Kpebe Jehovah “Abasi Inemesịt” Nnyịn
1 Jehovah enen̄ede oyom mme owo ẹkop inemesịt. Ikọ esie anam nnyịn idori enyịn ke mme utịbe utịbe edidiọn̄ oro enye enịmde ọnọ ubonowo. (Isa. 65:21-25) Mbon efen ẹnyene ndikụt nte ke nnyịn imokop inemesịt ndibuana “ubọn̄ ubọn̄ eti mbụk Abasi inemesịt” ye mmimọ. (1 Tim. 1:11) Usụn̄ oro nnyịn itịn̄de iban̄a etop Obio Ubọn̄ enyene ndiwụt ima oro imade akpanikọ ye ata udọn̄ oro inyenede ke idem mbon oro itịn̄de ikọ inọ.—Rome 1:14-16.
2 Edi akpanikọ nte ke ekeme ndisọn̄ ndikop inemesịt ndusụk ini. Ke ndusụk efakutom, ediwak owo isimaha ndikpan̄ utọn̄ nnọ etop Obio Ubọn̄. Mme ini ẹkeme ndidu oro anade nnyịn iyọ n̄kpọsọn̄ idaha ke uwem nnyịn. Man ika iso ikop inemesịt, ọyọfọn nditie n̄kere nte oyomde mme owo ke efakutom nnyịn ẹkop ẹnyụn̄ ẹfiọk eti mbụk Obio Ubọn̄ oro nnyịn ikwọrọde. (Rome 10:13, 14, 17) Nditie n̄kere emi ayan̄wam nnyịn ika iso ye inemesịt ndinam ẹfiọk mme ndutịm oro Jehovah anamde ndinyan̄a nnyịn.
3 Wụk Ntịn̄enyịn ke Nti N̄kpọ: Oyom nnyịn ikpeme se itịn̄de n̄ko. Okposụkedi ikemede nditọn̄ọ nneme ke ndisiak mfịna m̀mê se ẹtịn̄de ke mbụk n̄kpọntịbe oro mme owo ẹsụk ẹkerede, ọfọn nnyịn ifep ndika iso ntịn̄ se ifịnade mme owo. Ẹdọn̄ nnyịn ida eti mbụk “eti n̄kpọ” idi. (Isa. 52:7; Rome 10:15) Eti mbụk emi edi etop oro ọkọn̄ọde ke mme un̄wọn̄ọ Abasi oro ẹban̄ade nyayama ini iso. (2 Pet. 3:13) Ke ikerede iban̄a emi, da N̄wed Abasi ‘bọp mmọ eke esịt mmọ obụn̄ọde.’ (Isa. 61:1, 2) Emi ayan̄wam nnyịn owo kiet kiet ndika iso n̄kop inemesịt nnyụn̄ nnyene in̄wan̄-in̄wan̄ edu.
4 Nte nnyịn ibuanade ke utom ukwọrọikọ, mme owo ẹyekụt nte nnyịn ikopde inemesịt. Ke ntre, nnyịn ikpakam inyene edu Jehovah “Abasi inemesịt” nnyịn, nte ibuanade eti mbụk Obio Ubọn̄ ye mme owo ke efakutom nnyịn.