Ikpehe 8: Ndinịm Ukpepn̄kpọ Bible Oro Enyenede Uforo
Ndimen Nditọ Ukpepn̄kpọ N̄wụt Esop
1. Ntak ọfọnde ndineme akpan n̄kpọ kiet mban̄a esop Jehovah kpukpru urua ke ini ẹnịmde ukpepn̄kpọ Bible?
1 Uduak nnyịn ke ndinịm mme ukpepn̄kpọ Bible ikụreke ke ndikpep mme owo n̄kpọ edi abuana n̄ko ndin̄wam nditọ ukpepn̄kpọ ẹdi ẹdibuana ye esop Christian. (Zech. 8:23) Nnyịn imekeme ndikama ediye uduot ekpri n̄wed emi Mme Ntiense Jehovah—Mmanie ke Mmọ Ẹdi? Nso ke Mmọ Ẹnịm ke Akpanikọ? nnam emi. Nọ mbufa nditọ ukpepn̄kpọ Bible n̄wed emi kiet nyụn̄ sịn udọn̄ nọ mmọ ẹkot enye. Ke adianade do, da minit ifan̄ kpukpru urua neme akpan n̄kpọ kiet ban̄a esop Jehovah ke ini enịmde ukpepn̄kpọ Bible.
2. Didie ke afo ekeme ndisịn udọn̄ nnọ nditọ ukpepn̄kpọ Bible ẹdụk mme mbono esop?
2 Mme Mbono Esop: Akpan usụn̄ emi nditọ ukpepn̄kpọ Bible ẹsisan̄ade ẹdiọn̄ọ esop Abasi edi nditiene mbuana ke mme mbono esop. (1 Cor. 14:24, 25) Ntre, afo emekeme nditọn̄ọ nnam mmọ ẹmehe ye mme mbono esop emi ebe ke nditịn̄ mban̄a mme mbono esop ition eke urua ke urua, enemede aban̄a mbono esop kiet ke ini ukpepn̄kpọ kiet. Siak ibuotikọ utịn̄ikọ an̄wa efen oro editienede. Wụt mmọ itie oro ẹdikpepde ke Ukpepn̄kpọ Enyọn̄-Ukpeme ye ke Ukpepn̄kpọ N̄wed Esop. Tịn̄ ban̄a Ufọkn̄wed Utom Ukara Abasi ye Esoputom. Ke ini afo enyenede n̄kpọ ndinam ke ufọkn̄wed emi, afo emekeme ndinam n̄wụt mmọ nte afo edinamde. Neme mme akpan n̄kpọ oro ẹkenemede ke mme mbono esop. Da mme ndise ke mme n̄wed nnyịn n̄wam mmọ ẹfiọk se isikade iso ke mme mbono esop emi. Tọn̄ọ ke akpa ukpepn̄kpọ kot mmọ ẹditiene ẹbuana ke mme mbono esop emi.
3. Nso mme n̄kpọ ẹban̄ade esop Abasi ke ikeme ndineme ye nditọ ukpepn̄kpọ nnyịn?
3 Ke ini Editi, ikpọ ye n̄kpri mbono, ye ke ini edidi esenyịn circuit asan̄ade ekpere, da minit ifan̄ tịn̄ nọ mmọ ban̄a emi nyụn̄ demede mmọ udọn̄ nọ mme edinam emi. Sio ini nịm ndida mbọrọ mme utọ mbụme nte: Ntak emi ẹkotde nnyịn Mme Ntiense Jehovah? Ntak emi ikotde mme itie usopidem nnyịn Ufọkmbono Obio Ubọn̄? Nso idi utom mbiowo ye mme asan̄autom unamutom? Ẹsitịm utom ukwọrọikọ ye efakutom didie? Ẹsisan̄a didie ẹsio mme n̄wed nnyịn? M̀mọ̀n̄ ke ẹsida okụk ẹse ẹban̄a esop? Nso idi utom ọfis n̄kọk itieutom ye Otu Ukara ke ndise mban̄a utom emi?
4, 5. Didie ke mme vidio nnyịn ẹkeme ndinam mme owo ẹtetịm ẹdiọn̄ọ esop emi?
4 Mme Vidio Emi Ẹkpepde Owo N̄kpọ: Usụn̄ efen emi nditọ ukpepn̄kpọ Bible ẹkemede ndidi ndidiọn̄ọ utịbe utịbe esop Jehovah edi ndise mme vidio nnyịn. Wụt mmọ vidio To the Ends of the Earth, Our Whole Association of Brothers, ye United by Divine Teaching. Mmọn̄eyet idatesịt ama asiaha n̄wan kiet emi ekesibọde mme magazine ye mme n̄wed nnyịn ke isua ition ke ini enye ekesede vidio emi Jehovah’s Witnesses—The Organization Behind the Name. Enye ama enyene mbuọtidem ke idem Mme Ntiense oro ẹkesikade ẹbịne enye, edi ke enye ama ekese vidio oro, enye ama okụt ke imọ imekeme ndibuọt idem ye esop emi n̄ko. Ẹma ẹtọn̄ọ ukpepn̄kpọ ye enye, ndien ke urua oro eketienede, enye ama odụk mme mbono esop ke Ufọkmbono Obio Ubọn̄.
5 Ebede ke ndibiat minit ifan̄ kpukpru urua ye nditọ ukpepn̄kpọ nnyịn nnyụn̄ nda mme n̄kpọutom oro ẹnọde, nnyịn imekeme ndimen nditọ ukpepn̄kpọ Bible n̄wụt esop kiet oro Jehovah adade anam n̄kpọ mfịn.