Nam N̄kọri ke Utom Ukwọrọikọ Fo
1 Ete nnyịn eke heaven esinem esịt ke ini mme asan̄autom esie ẹnamde n̄kọri eke spirit. Oro esịne ndinam n̄kọri nte asan̄autom oro ọkọride esịm ọyọhọ idaha onyụn̄ okụtde unen ke nditan̄a eti mbụk. Paul ama esịn udọn̄ ọnọ Timothy emi ekedide esenyịn ete aka iso esịn idem ke edikot n̄wed nnọ owo ye ke edikpep owo n̄kpọ man kpukpru owo ẹkpekụt n̄kọri esie. (1 Tim. 4:13-15) Kpukpru nnyịn ikpenyene ndinam n̄kọri ke nte inamde utom ukwọrọikọ, idem ọkpọkọm idi mme asuanetop oro ẹnyenede mbufiọk.
2 Nịm Mme Utịtmbuba Nọ Idemfo: Ndinam n̄kọri oyom owo enịm mme utịtmbuba ọnọ idemesie. Nso idi ndusụk utịtmbuba oro ikemede ndinịm nnọ idem nnyịn? Imekeme ndisịn ukeme man itetịm inyene usọ ke ndikot nnyụn̄ nnam itie N̄wed Abasi an̄wan̄a, sia Bible edide akan̄kan̄ eke spirit. (Eph. 6:17) Ekeme ndinyụn̄ ndu ikpehe utom ukwọrọikọ emi oyomde inam n̄kọri, utọ nte unọ ikọ ntiense efak, unọ ikọ ntiense urụk ukopikọ, m̀mê ndinam utom ke efakutom mbubehe. Nnyịn imonyụn̄ ikeme ndisịn ifịk nnam ediwak mfiakn̄ka emi ẹnyenede uforo. Eti utịtmbuba en̄wen ekeme ndidi ndinam n̄kọri ke nditọn̄ọ nnyụn̄ nnịm mme ukpepn̄kpọ Bible.
3 Se Idin̄wamde Nnyịn: Ẹdiomi mme mbono esop, akpan akpan Ufọkn̄wed Utom Ukara Abasi ye Esoputom, man ẹn̄wam nnyịn ndinam n̄kọri nte mme asan̄autom. Nte isịnde ukeme ndiben̄e idem nnọ, ndidụk mme mbono esop emi nnyụn̄ nda mme ekikere oro ẹnọde nsịn ke edinam, ntre ke idibọ ufọn oro okponde akan.—2 Cor. 9:6.
4 Oyom in̄wam kiet eken ẹnam n̄kọri n̄ko. (N̄ke 27:17) Nditịm n̄kpan̄ utọn̄ ke se owo oro nnyịn isan̄ade kiet ke an̄wautom etịn̄de ayan̄wam nnyịn inam n̄kọri. Ke adianade do, esenyịn Ukpepn̄kpọ N̄wed Esop nnyịn ekeme ndidọhọ mbon en̄wen ẹn̄wam nnyịn. Nso edidiọn̄ ke edi ntem mme asiakusụn̄ oro ẹnyenede mbufiọk m̀mê mme asuanetop eken ndin̄wam nnyịn man inam ekese ke an̄wautom inyụn̄ itịm ikop idatesịt! Ndi obufa asuanetop odu ke Ukpepn̄kpọ N̄wed Esop nnyịn? Imekeme ndidọhọ enye asan̄a ye nnyịn.
5 Utom ukwọrọikọ Christian edi akakan utom oro ẹnamde mfịn. Nte nnyịn iwade “uwa ekọm” nnyịn inọ Jehovah, oyom inọ enye se ifọnde ikan. (Heb. 13:15) Edieke nnyịn isịnde ukeme inam n̄kọri ke utom ukwọrọikọ, nnyịn iyedi mme anamutom ‘emi mînyeneke n̄kpọ eke anamde nnyịn ikop bụt, itịmde isiak ikọ akpanikọ.’—2 Tim. 2:15.