄a ntak oro Jesus ekedide isọn̄. Ekem kot John 15:13, nyụn̄ sọn̄ọ tịn̄ ban̄a ima ofụri esịt oro Jesus ekenyenede ọnọ mmọ efen.

“Ke ini owo etịn̄de aban̄a Jesus Christ, ediwak owo ẹsikere ẹban̄a enye nte nsekeyen m̀mê owo ufen oro oyomde ndikpa. Se mmọ ẹdiọn̄ọde ẹban̄a Jesus abuana sụk emana ye n̄kpa esie. Owo isiwakke ndinọ ntịn̄enyịn ke mme utịbe utịbe n̄kpọ oro enye eketịn̄de onyụn̄ anamde ke ini uwem esie. Se enye akanamde otụk kpukpru owo oro akanam ẹdude uwem ke isọn̄ emi. Ntak edi oro edide akpan n̄kpọ nnyịn ndikpep adan̄a ediwak n̄kpọ nte ikekeme mban̄a mme utịben̄kpọ oro enye akanamde ke ufọn nnyịn.” Kot John 17:3. Kụbọde ka akpa page ntọn̄ọikọ, nyụn̄ kot ọyọhọ ikpehe ekikere inan̄.

Nso ke Abasi Oyom Oto Nnyịn?

“Nte afo ekere ke Abasi okoyom nnyịn idu uwem ye mme utọ mfịna nte mmọ oro nnyịn isobode mfịn? [Bet ibọrọ. Ekem kot Matthew 6:10.] Nte afo amakam ekere aban̄a se Obio Ubọn̄ Abasi enen̄erede edi?” Kụbọde ka ọyọhọ ukpepn̄kpọ 6, nyụn̄ kot mme mbụme oro ẹbụpde ke ntọn̄ọ ukpepn̄kpọ oro. Tọn̄ọ ndineme ukpepn̄kpọ oro, mîdịghe diomi ndinam emi ke ini efen oro edikade.

“Kpa ye n̄kọri oro n̄kaowo ẹnamde mfịn, udọn̄ọ ye n̄kpa ke ẹka iso ndinam ubonowo ẹkop akwa mfụhọ ẹnyụn̄ ẹkụt ndutụhọ. Ndi ọmọfiọk se Jesus edinamde inọ mbon udọn̄ọ, mbonusọn̄, ye idem mme akpan̄kpa?” Bet ibọrọ. Edieke owo oro oyomde ibọrọ, kụbọde ka ọyọhọ ukpepn̄kpọ 5, nyụn̄ kot mbụme oro ẹbụpde ke ọyọhọ ikpehe ekikere 5-6. Neme ikpehe ekikere emi, mîdịghe diomi ndinam oro ke ini efen oro edikade.

Tuak Ibuot nọ Ata Abasi Kierakiet

“M̀mọ̀n̄ ke afo ekere ke nnyịn ikpaka ikoyom un̄wam man iyọ mme mfịghe uwem? [Bet ibọrọ. Ekem kot Rome 15:4.] Tịm fiọk ke N̄wed Abasi eke odudu spirit ọnọ nnyịn item, ndọn̄esịt, ye idotenyịn emi ekemede ndisọn̄ọ nnyịn idem ndiyọ n̄kpọsọn̄ idaha. N̄wed emi ọnọ nti ekikere ke nte nnyịn ikemede ndibọ akwa ufọn nto edikot Bible.” Sio mme akpan n̄kpọ inan̄ oro ẹdude ke page 30 wụt.

“Toto ke ini oro Jesus okodude ke isọn̄, ediwak oro ẹsibọn̄ akam ẹyom Obio Ubọn̄ Abasi. Ndi akanam emekere se Obio Ubọn̄ Abasi edinamde ọnọ ubonowo? [Bet ibọrọ. Ekem kot Daniel 2:44.] N̄wed emi anam an̄wan̄a se Obio Ubọn̄ Abasi edide, se enye edinamde, ye nte nnyịn ikemede ndibọ ufọn nto edinen ukara esie.” Wụt ndise oro odude ke page 92-93.