Didie ke Ikeme Ndin̄wam Mbon Oro Ẹdụkde Editi?
1. Okopodudu ikọ ntiense ewe ke ẹdinọ ke March 22, 2008?
1 Ke March 22, 2008, ẹyenọ ata ediwak owo ke ofụri ererimbot okopodudu ikọ ntiense. Mbon oro ẹdidụkde Editi ẹyekop ẹban̄a akwa ima Jehovah ke ndinọ ubonowo ufak. (John 3:16) Mmọ ẹyekpep ẹban̄a Obio Ubọn̄ ye nte Jehovah edidade enye anam uduak esie osu ke ofụri isọn̄. (Matt. 6:9, 10) Mmọ ẹyekụt nte ikọt Abasi ẹmade ima ẹnyụn̄ ẹdianade kiet, ẹyenyụn̄ ẹkụt nte nnyịn idarade mmọ.—Ps. 133:1.
2. Didie ke ikeme ndin̄wam nditọ ukpepn̄kpọ Bible oro ẹdụkde Editi?
2 Nditọ Ukpepn̄kpọ Bible: Ndusụk mbon oro ẹdidụkde ẹdidi mbon oro ẹtọn̄ọde-tọn̄ọ ndikpep Bible ye nnyịn. Men mmọ wụt nditọete. Tịn̄ n̄kpọ ban̄a mme mbono esop eke urua ke urua nyụn̄ da mmọ san̄a kanade Ufọkmbono Obio Ubọn̄. Ke ini etịn̄ikọ edinọde utịn̄ikọ, enye eyesịn udọn̄ ọnọ mmọ ndinam n̄kọri ke n̄kan̄ eke spirit. Emekeme ndida se enye editịn̄de esịn udọn̄ ọnọ nditọ ukpepn̄kpọ fo.
3. Nso ke ẹkeme ndinam man ẹn̄wam mme asuanetop oro mîwọrọke an̄wautom aba emi ẹdụkde Editi?
3 Mbon Oro Mîwọrọke An̄wautom Aba: Ndusụk mbon oro ẹdidụkde ẹdidi mbon oro mîwọrọke an̄wautom aba. Bem iso ka kọkọm mmọ ufiop ufiop. Kûbụp mbụme m̀mê nditịn̄ n̄kpọ emi ekemede ndinam mmọ ẹkop bụt. Esisịt ini ke Editi ebede, mbiowo ẹkpenyene ndika n̄kese owo ekededi oro mîwọrọke an̄wautom aba, edi emi okodụkde Editi, ẹkọm mmọ ke ndikodụk, ẹnyụn̄ ẹkot mmọ ẹdidụk mbono esop efen oro ẹdinịmde.
4. Didie ke nnyịn owo kiet kiet ikeme ndin̄wam isenowo?
4 Isenowo: Ndusụk mbon oro ẹdidụkde ẹdidi mme ufan m̀mê mbonubon nnyịn oro nnyịn ikọnọde ikot. Ekeme ndidi mbon eken ẹkebọ ikot emi ke ini ẹkenamde san̄asan̄a ubịnikọt. Edieke okụtde mme owo oro afo mûfiọkke, bem iso ka kọkọm mmọ nyụn̄ siak enyịn̄ fo nọ mmọ. Ekeme ndidi akanam mmọ idụkke mme mboho nnyịn. Nte osụk enemede nneme ye mmọ emekeme ndifiọk nte ekemede ndifiak nsobo ye mmọ. Edieke akade ekese mmọ m̀mê okotde mmọ ke urụk ukopikọ usen ifan̄ ke Editi ebede, afo emekeme ndinam mmọ ẹka iso ẹnyene udọn̄ onyụn̄ ọdọhọ ke ikpama nditọn̄ọ ukpepn̄kpọ Bible ye mmọ.
5. Nso ke ikeme nditịn̄ man itọn̄ọ ukpepn̄kpọ Bible?
5 Ẹkeme ndida se ẹdinemede ke utịn̄ikọ Editi ntọn̄ọ nneme ke n̄wed Bible Ekpep ke ini ẹfiakde ẹkese owo emi okodụkde Editi. Ke uwụtn̄kpọ, owo emi edinọde utịn̄ikọ Editi oyokot Isaiah 65:21-23. Ke ini afiakde aka ndise owo emi okodụkde Editi, emekeme nditịn̄ n̄kpọ mban̄a utịn̄ikọ oro onyụn̄ ọdọhọ ete, “Yak n̄wụt fi mme edidiọn̄ efen oro ufak edinamde ubonowo ẹnyene.” Ekem neme page 4-5 ke n̄wed Bible Ekpep. Mîdịghe emekeme ndidọhọ, “Ediwak owo ẹsikere m̀mê ini ewe ke nnyịn idikụt ntịn̄nnịm ikọ Isaiah osude.” Ekem neme ikpehe ekikere 1-3 ke ibuot 9. Usụn̄ efen edi nditịn̄ se owo emi edinọde utịn̄ikọ Editi eketịn̄de, owụt enye n̄wed Bible Ekpep, onyụn̄ owụt enye nte ekemede ndida n̄wed emi n̄kpep Bible.
6. Nso ifet ke nnyịn inyene ke ini inamde ewụhọ Jesus nditi n̄kpa esie?
6 Nnyịn owo kiet kiet ikpakam ida ifet oro ebererede in̄wam nditọ ukpepn̄kpọ Bible nnyịn, mme asuanetop oro mîwọrọke an̄wautom aba, ye isenowo oro ẹdidụkde Editi. (Luke 22:19) Ke akpanikọ, Jehovah ọyọdiọn̄ n̄kọri oro odude ke utom Obio ubọn̄ nnyịn.