Ndibọp Mme Ukeuke Itie Utuakibuot Anam Ẹtoro Jehovah
1, 2. (a) Nso ke ikọt Abasi ẹnam man ẹse ẹban̄a n̄kọri oro odude ke mme akpatre usen emi? (b) Mme mbụme ewe ke ikpekere iban̄a ke afan̄ emi?
1 Nte esop Jehovah enen̄erede ọkọri ke ini editan̄ mbok emi anam ikọt esie mi ke isọn̄ ẹnam ukeuke ndutịm ke mme n̄kpọ. Ke mme isua ndondo emi, ẹma ẹnam mmemmem ndutịm ke nte ẹsuande n̄wed, nte ẹtịmde n̄kpri ye ikpọ mbono, ye nte ẹtịpde okụk ẹda ẹbọp m̀mê ẹdiọn̄ mme itie usopidem man ẹse ẹban̄a n̄kọri oro ẹkebemde iso ẹtịn̄ ẹban̄a. (Isa. 54:1-4; 60:22) Kpasụk ntre, ẹmekpụhọde nte ẹbọpde ẹnyụn̄ ẹdade mme itie utuakibuot ikọt Abasi ẹnam n̄kpọ man ẹnyene se ẹyomde.
2 Ke mme isua ndondo emi, ẹmebọp se iwakde ibe mbufa Ufọkmbono Obio Ubọn̄ 2,000 ye se ibede itie mbono 20 (mme Ufọkmbono Obio Ubọn̄ oro ẹsidade ẹnịm mbono n̄ko ye mme Ufọk Mbono) mi ke Nigeria. Didie ke ndibọp mme ukeuke itie usopidem etịp esịn ke emi? Ukeuke ndutịm ewe ke ẹnam ke mme itie utuakibuot emi? Didie ke ikeme ndise mban̄a mme utọ ukeuke itie usopidem emi?
Mme Ukeuke Itie Usopidem
3. Ukeuke ndutịm ewe ke ẹnam ke nte ẹbọpde mme Ufọkmbono Obio Ubọn̄?
3 Mme Ufọkmbono Obio Ubọn̄: Ata akpan n̄kpọ oro akanamde ẹtọn̄ọ ndutịm ubọp Ufọkmbono Obio Ubọn̄ ke mme idụt oro mînyeneke okụk, esịnede Nigeria, edi man ẹkeme ndibọp ata ediwak Ufọkmbono Obio Ubọn̄ oro ẹyomde. Man ẹkeme ndisọp mbọp ediwak Ufọkmbono Obio Ubọn̄, esop Abasi ọnọ ndausụn̄ ke nte ẹkpebọpde ẹnyụn̄ ẹbanade mmọ. Ukeuke itie usopidem oro inyenede ke idụt emi esịne edibon nnyan n̄kpọitie, editịbi nto m̀mê edibọp itie uken̄idem mbakara oro ẹsọrọde-sọrọ emi owo mîsịnke mmọn̄ esan̄ukwak, ediyet ndom mbakara ke ndusụk itie n̄kpọn̄ ndusụk, editre ndisịn ubet andikpeme Ufọkmbono Obio Ubọn̄, edida simen kpọt nsịn isọn̄, edibọp ọkọ itiat m̀mê edisịn dek ke ibat ibat ufọkmbono. Ke ofụri Nigeria, se ibede esop 3,000 ẹsinịm mbono esop mmọ eke urua ke urua ke utọ ukeuke ndiye ufọkmbono Obio Ubọn̄ emi ẹbọpde ntem.
4. Nso ukeuke ndutịm ke ẹnam ke nte ẹbọpde Mme Ufọkmbono Obio Ubọn̄ oro ẹsidade ẹnịm mbono n̄ko?
4 Mme Ufọkmbono Obio Ubọn̄ Oro Ẹsidade Ẹnịm Mbono N̄ko: Ikọt Abasi ẹsidụk n̄kpri ye ikpọ mbono ikata ke isua. Ke ndusụk ebiet ke Nigeria, nditọete ẹsisan̄a anyan usụn̄. Ke mme ebiet efen, ndusụk mmọ ẹsibe mmọn̄ man ẹkedụk mme mboho emi. Man nditọete emi ẹnyene itie mbono emi odotde, ẹmebọp ediwak Ufọkmbono Obio Ubọn̄ oro ẹkemede ndida nnịm mbono n̄ko. Mme ukeuke ufọkmbono emi ẹnyene mbot utịn̄ikọ oro mîkon̄ke idaha, mme efe oro mînyeneke ibibene, isọn̄ emi edide ukem ukem, ye nnyan n̄kpọitie oro mînyeneke uberi-edem. Sia mmọ mîkemeke ndidụk ediwak owo, ẹsibahade ndusụk circuit ke itie ke itie man ẹdụk n̄kpri mbono mmọ.
