N̄kparawa Owo Oro Ẹyamade nte Se Inọde Un̄wana
1. Didie ke Bible owụt ke mme Christian ẹnyene ndiwọrọ nda, ndien didie ke mme ikọ emi ẹnyene n̄kpọ ndinam ye mme uyen Christian mfịn?
1 Jesus ọkọdọhọ mme mbet esie ete: “Mbufo ẹdi un̄wana ererimbot.” (Matt. 5:14, 16) Ukem nte obio oro ẹbọpde ke enyọn̄ obot, emi esemde ke ini utịn asiahade, mmọ ẹnyene ndiwọrọ nda. Mfịn, ediwak n̄kparawa Christian ke ‘ẹyama nte se inọde un̄wana ke ererimbot’ ebe ke ndinyene eti edu uwem nnyụn̄ nsịn ifịk nnọ ikọ ntiense.—Phil. 2:15; Mal. 3:18.
2. Nso idi ndusụk usụn̄ oro afo ekemede ndinọ mme andikpep ye nsan̄a ubet ukpepn̄kpọ ikọ ntiense?
2 Ke Ufọkn̄wed: Didie ke afo ekeme ndinọ ikọ ntiense ke ufọkn̄wed? Ndusụk uyen ẹsida ini oro otu nditọ ufọkn̄wed ẹtịn̄de n̄kpọ ẹban̄a utọ n̄kpọ nte n̄kpọsọn̄ ibọk, edito ke unam mforo owo, ndedịbe n̄ka—ke ndisiak ibat ibat, ẹnọ ikọ ntiense. Eyenete an̄wan kiet ama ada ini oro ẹkedọhọde ẹwet n̄kpọ ẹban̄a edinam oyomonsia ọnọ ikọ ntiense aban̄a Obio Ubọn̄ Abasi nte ata idotenyịn ubonowo. Ntọt oro ẹtịmde ẹkere mi ama enem andikpep esịt, ndien emi ama eberede usụn̄ ọnọ ikọ ntiense efen efen.
3. Didie ke afo ekeme ndida edu uwem fo nnam un̄wana fo ayama ke ufọkn̄wed?
3 Usụn̄ efen oro afo ekemede ndiyama nte se inọde un̄wana edi ke edu uwem fo ye ke usịnen̄kpọ ye ukamaidem oro ẹwụtde iso o-bụt. (1 Cor. 4:9; 1 Tim. 2:9) Ke ini nditọ ufọkn̄wed ye mme andikpep ẹkụtde ke nte afo odude uwem edi isio, ndusụk mmọ ẹkeme ndibọ akpanikọ ke ntak eti edu fo, ẹnyụn̄ ẹnọ fi ifet ndibuana akpanikọ Bible ye mmọ. (1 Pet. 2:12; 3:1, 2) Ekeme ndidi idimemke utom ndinyene edu uten̄e Abasi, edi Jehovah eyenen̄ede ọdiọn̄ fi. (1 Pet. 3:16, 17; 4:14) Man anam mbon efen ẹnyene udọn̄ ke eti mbụk, afo emekeme ndikot mme n̄wed Bible ke ini nduọkodudu m̀mê ndinịm mme n̄wed emi ke ebiet oro mbon efen ẹdikụtde.
4. Nso idi ndusụk ufọn edinọ ikọ ntiense ke ufọkn̄wed?
4 Ndiyak un̄wana fo ayama ke ufọkn̄wed ekeme ndisọn̄ọ mbuọtidem fo onyụn̄ an̄wam fi ndibụre eti mbụre ke utom Jehovah. (Jer. 9:24) Enye n̄ko edi n̄kpọ ukpeme. Eyenete an̄wan kiet ọkọdọhọ ete, “Ufọn kiet oro nnyenede ke nditịn̄ mban̄a se nnịmde ke akpanikọ edi nte ke nditọ ufọkn̄wed nnyịn isinyịkke mi ndinam mme n̄kpọ oro mîdụhe ke n̄kemuyo ye Bible.”
5. (a) Didie ke ndusụk uyen ẹtat utom ukwọrọikọ mmọ? (b) Nso idi mme utịtmbuba eke spirit fo?
5 Nditat Utom: Usụn̄ efen oro ediwak uyen ẹkemede ndiyama nte se inọde un̄wana edi nditat utom ukwọrọikọ mmọ. Eyenete kiet ama ọwọrọ aka ndinam utom ke ebiet emi udọn̄ kaban̄a mme anditan̄a Obio Ubọn̄ okponde akan ke ama okokụre ufọkn̄wed sekọndri. Enye okodu ke ekpri esop oro ekenyenede ebiowo kiet kpọt. Enye ekewet ọnọ ufan esie ete: “Ami mmenen̄ede n̄kop inem uwem. Utom ukwọrọikọ enen̄ede anam owo okop odudu! Nnyịn imesida n̄kpọ nte minit 20 itịn̄ ikọ ke enyịnusụn̄ kiet kiet sia mme owo ẹyomde ndikop kpukpru se afo enyenede nditịn̄ nnọ mmọ.” Enye ama adian do ete: “Etie mi nte ke kpukpru n̄kparawa owo ẹkpenam ukem emi man ẹtiene ẹkop inemesịt nte n̄kopde. Inyeneke se ifọnde nte ndida kpukpru se nnyịn inyenede nnam utom Jehovah.”
6. Nso ke afo ama aban̄a n̄kparawa owo ke esop mbufo?
6 Esịt enem nnyịn didie ntem ndinyene mbufo n̄kparawa owo emi ẹyamade nte se inọde un̄wana ke ererimbot! (1 Thess. 2:20) Nte afo anamde n̄kpọ Jehovah ke ofụri esịt, ukpọn̄, ekikere, ye ukeme fo, afo ọyọdọk n̄kpọ “utịm ikikie idahaemi ke ini emi, . . . ye nsinsi uwem ke editịm n̄kpọ emi edidide.”—Mark 10:29, 30; 12:30.