Da Afan̄ Magazine Nam Udọn̄ Ọkọri
1. Didie ke nnyịn ikeme ndida afan̄ magazine nnam udọn̄ ọkọri?
1 Ediwak owo oro nnyịn isisobode ke an̄wautom ẹsikop inemesịt ke ini iwahade, ẹnyụn̄ ẹnyịme ndibọ mme n̄wed nnyịn edi ẹmen̄e ndikpep Bible ye nnyịn. Afan̄ magazine edi usụn̄ kiet oro ikemede ndida nnam udọn̄ mmọ ọkọri. Ke ini enịmde magazine, wet enyịn̄ ye adres owo oro, usenọfiọn̄ oro akakade, mme nsiondi oro enye ọkọbọde, itie N̄wed Abasi oro ekenemede, ye n̄kpọ ekededi oro okokụtde emi ekemede ndiwụt udọn̄ owo oro. Ke ini mbufa nsiondi magazine ẹdide, yom mme akpan n̄kpọ oro mbon afan̄ magazine fo ẹdimade, nyụn̄ neme mme akpan n̄kpọ oro ke ini awahade. (1 Cor. 9:19-23) Nte ini akade, n̄kpọ oro mmọ ẹkotde ke magazine nnyịn ekeme ndidemede mmọ udọn̄ onyụn̄ anam mmọ ẹyom ndifiọk mme n̄kpọ efen efen.
2. Ntak edide usọp usọp n̄kpọ mme owo ndiyom Jehovah idahaemi, ndien nso efen ke nnyịn ikeme ndinam man in̄wam mmọ?
2 Nte ededi, nnyịn imọfiọk ke ata ediwak owo idikabakede idi mme asan̄autom Jehovah n̄kukụre ke ndikot mme magazine ke idem mmọ. Sia edide usọp usọp n̄kpọ mme owo ndiyom Jehovah idahaemi, nso efen ke nnyịn ikeme ndinam man in̄wam mmọ? (Zeph. 2:2, 3; Edi. 14:6, 7) Nnyịn imekeme ndinam udọn̄ mmọ ọkọri ebe ke ndikot itie N̄wed Abasi oro iketịn̄de enyịn imek kpukpru ini oro nnyịn ikade ndinọ mme magazine.
3. (a) Didie ke nnyịn ikeme nditịm ediwak nneme oro ẹkotde itie N̄wed Abasi kiet? (b) Ibuot nneme ewe ke mme owo ke efakutom mbufo ẹsinen̄ede ẹnyene udọn̄ ẹban̄a?
3 Mme Nneme Oro Ẹkotde Itie N̄wed Abasi Kiet: Kere ban̄a mbon oro ẹdude ke afan̄ magazine fo, nyụn̄ tịm ediwak nneme oro edikotde itie N̄wed Abasi kiet ọnọ nsio nsio orụk owo etiene akpan udọn̄ oro mmọ ẹnyenede. (Phil. 2:4) Ke uwụtn̄kpọ, edieke owo ọkọduọkde owo ima esie ke n̄kpa ke ndondo emi, afo emekeme ndifiak n̄ka ediwak ini n̄keneme se Bible ọdọhọde aban̄a idaha mme akpan̄kpa ye idotenyịn ediset ke n̄kpa. Ẹkeme ndida mme n̄kpọ ẹdude ke n̄wed Reasoning, ke idak mme akpan ibuot nneme oro “Death” (N̄kpa) ye “Resurrection,” (Ediset ke N̄kpa) ntịm mme nneme oro ẹkotde itie N̄wed Abasi kiet. Mme nneme efen ẹkeme nditiene ke mme ibuot nneme emi ẹnyenede ebuana, utọ nte nte ẹdisiode udọn̄ọ, usọn̄, ye n̄kpa ofụri ofụri ifep. Akpan uduak edi ndiyom ibuot nneme oro owo emi amade nnyụn̄ n̄wụt enye sụn̄sụn̄ se Bible etịn̄de aban̄a emi.
4. Ntak edide akpan n̄kpọ ndinam n̄kpọ an̄wan̄a owo ke ini ikotde N̄wed Abasi inọ enye, ndien didie ke nnyịn ikeme ndinam ntre?
4 Nam An̄wan̄a: Okposụkedi ẹsiyomde mme utọ nneme emi ẹdi mmemmem ye mbio mbio, oyom se ikande sụk edikokot mme itien̄wed oro ẹkemekde. Satan emesịri enyịn ikike mme owo mbak mmọ ẹdikop eti mbụk. (2 Cor. 4:3, 4) Idem mbon oro ẹmehede ye Bible ẹyom un̄wam man ẹfiọk Bible. (Utom 8:30, 31) Ntem, da ini nam itie N̄wed Abasi an̄wan̄a nyụn̄ nọ mme uwụtn̄kpọ, ukem nte akpanamde ke utịn̄ikọ oro ọnọde ke Ufọkn̄wed Utom Ukara Abasi. (Utom 17:3) Kụt ete ke owo oro okụt ufọn oro Ikọ Abasi enyenede ke uwem imọ.
5. Didie ke afan̄ magazine ekeme ndikabade ndi ukpepn̄kpọ Bible?
5 Edieke owo oro amade se enye ekpepde, tat nneme oro sụn̄sụn̄ man esịne itie Bible iba m̀mê ita kpukpru ini oro awahade. Yom ifet nditọn̄ọ ukpepn̄kpọ ke ediye uduot ekpri n̄wed Oyom m̀mê n̄wed Ifiọk. Ntem, nte ini akade, afan̄ magazine ekeme ndikabade ndi ukpepn̄kpọ Bible.