5. (a) Ukeuke ndutịm ewe ke ẹnam idahaemi ke mme Ufọk Mbono? (b) Ini ewe ke ẹnyịme ẹbọp mme ufọkidụn̄?
5 Mme Ufọk Mbono: Ke ini circuit emi ẹwakde ẹkem ẹyomde ufọk mbono, n̄kọk itieutom eyekere aban̄a ndibọp Ufọk Mbono. Ke adan̄aemi ẹkụrede n̄kani Ufọk Mbono oro owo mîkọbọpke ikụre, ke ẹbọp mbufa n̄ko ke ukeuke usụn̄. Mmọ ẹdi n̄kpri efe mbono emi mînyeneke ibibene, emi isọn̄ n̄kan̄ kiet okon̄de, emi ẹnyenede ibat ibat itieutom, ye itie uken̄idem mbakara oro ẹsọrọde-sọrọ emi owo mîsịnke mmọn̄ esan̄ukwak. Adianade do, ke mme ebiet oro enen̄erede ọsọn̄ ndibọ ufọkidụn̄ ke mbọhọ, ẹkeme ndibọp ufọkidụn̄ kiet m̀mê iba. Mme ufọkidụn̄ emi ẹsinyụn̄ ẹdi mme ukeuke ufọk emi ẹdade simen kpọt ẹkọk ibibene ẹnyụn̄ ẹsịn isọn̄. Owo ibọpke mmọ man kpukpru mme andidụk n̄kpri ye ikpọ mbono emi ẹyomde itieidụn̄ ke itie mbono ẹkpedụn̄, edi ẹbọp mmọ ẹnọ mbon oro ẹnen̄erede ẹyom itieidụn̄. Ke ndusụk ebiet emi ẹdiyomde ufọkidụn̄ awak akan se idude, ẹdori enyịn ke itieutom unọ ufọkidụn̄ ẹyebọ ufọk efen efen ke mme ufọk owo, ke ufọkisen, ke ufọkn̄wed, m̀mê ke mme itie en̄wen.
Ndibọp Mme Ukeuke Itie Usopidem Ada Nti Utịp Ẹdi
6. Nso utịp ke ndibọp mme ukeuke itie usopidem nnyịn ada edi?
6 Nso utịp ke edibọp mme ukeuke itie usopidem ada edi? Emi anam esop Abasi ekeme ndida okụk oro odude mbọp ediwak itie utuakibuot. Ntem, ediwak nditọete ẹnyene nti itie usopidem. (2 Cor. 8:10-15) Ndibọp n̄kpọ ke mmemmem usụn̄ oro mme owo ẹmehede nnyụn̄ n̄kama mme n̄kpọutom oro ẹdiọn̄ọde anam ediwak owo ẹnọ idem unyịme unyịme ke ini ẹnamde utom, onyụn̄ anam utom ọsọp okụre. Sia ọkpọsọn̄ ndudiọn̄ mîdụhe, esimem utom onyụn̄ emem urua nditịm se ẹbọpde n̄kama, ntre mme esop ye mme circuit ẹsikeme ndinam se ẹyomde mmọ ẹnam ke afan̄ emi.—Gal. 6:5; Phil. 1:10.
7, 8. Ndi Jehovah ọdiọn̄ ukeme nnyịn ndida ukeuke usụn̄ mbọp n̄kpọ? Nọ uwụtn̄kpọ.
7 Eyịghe idụhe nte ke Jehovah ke ọdiọn̄ ndutịm edibọp mme ukeuke itie utuakibuot emi. Ke utịt ọfiọn̄ March 2008, ẹma ẹbọp Ufọkmbono Obio Ubọn̄ 16,992 ke idụt 114 tọn̄ọ nte ẹketọn̄ọ ndutịm emi ke November 1999. Ke otu ofụri ibat emi, ẹkebọp 2,011 ke Nigeria. Ke ukem ini oro, ẹma ẹkụre itie mbono 25 ke Nigeria—kpa mme Ufọkmbono Obio Ubọn̄ oro ẹsidade ẹnịm mbono n̄ko ye mme Ufọk Mbono. Kpukpru emi ẹtịp ẹsịn ke ndinam ẹdiọn̄ọ enyịn̄ ye Obio Ubọn̄ Jehovah.
