Nam Akpanikọ ke Ndikwọrọ Ikọ Kpukpru Ini
1 Jesus ama ọsọn̄ọ etịn̄ ke ntịn̄nnịm ikọ esie oro aban̄ade utịt ini ete: “Ẹnyene ndibem iso n̄kwọrọ eti mbụk ke kpukpru idụt.” (Mark 13:10) Ke ntem, Jesus ama anam an̄wan̄a nte ke utom ukwọrọikọ ye edinam mbet ẹdidi akakan utom ke uwem mbet imọ oro ẹdidude ke ini edidu imọ, ke utom emi ayakan kpukpru orụk utom eken, ndien ke owo ididaha mbre isịn ke ndinam enye. Ntem, ana nnyịn ikpebe mme Christian akpa isua ikie inyụn̄ isịn idem inam utom emi ke ofụri ukpọn̄ tutu utịt edi. (1 Cor. 9:16; Matt. 24:14) Didie ke nnyịn ikeme ndinam akpanikọ nnyụn̄ n̄wụt ke imada utom Abasi emi ke akpan n̄kpọ?
2 Nam Kpukpru Ini: Jehovah enen̄ede odot se ẹberide edem, enye edi “Abasi akpanikọ.” (Deut. 32:4) Nte mme andikpebe Abasi, ikọt Abasi eke eset, utọ nte Daniel, ‘ẹma ẹnam n̄kpọ Jehovah kpukpru ini.’ (Dan. 6:20) Ana nnyịn n̄ko inam akpanikọ inyụn̄ inam n̄kpọ Jehovah kpukpru ini, akpan akpan ke utom ukwọrọikọ nnyịn. Emi ọwọrọ ete ke ana ikwọrọ ikọ kpukpru ini inyụn̄ itọt kpukpru se inamde. Jehovah edi Abasi ye Andinyan̄a “mme anam-akpanikọ.” (1 Tim. 4:10) Oyom inam akpanikọ man ẹnyan̄a nnyịn. (Men Ediyarade 7:15 domo.) Sia edinam akpanikọ edide ata akpan n̄kpọ ntre, ana ibiere ndikwọrọ ikọ kpukpru ini.
3 Ata asuanetop esikwọrọ ikọ kpukpru ọfiọn̄. N̄kpọ kiet emi owụtde ke imanam akpanikọ edi ndisọsọp nnọ ibatutom nnyịn ikaba ke ọfiọn̄. Owo ikemeke ndidọhọ ke owo emi ọkwọrọde ikọ edi mînọhọ ibatutom esie ke utịt ọfiọn̄ anam utom esie ama. Ndisọp nnọ nnennen ibatutom nnyịn ke ọfiọn̄ ke ọfiọn̄ owụt ke imanam akpanikọ, isịn ifịk, inyụn̄ ida utom Abasi nnyịn ke akpan n̄kpọ. Enye onyụn̄ owụt ke imesịn esịt ke utom ukwọrọikọ, ke imọfiọk nte enye edide akpan n̄kpọ, ke inam enye ye ifịk, ke inam enye usọp usọp, ye nte ke nnyịn ida utom emi nte Jehovah adade. (Ezek. 9:2, 11; 2 Tim. 4:2, 5) Ntre, ndi afo emesikwọrọ ikọ kpukpru ini?
4 Se Idin̄wamde Nnyịn Ikwọrọ Ikọ Kpukpru Ini: Mbiowo esop ẹsiwak nditi nnyịn ẹte ikwọrọ ikọ kpukpru ini. Mbọk bere ye mme esenyịn ye ewetn̄wed esop mbufo ke nditọt ibatutom fo nnennen nnennen ye ke eti ini ikaba ke ọfiọn̄. Nte ido edide, ẹsinọ ntọt ẹte mme asuanetop ẹnọ ibatutom an̄wautom mmọ. Nte mme anamikọ oro ẹkopde item, nnyịn imọfiọk ke edi mbiomo nnyịn ndinam ntre. Ke ofụri ererimbot, ẹnyịme mme asuanetop emi usọn̄, udọn̄ọ, m̀mê n̄kpọnnam mîyakke ẹwọrọ an̄wa, ẹtọt minit 15, m̀mê 30, m̀mê 45 nte ibatutom edieke mmọ mîkemeke ndinyene ofụri hour. Edieke n̄kpọ anamde nnyịn tutu nnyịn ikemeke ndiwọrọ an̄wa, ndi nnyịn ikpọbọhọ ọyọhọ ufọn ito san̄asan̄a ndutịm emi? Edieke inamde oro, emi oyowụt ke imanam akpanikọ ke se inamde inọ Abasi.—Jas. 1:22.
5 Ndikwọrọ Ikọ Kpukpru Ini Idiyakke Itek ke Ifịk: Asuanetop nditre ndinọ ibatutom ke ọfiọn̄ kiet kpọt owụt ke enye iwọrọke an̄wautom kpukpru ọfiọn̄. Edieke owo mînọhọ ibatutom ke ọfiọn̄ itiokiet, emi ọwọrọ ke enye iwọrọke an̄wautom aba. Owo nditre ndiwọrọ an̄wautom ekeme ndinam enye etek ke ifịk. Nnyịn ndomokiet iyomke ndidu ke utọ idiọk idaha eke spirit emi. Se ededi oro ikposobode, oyom nnyịn ika iso ikwọrọ ikọ kpukpru ini, isịn ifịk, in̄wụm mfri, inyụn̄ inam akpanikọ tutu esịm utịt.—Ps. 96:2.
6 Ndikwọrọ ikọ kpukpru ini an̄wam nnyịn ndiwụt mbuọtidem nnyịn, anam enye ọsọn̄, onyụn̄ ekpeme itie ebuana nnyịn ye Abasi. Ndinọ ibatutom nnyịn ke eti ini owụt ke imanam akpanikọ inọ Jehovah inyụn̄ isịn ifịk ke utom esie. Owo kiet kiet enyene mbiomo ke iso Jehovah ndinam oro. Ẹyak isịn ofụri ukeme ndien ika iso ikwọrọ Obio Ubọn̄ inyụn̄ ibabak inọ ibatutom nnyịn.—Ps. 61:8; Luke 10:17.