Uyarade Ọkpọsọn̄ Mbuọtidem!
1. Mme n̄kpọntịbe ewe emi ẹtịmerede owo esịt ke Jesus ekebem iso etịn̄ aban̄a?
1 Mme apostle ẹma ẹnen̄ede ẹkpan̄ utọn̄ ẹkop nte Jesus etịn̄de aban̄a edidu esie ye utịt editịm n̄kpọ emi. Mme n̄kpọntịbe oro ẹtịmerede owo esịt ẹyenọmọ ubonowo—ekọn̄, akan̄, unyekisọn̄, ndiọi udọn̄ọ. Ekem, Jesus ọdọhọ ke ẹyesua mme anditiene imọ, ẹda mmọ ẹyak ẹnọ ukụt, ẹnyụn̄ ẹwot mmọ. Ediwak prọfet nsu ẹyedaha ẹda ẹnyụn̄ ẹda ediwak owo ẹtụn usụn̄. Ima ediwak owo eyebịt.
2. Ntak emi edide n̄wọrọnda n̄kpọ nte ke ẹkwọrọ eti mbụk ke ofụri ererimbot?
2 Ntre, anaedi idem ama akpa mme apostle ke ini Jesus ọkọdọhọde ke ẹyekwọrọ eti mbụk Obio Ubọn̄ Abasi ke ofụri isọn̄. (Matt. 24:3-14) Mfịn nnyịn imokụt nte ntịn̄nnịm ikọ oro aduaide owo idem mi enen̄erede osu. Okposụkedi emi nnyịn idude uwem ke ndiọkeyo, Mme Ntiense Jehovah ẹsịn ifịk ẹtan̄a eti mbụk. Ke adan̄aemi ima ererimbot emi ebịtde-bịt, ima nnyịn ke ofofiop aka iso. Okposụkedi oro “kpukpru mme idụt” ẹsuade nnyịn, nnyịn imọkwọrọ ikọ ke se ikperede ndidi kpukpru idụt.
3. Tịn̄ se afo okụtde ke ibatutom ofụri ererimbot oro esịnde udọn̄ ọnọ fi.
3 Edi n̄kpọ nsịnudọn̄ didie ntem ndidụn̄ọde se Mme Ntiense Jehovah ẹkenamde ke isua utom oro ekebede nte ẹwụtde ke mme ekebe oro ẹdude ke page 3 esịm 6! Ọyọhọ isua 16 edi emi ẹbiatde se ibede hour biliọn kiet ke isua ke utom ukwọrọikọ ye edinam mbet. Nso uyarade ọkpọsọn̄ mbuọtidem ke emi edi ntem! Ibat mme asiakusụn̄ ama ada mbahade ition ye akamba ubak awak akan eke isua oko, ibat mme asuanetop onyụn̄ awak akan eke isua oko ke mbahade ita ye esisịt ubak, ndien ibat ukpepn̄kpọ Bible oro ẹkenịmde ama ada mbahade inan̄ ye ubak awak akan eke isua oko. Ibat mbon oro ẹkenade baptism ama ada mbahade 20 ye esisịt ubak awak akan eke isua utom emi ekebede. Edi n̄kpọ inemesịt ndikụt ke se ikperede owo miliọn itiaba ke ẹsọn̄ọ ẹda ẹnam n̄kpọ ẹnọ Jehovah—ndien akananam ikọt Abasi iwakke ntem ke mbụk ubonowo! Nte afo odụn̄ọrede mme ekebe oro, nso ke okụt emi enen̄erede esịn udọn̄ ọnọ fi?
4. Mme mfịna ewe ke eren kiet akakan ke ini enye okoyomde ndina baptism?
4 Okposụkedi ibat oro ẹsiakde mi ẹnen̄erede ẹwak, nnyịn ikpedehedei ifre ite ke mmọ ẹdi ibat mbon oro ẹwụtde ke imenyene mbuọtidem. Kere ban̄a uwụtn̄kpọ kiet emi. Guillermo ọkọkọri ke Bolivia. Enye akamana ke 1935, ndien ke esịmde isua usụkkiet ọtọn̄ọ ndinam utom ke in̄wan̄ cocaine. Toto ke uyen, enye ama esita ikọn̄ cocaine man okûnen̄ede okop ubiak ọkpọsọn̄ utom. Ekem enye ama esikpa mmịn onyụn̄ ọn̄wọn̄ sika. Ke Guillermo ọtọn̄ọde ndikpep mban̄a se Jehovah oyomde oto enye, enye ama etre ndin̄wọn̄ sika, ekem etre ndikpa mmịn. Edi se ikọsọn̄de enye ikan ekedi nditre ndita ikọn̄ emi ẹsidade ẹnam cocaine. Enye ama ọkọbọ ke akam onyụn̄ etre edinam emi. Ke enye ama eketre ndiọi edinam esie, enye ama ana baptism. Enye ọdọhọ ete: “Idahaemi mmodu eti uwem mmonyụn̄ nnen̄ede n̄kop inemesịt.”
5. Nso ke afo oyom?
5 Jehovah enen̄ede enyene udọn̄ ke idem mme owo. Enye oyom kpukpru owo ẹkabade esịt. (2 Pet. 3:9) Se nnyịn n̄ko iyomde edi oro. Esịt akpakam onụk nnyịn ndinam ofụri se ikemede man ika iso in̄wam mbon esịt akpanikọ ẹdi ẹdifiọk ẹnyụn̄ ẹma Jehovah kpa nte nnyịn imade.