8 Ke ini ẹkebọpde Ufọkmbono Obio Ubọn̄ kiet ke Delta, ata ediwak mme asuanetop ẹma ẹkọbi ufọkurua mmọ man ẹkenam utom do. Usen kiet, owo emi enyenede udọn̄, emi eketienede akanam utom do ama ọdọhọ ke utom usen oro ama okokụre ete: “Mbufo ẹnyene akpanikọ. N̄kpama ndidi ọyọhọ ọyọhọ owo ufọkabasi mbufo.” Enye ama anam n̄kọri ke ukpepn̄kpọ esie, ndien ikebịghike ama odot ndidi asuanetop oro mînaha baptism. Ke ini ọbọn̄ obio kiet ke Akwa Ibom okokopde ke ẹma ẹn̄wan̄a n̄kwa itiat emi ẹkeyomde ndida mbọp Ufọkmbono Obio Ubọn̄ ẹbon ke ebiet emi oyomde usụn̄ ọkpọn̄ itie ubọpufọk oro ke ntak idiọk usụn̄, enye ama ọdọhọ ofụri obio ẹkenam utom ke usụn̄ oro ke urua kiet. Ẹma ẹtan̄ itiat ẹsịri mme itịghede oro ẹkeyọhọde usụn̄ oro. Adianade do, enye ama ayak n̄wan ye eyen esie ẹsitiene ẹdụk mbono esop. Enye ọkọdọhọ ete: “Esịt enen̄ede enem mi ke utọ n̄kpọ emi etịbe ke obio mi.”
Ndibere ye Ndutịm Ubọp Mme Ukeuke Itie Usopidem
9. Usụn̄ ita ewe ke nnyịn isisịn un̄wam ke mme itie usopidem nnyịn?
9 Sia idide ikọt Jehovah, nnyịn iyom ndinọ ndutịm emi ibetedem ke ofụri esịt. Mme itie utuakibuot emi ẹkotde enyịn̄ Jehovah ẹdian ẹdi ọsọn̄urua n̄kpọ ẹnọ nnyịn. Nnyịn iyomke mmọ ẹsụhọde utuakibuot nnyịn itie. Ntre nso ke ikeme ndinam? Nnyịn imekeme ndibuana (1) ke nditịm mmọ n̄kama, (2) ke ndida mmọ nnam se ẹkebọpde mmọ ẹnọ, ye (3) ke nditịp n̄kpọ ke ndida mmọ nnam n̄kpọ inyụn̄ itịp n̄kpọ man ẹda ẹtịm mmọ ẹkama. Kpa nte mme anam-akpanikọ asan̄autom Abasi ke eset, nnyịn n̄ko iyom ‘ndinam ntem’ ke afan̄ emi.—Gen. 6:22; Ex. 7:6.
10. Ke mme usụn̄ ewe ke nnyịn ikeme ndibuana ke editịm mme itie usopidem nnyịn n̄kama?
10 Editịm N̄kama: Esiyom ẹtịm kpukpru ufọk ẹkama, ndien emi esiyom okụk. Oyom mme owo ẹtịp n̄kpọ ẹnyụn̄ ẹnọ idem unyịme unyịme man ẹnam emi. Edi n̄kpọ ukpono ndinam mbiba. Mbiowo ẹsinam ndutịm ke ubọk ke ubọk ẹnọ se ẹdinamde man ẹtịm Ufọkmbono Obio Ubọn̄ ẹkama. Emi ekeme ndisịne edikpọri isọn̄ ke ini kpukpru mbono esop asuanade, edinen̄ede nyet ufọkmbono ke ọfiọn̄ ke ọfiọn̄, editem mbiet, edidiọn̄ mme flawa, ndien ndusụk ini ndinam akwa utom nte edifiak nyet ndom mbakara nnyụn̄ ndiọn̄ mme n̄kpọ oro ẹbiarade. Man ẹtịm Ufọk Mbono ẹkama, ẹsikot mme circuit m̀mê mme esop ke ini ke ini ẹditiene ẹnam an̄wa mbono asana ẹnyụn̄ ẹdiọn̄ mme n̄kpọ. Ndusụk ini, ẹsikot mbon oro ẹnyenede ubọkutom utọ nte mme esịn mmọn̄ esan̄ukwak, mme esịn ikan̄ ilektrik, mme ọkọkufọk, mme anamusọ eto, ye ntre ntre eken ẹte ẹdidiọn̄ mme n̄kpọ. Nnyịn iwụt ke imebere ye ndutịm emi ke ndinọ idem unyịme unyịme nnyụn̄ nda usọ nnyịn nnam n̄kpọ uforo uforo ini ekededi oro ẹkotde nnyịn, edide ke Ufọkmbono Obio Ubọn̄ m̀mê ke itie mbono nnyịn.—Ps. 110:3.
11. Didie ke ikeme ndiwụt ukpono nnọ itie utuakibuot nnyịn ke ini idụkde mme mbono esop ye ke ini idụkde n̄kpri ye ikpọ mbono?
