Ekebe Mbụme
◼ Didie ke ikpesịne n̄kpọ ke ini ikade ufọk utuakibuot Jehovah?
Mme Ufọkmbono Obio Ubọn̄, Ufọk Mbono, ufọkidụn̄ Bethel, ye n̄kọk itieutom ke ofụri ererimbot ẹdi san̄asan̄a ebiet oro ẹdade ẹnam utom Jehovah. Mmọ ẹdot, ẹye, ẹsana, ẹnyụn̄ ẹnyene uku. Emi enen̄ede okpụhọde ye se ẹsiwakde ndikụt ke editịm n̄kpọ Satan emi. Mbon emi ẹkade mme ufọk utuakibuot Jehovah ẹnyene ndikama idem nte ikọt Jehovah, kpa mbon oro ẹnamde uduak esie.
Nte mme Christian, nnyịn “itoro idem nnyịn nte mme asan̄autom Abasi” ke kpukpru usụn̄, esịnede ndikama idem nnyụn̄ nsịne n̄kpọ nte odotde. (2 Cor. 6:3, 4) N̄ko, ẹdori enyịn nnyịn ndinam n̄kpọ nte eyede. Ọfọn̄ ye ukamaidem nnyịn ẹkpenyene ndiwụt uyai ye uku oro anade mme asan̄autom Jehovah Abasi ẹnyene kpukpru ini. Oyom ẹkere ẹban̄a emi akpan akpan ke ini ẹdide n̄kọk itieutom nnyịn ke Igieduma, ibuot itieutom nnyịn, ye mme n̄kọk itieutom eken ke ofụri ererimbot.
Ẹtịm man Inam Uduak Jehovah etịn̄ nte edide akpan n̄kpọ ndisịne n̄kpọ nnyụn̄ n̄kama idem nte odotde, onyụn̄ eneme ntak oyomde isana ke ikpọkidem, isịne n̄kpọ oro owụtde iso o-bụt, inyụn̄ ikama idem nte ọfọnde ke ini ibuanade ke an̄wautom inyụn̄ idụkde mme mbono esop Christian. Ekem, ke page 138, ikpehe ekikere 3, enye ọdọhọ ete: “Ti ke enyịn̄ oro Bethel ọwọrọ ‘Ufọk Abasi.’ Ntre usịnen̄kpọ, ukamaidem, ye edu uwem nnyịn ẹkpenyene ndidi ukem ye se ẹyomde ẹto nnyịn ke ini idụkde mme mbono esop man ikatuak ibuot ke Ufọkmbono Obio Ubọn̄.” Mme asuanetop Obio Ubọn̄ oro ẹtode anyan ebiet ẹdi, ọkọrọ ye mbon oro ẹdụn̄de ẹkpere Bethel ẹkpenyene nditiene n̄kokon̄ idaha emi. Edieke mbon oro ẹdide Bethel ẹnamde emi, ọwọrọ ke mmọ ẹwụt ukpono ye esịtekọm ẹban̄a ndutịm emi.—Ps. 29:2.
Usịnen̄kpọ nnyịn ekpenyene ndinam ẹdiọn̄ọ nnyịn nte mbon oro “ẹdọhọde ke ikpono Abasi.” (1 Tim. 2:10) Ndisịne n̄kpọ nnyụn̄ n̄kama idem nte odotde ekeme ndinam mbon en̄wen ẹma utuakibuot akpanikọ. Edi, ẹmekụt ke ndusụk nditọete ẹsisịne n̄kpọ nsuahade nsuahade, ntaha ntaha, m̀mê ke usụn̄ oro osion̄ode ndido idem mmọ owụt ke ini mmọ ẹdide mme ufọk utuakibuot Jehovah. Idotke Christian ndisịne n̄kpọ ke utọ usụn̄ emi ke ini ekededi. Ke afan̄ emi, ọkọrọ ye ke ofụri usụn̄ uwem nnyịn nte mme anditiene Christ, nnyịn iyom ndika iso ntiene mme n̄kokon̄ idaha oro ẹnamde ikọt Abasi ẹdi isio ye mbon ererimbot, inamde kpukpru n̄kpọ inọ Abasi ubọn̄.—Rome 12:2; 1 Cor. 10:31.
Ntre ke ini oyomde ndidi ibuot itieutom nnyịn m̀mê mme n̄kọk itieutom eken, edide ke ini edide Bethel nnennen nnennen m̀mê ke ini akade n̄kpọ efen onyụn̄ ebierede ndiwaha nse Bethel, mbọk bụp idemfo ete: ‘Ndi usịnen̄kpọ ye ukamaidem mi odot, asana, onyụn̄ enyene uku nte itie oro nyomde ndika mi? Ndi ọfọn̄ mi eyetịn̄ eti n̄kpọ aban̄a Abasi oro ntuakde ibuot nnọ? Nte ukamaidem mi ọyọwọn̄ọde ntịn̄enyịn mbon en̄wen m̀mê ayat mmọ esịt?’ Usịnen̄kpọ ye ukamaidem nnyịn akpakam ‘anam ukpepn̄kpọ Abasi, Andinyan̄a nnyịn, enyene uku ke kpukpru n̄kpọ’!—Titus 2:10.