Ndibọp Kiet Eken Nnam Ọkọri ke Adan̄aemi Idude ke An̄wautom
1 Esinem kpukpru nnyịn ndikop nti “ikọ eke ẹtịn̄de ke ekem ini.” (N̄ke 25:11) Ke ini isan̄ade ye mbon en̄wen ke an̄wautom, didie ke ikeme ndikụt nte ke nneme nnyịn esịn udọn̄ ọnọ mmọ?
2 Nneme Oro Ọbọpde-Bọp: Esidi n̄kpọ nsịnudọn̄ didie ntem ndineme mme n̄kpọ eke spirit ke ini idude ke an̄wautom! (Ps. 37:30) Imekeme nditịn̄ mban̄a se iyomde ndineme ye enyeneufọk m̀mê ibụk ndinem ifiọkutom oro ikenyenede ndondo emi. (Utom 15:3) Ndi ima ikpep n̄kpọ emi edemerede nnyịn udọn̄ ke edikot Bible nnyịn, magazine eke ndondo emi, m̀mê ke mbono esop? Imekeme n̄ko ndineme akpan n̄kpọ ke utịn̄ikọ an̄wa oro ikokopde ndondo emi ke Ufọkmbono Obio Ubọn̄.
3 Idem ekeme ndimem nnyịn ke ini enyeneufọk ọtọn̄ọde mfan̄a oro nnyịn mîkemeke ndibọrọ. Eyetịm ọfọn ndida minit ifan̄ ke ima ikọkpọn̄ ufọk oro nneme ye nsan̄a nnyịn nte ẹkemede ndibọrọ utọ mfan̄a oro ke ini iso. Imekeme ndida n̄wed Reasoning m̀mê ekpri n̄wed Nte Ẹkpetọn̄ọde Ẹnyụn̄ Ẹkade Iso ke Mme Nneme Bible nnam emi. Ndien edieke nnyịn ikamade nte nsan̄a nnyịn ọkọkwọrọde ikọ ọnọ owo, nditoro enye eyesịn udọn̄ ọnọ enye.
4 Bem Iso Tọn̄ọ: Ndi odu mme owo ke otu ukpepn̄kpọ n̄wed esop nnyịn oro nnyịn mîsan̄ake ye mmọ ndondo emi ke an̄wautom? Ndidọhọ mmọ ẹdisan̄a ye nnyịn ke an̄wautom ekeme ndinam “nsịnudọn̄ eke otode edem mbiba” odu ke otu nnyịn. (Rome 1:12) Mme asiakusụn̄ ofụri ini ye eke unọ un̄wam ẹsinem esịt ke ini mbon en̄wen ẹsan̄ade ye mmọ, akpan akpan ke tụhi-tụhi usenubọk ye ke uwemeyo emi ediwak owo mîsiwọrọke an̄wautom. Nnyịn imekeme ndisịn udọn̄ nnọ mme asiakusụn̄ ebe ke ndisan̄a ye mmọ ke an̄wautom. Ndi odu asuanetop emi edide owo n̄kpọnnam, emi ndiọkidem mîyakke enye anam se enye akpamade ndinam ke an̄wautom? Ndinam ndutịm man utọ owo oro asan̄a ye nnyịn, iso ọfọn ke ini inịmde ukpepn̄kpọ Bible, ekeme ndin̄wam nnyịn mbiba.—N̄ke 27:17.
5 Nditoro nnyụn̄ n̄wụt esịtekọm mban̄a se mme owo ẹnamde, idem ọkpọkọm ke n̄kpri n̄kpọ, esisịn udọn̄ ọnọ mmọ. Ẹyak inyene emi ke ekikere ke ini isan̄ade ye mbon en̄wen ke an̄wautom, sia iyomde ‘ndika iso mbọp kiet eken nnam ọkọri.’—1 Thess. 5:11.