Mme Ntọt
◼ Mme n̄wed ẹnọde ke July ye August: Ẹkeme ndinọ ekededi ke otu ndiye uduot n̄kpri n̄wed ẹnyenede page 32 ẹtienede mi: Afo Emekeme Ndidi Ufan Abasi!, Dara Uwem ke Isọn̄ ke Nsinsi!, Ẹdu ke Ukpeme!, Enyịn̄ Abasi Oro Edibịghide ke Nsinsi, Ke Ini Owo Oro Afo Amade Akpade, Nso Idi Uduak Uwem?—Didie ke Afo Ekeme Ndikụt Enye?, Nso Itịbe inọ Nnyịn ke Ini Nnyịn Ikpade?, Nte Abasi Enen̄ede Ekere Aban̄a Nnyịn?, Nte Afo Ekpenyene Ndinịm Abasi-Ita-ke-Kiet ke Akpanikọ?, N̄wed Ofụri Owo, “Sese! Mmanam Kpukpru N̄kpọ Ẹdi Mbufa,” Spirit Mme Akpan̄kpa—Nte Mmọ Ẹkeme Ndin̄wam Fi m̀mê Ndinọ Fi Unan? Nte Mmọ Ẹnen̄ede Ẹdu?, Ukara Emi Edidade Paradise Edi, ye Usụn̄ Oro Adade Esịm Nsinsi Uwem. September: Ẹdinọ n̄wed Bible Ekpep. Ẹkpenyene ndisịn san̄asan̄a ukeme nditọn̄ọ ukpepn̄kpọ Bible ke akpa ediwaha. Ẹkpenyene ndinam mfiakn̄ka ke kpukpru n̄wed oro ẹnịmde ye uduak nditọn̄ọ ukpepn̄kpọ Bible. October: Nọ Enyọn̄-Ukpeme ye Awake! Ke ebiet ẹwụtde udọn̄, mbọk nọ ediye uduot ekpri n̄wed Ẹdu ke Ukpeme!
◼ Ọtọn̄ọde ke September, mme esenyịn circuit ẹdinọ utịn̄ikọ an̄wa ke ibuotikọ emi, “Nso Idi Idaha Fo ye Abasi?”
◼ Ọtọn̄ọde ke urua January 8, 2007, nnyịn idikpep Ediyarade—Ubọn̄ Ubọn̄ Ata-Utịt Esie Emekpere! ke Ukpepn̄kpọ N̄wed Esop. Ana mme esop ẹnyene se ikemde ke eti ini man ẹkpekama ke ini ukpepn̄kpọ.
◼ Ọfọn ndikpọn̄ n̄wed eben̄e utom usiakusụn̄ ofụri ini nnọ ọfis n̄kọk itieutom ke nsụhọde n̄kaha usen 30 mbemiso usenọfiọn̄ oro ẹkesịnde eben̄e nditọn̄ọ. Ewetn̄wed esop ekpenyene ndidụn̄ọde babru emi man okụt ete ke ẹwet n̄kpọ ẹyọhọ. Edieke mbon oro ẹsịnde n̄wed eben̄e mîtịghi nnennen usenọfiọn̄ baptism mmọ, mmọ ẹkpenyene ndimek usenọfiọn̄ nnyụn̄ n̄wet enye nnịm. Ewetn̄wed ekpenyene ndiwet usenọfiọn̄ emi ke kad Congregation’s Publisher Record (S-21).
◼ Mme ewetn̄wed esop ẹkpenyene ndikụt nte ke asiakusụn̄ ofụri ini kiet kiet ke esop enyene Pioneer Appointment Letter (S-202). Edieke mmọ mînyeneke, mmọ ẹnyene ndiwet n̄kọk itieutom.
◼ Ẹkpenyene ndidian ibat kpukpru n̄wed ye magazine oro ẹdude, emi ẹsidiande ke isua ke isua, ke August 31, 2006, m̀mê usọp usọp nte ẹkekeme ke oro ebede. Edidian ibat emi edi ukem ye ata ata edibat oro anam-ndutịm n̄wed esinamde ke ọfiọn̄ ke ọfiọn̄, ndien ẹkpenyene ndiwet ofụri ibat nsịn ke babru Literature Inventory (S-18). Ẹkpenyene ndibọ ibat ofụri magazine ẹdude nto (mme) asan̄autom ẹkamade magazine. Ewetn̄wed esop oro anamde ndutịm ekpenyene ndise enyịn ke edidian ibat emi. Enye ye esenyịn oro etiede ibuot ke esop oro anamde ndutịm ẹyesịn ubọk ke babru emi. Esop kiet kiet oro anamde ndutịm ọyọbọ babru Literature Inventory ita. Mbọk ẹnọ akpa ikọn̄ oro ẹsọk n̄kọk itieutom okûbịghi akan September 6. Ẹsịn udiana ikọn̄ ke n̄kpọ udọn̄ n̄wed mbufo. Ẹkeme ndikama ọyọhọ ikọn̄ ita nte n̄kpọ uwetn̄kpọ.
◼ Ẹnọ esop kiet kiet babru Literacy Report iba. Ke ẹma ẹkewet n̄kpọ ẹdọn̄ ẹyọhọ mmọ, mbọk ẹnọ kiet ẹsọk n̄kọk itieutom ke August 1. Ẹsịn enye eken ke n̄kpọ udọn̄ n̄wed esop.