Mmọ Ẹmenịm Uwụtn̄kpọ Edinam Akpanikọ
1 Ẹma ẹtọn̄ọ obufa ikpehe utom uyọhọ ini ke isua 1937—utom akpan asiakusụn̄. Iren ye iban oro ẹkemede ẹnyụn̄ ẹnyenede mbufiọk ke utom ukwọrọikọ Christian ẹma ẹnyịme ndikanam utom ke ebiet ekededi oro esop Abasi ọkọdọhọde mmọ ẹka. Idahaemi, ediwak isua ke ukperedem, mme akpan asiakusụn̄ ẹka iso ndinịm uwụtn̄kpọ edinam akpanikọ oro odotde ẹkpebe.—Heb. 6:12.
2 Mmọ Ẹkesida Usụn̄: Toto ke ntọn̄ọ, mme akpan asiakusụn̄ ẹkesida iso ke utom ukwọrọikọ ke ndikama n̄kpri ukwak ubre usanikwọ n̄ka ufọkowo. Mmọ n̄ko ẹma ẹsikama mme utịn̄ikọ oro ẹmụmde-mụm ẹdọn̄ ke usanikwọ ndida nnyene nneme Bible ke mme mfiakn̄ka. Ẹkesinam emi ke ikpọ obio oro ẹma ẹkesasiak mme esop. Ke ukperedem, ẹma ẹsinọ mme akpan asiakusụn̄ ẹka mme ebiet oro udọn̄ kaban̄a mme anditan̄a Obio Ubọn̄ okokponde akan. Mmọ ẹma ẹsifiak ẹkese kpukpru mbon oro ẹkewụtde udọn̄ ẹnyụn̄ ẹnịm ukpepn̄kpọ Bible. Nte utịp ukeme ofụri esịt oro mmọ ẹkesịnde, ẹma ẹsiak ediwak mbufa esop ke mme itie ikie. Ifịk ifịk utom ukwọrọikọ mmọ ama etịp esịn ke akwa n̄kọri esop Abasi oro nnyịn ikụtde mfịn. (Isa. 60:22) Nnyịn inyene mme akpan asiakusụn̄ 750 ke Nigeria ndien mmọ ẹka iso ndinam ekese ke ndisuan eti mbụk nnọ “kpukpru edibotn̄kpọ ke idak ikpaenyọn̄.”—Col. 1:23.
3 Ẹdot Se Ẹkpebede: Ndusụk akpan asiakusụn̄ ẹmenam utom uyọhọ ini ke ata ediwak isua. Ke mme isua emi, nsio nsio idaha amanam mbon nsọn̄ọnda emi ẹnen̄ede ẹnyene mbuọtidem. (1 Pet. 1:6, 7) Mmọ ẹben̄e idem ndiyak mfọnọn̄kpọ obụkidem atak man ẹkenam utom ke mme itie emi san̄asan̄a udọn̄ odude. Ndusụk mmọ ẹsọn̄ idahaemi ẹnyụn̄ ẹdọn̄ọ, mîdịghe mmọ ẹsobo mme n̄kpọ-ata eken. (2 Cor. 4:16, 17) Edi mmọ “ẹyesụk ẹkọri ke usọn̄.” (Ps. 92:14) Mmọ ẹbuọt idem ke Jehovah ẹnyụn̄ ẹbọ edidiọn̄ esie.—Ps. 34:8; N̄ke 10:22.
4 Odot itoro mme akpan asiakusụn̄ etieti. Edieke mme akpan asiakusụn̄ ẹdude ke esop mbufo, sinen̄ede biat ini ye mmọ nyụn̄ bọ ufọn to ifiọkutom mmọ. Wụt esịtekọm ban̄a se mmọ ẹnamde nte mme anam-akpanikọ anditan̄a Obio Ubọn̄. Kpebe nsọn̄ọnda mmọ. Kpukpru mbon oro ẹkpebede mbuọtidem mmọ ẹkeme ndidara mfọn ye edidiọn̄ Jehovah koro “mme anam akpanikọ ẹnem enye esịt.”—N̄ke 12:22.