Vidio Oro Owụtde Akpan Usụn̄ Ubọ Usọbọ
Nta ekpeibet ye mme ese n̄kpọ mban̄a nsọn̄idem ke ẹnen̄ede ẹwụk ntịn̄enyịn ke mme ekikere ẹban̄ade idaha ido uwem ye mme unen oro mbon udọn̄ọ ẹnyenede. Emi anam ẹsion̄o mbufa usọbọ ye usụn̄ usọbọidem emi Mme Ntiense Jehovah ẹkemede ndibọ ufọn nto. (Utom 15:28, 29) Mbufa usọbọ ye usụn̄ usọbọidem emi ke ẹwụt ke vidio emi Transfusion-Alternative Health Care—Meeting Patient Needs and Rights. Se vidio emi, ndien ekem fiak dụn̄ọde se ekekpepde.—Tịm fiọk: Sia vidio emi esịnede n̄kpri itie oro ẹsiakde owo idem, mme ete ye eka ẹkpenyene ndiwụt mbufiọk ke ini ẹsede enye ye nditọwọn̄.
(1) Ntak emi ndusụk owo ke n̄ka mme ọfiọk ibọkusọbọ ẹfiakde ẹnam ndụn̄ọde ẹban̄a edikịm iyịp nsịn ke idem-e? (2) Nọ uwụtn̄kpọ ita ẹban̄ade awak-n̄kukọhọ usiakidem oro ẹkemede ndinam ye unana edikịm iyịp nsịn ke idem. (3) Mbiausọbọ ye mme asiak-owo-idem ifan̄ ke ofụri ererimbot ẹwụt ke imenyịme ndisọbọ mbon udọn̄ọ ye unana edikịm iyịp nsịn mmọ ke idem? Ntak emi mmọ ẹnyịmede ndinam ntre? (4) Ndụn̄ọde ẹnamde ke ufọkibọk ke ndondo emi ayarade nso aban̄a edida iyịp nnam n̄kpọ? (5) Mme n̄kpọndịk ibọkusọbọ ewe ẹsan̄a ye edikịm iyịp nsịn ke idem? (6) Nso ubiere ke ediwak nta ibọkusọbọ ẹsịm kaban̄a mme ufọn ẹtode ibọkusọbọ efen oro ẹnọde utu ke edikịm iyịp nsịn ke idem? (7) Nso idi ntak udọn̄ọ unana iyịp? Idem owo ekeme ndiyọ unana iyịp ebịghi adan̄a didie? Nso ke ẹkeme ndinam man udomo iyịp oro afiak ọdọk? (8) Didie ke ẹkeme ndinam idem owo udọn̄ọ osion̄o ndatndat nsen iyịp? (9) Mme usụn̄ usọbọidem ewe ke ẹda man ẹsụhọde uwọrọiyịp ke ini usiakidem? (10) Nte ibọkusọbọ efen oro ẹnọde utu ke edikịm iyịp nsịn ke idem ẹkeme ndifọn ye n̄kpri nditọ m̀mê mme owo oro ẹsobode mbabuat idaha oro esịnde uwem ke itiendịk? (11) Nso idi akpan edumbet ido uwem kiet oro aban̄ade eti ibọkusọbọ? (12) Ntak ọfọnde mme Christian ndibem iso mmek usọbọidem oro owo mîkamake iyịp oro mmọ ẹyomde? Didie ke ẹkeme ndinam emi?
Ndinyịme ndusụk usọbọ oro ẹwụtde ke vidio emi edi ọkpọkpọ ubiere nte ekemde ye ubieresịt owo kiet kiet oro Bible ọnọde ukpep. Nte afo emebiere m̀mê ewe ibọkusọbọ efen utu ke edikịm iyịp nsịn ke idem ke imọ ye nditọ imọ idinyịme ndibọ? Ekpenyene nditịm nsian mbonubon oro mîdịghe Mme Ntiense mban̄a mme ubiere fo ye mme ntak emi afo anamde mme ubiere emi.—Se “Mme Mbụme Ẹtode Mme Andikot” ke mme nsiondi Enyọn̄-Ukpeme eke June 15, 2004, ye October 15, 2000.