Nịm Mme Ọkpọkpọ Utịtmbuba nọ Obufa Isua Utom
1 Nte afo omokop inemesịt aban̄a mme n̄kọri oro afo anamde ke n̄kan̄ eke spirit? Ọfọn ndika iso nnam n̄kọri ke n̄kan̄ eke spirit, edi emi oyom ukeme. Ndinịm mme utịtmbuba nnọ idem nnyịn ye mme ubon nnyịn esin̄wam. Utịtmbuba edi n̄kpọ oro owo esịnde ukeme ebịne. Man inem Jehovah esịt, ana mme utịtmbuba nnyịn ẹdu ke n̄kemuyo ye uduak esie. Ke ntre nnyịn inam ekikere Jehovah edi ekikere nnyịn inyụn̄ ibịne mme utịtmbuba ukara Abasi, kpa nte Jesus akanamde. (John 17:4) Ntem, nnyịn iyenen̄ede ikop idatesịt ye uyụhọ ke uwem nnyịn ke utom oro inamde inọ Jehovah.—John 15:10, 11.
2 Mme utịtmbuba ewe ke afo ekekeme ndisịm ke ndibịne mme ufọn n̄kpọ Obio Ubọn̄ ke isua utom oro ekebede? Ibat mbon oro ẹkenade baptism owụt nte ke ediwak owo ẹma ẹsịm mme utịtmbuba oro mmọ ẹkenịmde ẹnọ idemmọ. N̄ko, ediwak tọsịn owo ẹma ẹsịn enyịn̄ nte mme asiakusụn̄ unọ-un̄wam ye mme asiakusụn̄ ofụri ini. Ata ediwak owo ẹma ẹnam ndutịm ndinam utom ke ebiet emi udọn̄ okponde akan. Ndusụk nditọete ẹma ẹsịm utịtmbuba oro mmọ ẹkenịmde ke ini ẹkekotde mmọ ẹdi Bethel m̀mê ẹdi Ufọkn̄wed Unọ Mme Asan̄autom Ukpep.
3 Mme Utịtmbuba Oro Afo Ekpekerede Aban̄a: Nte mme utịtmbuba oro ẹdotde ẹdu oro afo ekemede ndisịm? Man mbufa owo ẹkeme ndinam eti n̄kọri eke spirit, ndidụk mbonoesop kpukpru ini nnyụn̄ ntiene mbuana ke Ufọkn̄wed Utom Ukara Abasi ẹkpedi nti utịtmbuba. Edieke edide afo usunọhọ ibọrọ kpukpru ini ke mme mbonoesop, ntak mûnamke oro edi utịtmbuba fo? Mmọ en̄wen ẹkeme ndibọ ufọn nto ukpepn̄kpọ ye ndụn̄ọde fo, ndien ifiọk akpanikọ fo ọyọkọri.—Heb. 10:24, 25.
4 Nte afo omodot nditọn̄ọ mbuana ke an̄wautom? Nte afo ke anam ntre kpukpru ini? Nte afo ke okot mbufa n̄wed nte mmọ ẹwọrọde ẹdi, man ọbọ eti item otode asan̄autom emi anamde akpanikọ? Edieke edide afo emesesịm mme utịtmbuba oro, do nte uyakidem nnọ ye baptism ikpedịghe mme utịtmbuba oro ẹdotde afo ndikere mban̄a?
5 Nte afo ke enịm ukpepn̄kpọ Bible? Nte afo ọmọbọn̄ akam oyom un̄wam man ekeme nditọn̄ọ kiet? Nte afo ke aka iso anam mme mfiakn̄ka ifịk ifịk, enyịmede ndikpep n̄kpọ ye mbon oro ẹnyenede udọn̄ emi afo osobode? Edieke owo oro afo ekpepde n̄kpọ odotde ndibuana ke utom an̄wautom, nte afo ke ọnọ enye ukpep ke utom ukwọrọikọ?
6 Nte afo emenịm utịtmbuba ke mme hour oro afo edinọde ke ọfiọn̄ kiet kiet? Mîdịghe nte afo omodomo usiakusụn̄ unọ-un̄wam ese? Iso-ọfọn afo amakam odu ke idaha nditọn̄ọ utom nte asiakusụn̄ ofụri ini, abuanade eti mbụk ye mmọ en̄wen ke hour 70 ke ọfiọn̄. Nte ini akade, afo emekeme ndikop idatesịt ndibọ mme ufọn nto akpan ukpep ẹnọde ke Ufọkn̄wed Utom Usiakusụn̄. Nditọete iren ẹkpenyene ndinyanade mbịne ifet edinam n̄kpọ nte mme asan̄autom unamutom ye mbiowo.—1 Tim. 3:1.
7 Mme ọkpọkpọ utịtmbuba oro nnyịn inịmde inọ idem nnyịn ẹkpenyene ndinam nnyịn itịm ikpere Jehovah onyụn̄ ayak nnyịn itịm ibuana ọyọhọ ọyọhọ ke ndinam uduak esie. Paul ọkọdọhọ ke imọ ima ‘ifre se idude imọ ke edem, inyụn̄ inyanade ibịne se inade imọ ke iso.’ Enye ama esịn udọn̄ ọnọ nnyịn ndinyene in̄wan̄-in̄wan̄ ekikere mban̄a mme edinam ukara Abasi man “ke udomo oro nnyịn ima ikanam n̄kọri,” nnyịn ‘ikpaka iso itịm isan̄a ke ido emi kpasụk ntre.’—Phil.3:13, 16, NW.