Ufọkn̄wed Oro Anamde Ida Se Ikpepde Isịn ke Edinam
1 Ke ikerede iban̄a mme n̄kpọ oro ẹwetde ke Ndutịm Ufọkn̄wed Utom Ukara Abasi eke 2006, nnyịn iyodomo ndiwụt ke imọbọ ufọn ito mme ukpepn̄kpọ N̄wed Abasi ebe ke ndida mmọ nsịn ke edinam ke edisana utom nnyịn ye ke uwem nnyịn eke usen ke usen. Nnyịn imebiere ndinam mme n̄kpọ emi ikpepde.—John 13:17; Phil. 4:9.
2 Ndinọ Ibọrọ: Ndutịm Ufọkn̄wed Utom Ukara Abasi eke isua emi adian minit kiet ọnọ otuowo nditiene mbuana ke edinọ ibọrọ ke mme akpan n̄kpọ ẹtode edikot Bible. Emi ọwọrọ ke eyenete oro esede aban̄a mme akpan n̄kpọ ẹtode edikot Bible ekpenyene ndinọ utịn̄ikọ esie ke minit ition utu ke itiokiet. Mbon oro ẹdinọde ibọrọ ke otuowo ẹkpenyene n̄ko ndikpeme ini. Edieke etịmde ekere se editịn̄de, owo oro ọnọde ibọrọ ekeme ndida sekọn 30 m̀mê osụhọrede akan oro ọnọ ibọrọ esie. N̄kpọ nte owo duop ẹkeme ndinọ nti ibọrọ ke minit ition oro ẹnọde otuowo nditiene mbuana.
3 Utịn̄ikọ Oro Ọnọde Ukpep: Mme akpan n̄kpọ ẹtode edikot Bible ye utịn̄ikọ item ẹkpenyene ndiwụk ntịn̄enyịn ke nti n̄kpọ oro nnyịn ikemede ndida nnam n̄kpọ ke an̄wautom ye ke mme ikpehe eken ke uwem nnyịn eke usen ke usen. Etịn̄ikọ ikpenyeneke n̄kukụre ndidọhọ mme andikpan̄ utọn̄ nnọ imọ ẹnam n̄kpọ. Enye ẹkpenyene nditịn̄ se anade ẹnam, nte ẹkpenamde, ye mme ufọn oro ẹdibọde ẹto edinam emi. Enye ẹkeme ndidọhọ, “Ndausụn̄ emi itie N̄wed Abasi oro ọnọde nnyịn edi emi,” m̀mê “Emi edi usụn̄ oro nnyịn ikemede ndida ufan̄ikọ emi mbuan ke an̄wautom.” Mbiowo ye mme asan̄autom unamutom oro ẹfiọkde idaha n̄kann̄kụk ẹkpenyene ndiwụt nnennen nnennen nte ẹkpedade se ẹnemede ẹsịn ke edinam nte ẹkekeme.
4 Ndinọ mme uwụtn̄kpọ ẹtode Bible ekeme ndinen̄ede nnam ẹda se ẹnemede ẹsịn ke edinam. Ke ama eketịn̄ aban̄a uwụtn̄kpọ kiet ke N̄wed Abasi, etịn̄ikọ ekeme ndidọhọ, “Afo n̄ko emekeme ndisobo ukem idaha emi.” Enye ekpenyene ndikụt nte ke uwụtn̄kpọ Bible ekededi oro imọ iyomde ẹda ẹsịn ke edinam ekpenyene ndidu ke n̄kemuyo ye udọn̄ikọ, Bible, ye se “ofụn emi anamde akpanikọ onyụn̄ enyenede ọniọn̄,” ewetde.—Matt. 24:45.
5 Eti ibuot edi ukeme ndida ifiọk ye mbufiọk nnam n̄kpọ ke usụn̄ oro okụtde unen. “Ata akpan n̄kpọ edi eti ibuot.” (N̄ke 4:7) Nte nnyịn ikade iso ndinyene eti ibuot ebe ke ndikpep n̄kpọ ke Ufọkn̄wed Utom Ukara Abasi, nnyịn n̄ko ikpakam ifori ukeme nnyịn ndinam mbon efen ẹfiọk se nnyịn ikpepde.