11 Ndida Mmọ Nnam N̄kpọ ke Eti Usụn̄: Nnyịn iyom ndida mme itie usopidem nnyịn nte itie utuakibuot. Oro ọwọrọ ndikama idem nnyịn ke usụn̄ oro owụtde ukpono ye esịtekọm ọnọ mme n̄kpọ eke spirit. (1 Cor. 10:31) Ke uwụtn̄kpọ, ndidiọk ndikama itie uken̄idem ekeme ndinam ẹbiat ediwak okụk. Ndibaha mmọn̄ ekeme ndinam mbon en̄wen inyeneke mmọn̄ onyụn̄ osụn̄ọ ke ndibiat okụk oro nditọete ẹketịpde. Ndikama ifia ntem udia m̀mê mfiọk mbakara oro esisiode nsụn̄ikan̄ idiọk idiọk ekeme ndibiat uyai itie utem udia. Ọfọn ẹnen̄ede ẹtiene ndausụn̄ oro ẹnọde ke nte ẹkpekamade mme itie emi. Ẹkpenyene ndida kpukpru n̄kpọ ke mme itie usopidem nnyịn, esịnede mme itieutom ke Ufọk Mbono, nnam se ẹkenịmde mmọ ẹnọ. Ke Ufọk Mbono kiet, ẹma ẹda ata ediwak okụk ẹdiọn̄ n̄kpọ oro eyenọwọn̄ akabiatde ke itie uken̄idem. Mmọdo, mfefere ababru unam ndek kpọt ye mmọn̄ ke ẹkpekama ke itie uken̄idem mbak edisịre. Ke mme Ufọk Mbono ye mme Ufọkmbono Obio Ubọn̄, ndifak ọkpọkpọ n̄kpọ ke ikan̄ ilektrik, esịnede urụk ukopikọ oro ẹkamade-kama ẹsan̄a, esitịmede mme owo inyụn̄ iyakke odudu ikan̄ ilektrik oro odude ekem. Ẹyak mme itie usopidem nnyịn ẹnọ Jehovah, ntre ẹkpenyene ndida enye nte itie utuakibuot kpọt. Owo ndomokiet ikpadaha ini emi enye akade do inam mbubehe esie. Akpana inam ofụri se ikekeme man edu uwem nnyịn ye eke nditọ nnyịn ke mme ebiet emi ẹtịn̄ eti n̄kpọ ẹban̄a utuakibuot akpanikọ.
12. M̀mọ̀n̄ ke ẹsida okụk emi ẹdade ẹse ẹban̄a mme itie usopidem nnyịn? (Se ekebe emi odude ke page 5 ye enye emi odude mi ke idak.)
12 Etịbe: Man ẹnyene okụk oro ẹdidade ẹse ẹban̄a ẹnyụn̄ ẹtịm mme Ufọkmbono Obio Ubọn̄ ẹkama, nnyịn imesisịn mme etịbe ke ekebe emi ẹwetde “Local Congregation Expenses” (Okụk Emi Esop N̄kann̄kụk Edibiatde) ke Ufọkmbono Obio Ubọn̄. Man ẹnyene okụk oro ẹdidade ẹse ẹban̄a ẹnyụn̄ ẹtịm mme itie mbono ẹkama, nnyịn imesisịn etịbe ke ekebe etịbe ke itie mbono ke ini idụkde mme mbono circuit ye mme usen akpan mbono. (Se ekebe oro odude ke page 5 ye enye emi odude mi ke idak, emi ẹnamde mme etịbe emi isitịpde man ẹda ẹse ẹban̄a mme itie usopidem nnyịn ẹn̄wan̄a.) Nnyịn ikpese emi didie? Nnyịn ikpese emi nte ubak utuakibuot oro ituakde inọ Jehovah.—N̄ke 3:9, 10; 2 Cor. 9:7.
13, 14. Nte owo kiet kiet ye nte otu, didie ke nnyịn ikeme ndiwụt ke imebere inyụn̄ iyụhọ ye ukeuke ndutịm ubọpufọk emi?
13 Nnyịn iyomke ‘ubọk emem’ nnyịn m̀mê ‘ndikpọn̄ ufọk Abasi nnyịn’ ke nditre nditịp etịbe kpukpru ini man ẹda ẹse ẹban̄a mme itie usopidem nnyịn. Ntre ke iwụt esịtekọm inyụn̄ iwụt ke ọdọn̄ nnyịn mbon efen ẹtiene ẹbọ ufọn ndutịm emi. (2 Chron. 15:7; Neh. 10:32, 39b) Ẹsinyam isọn̄ m̀mê ufọk oro owo mîdidaha inam n̄kpọ man ẹda okụk oro ẹsịn ke ndutịm ubọp ufọkmbono. Ọkpọkọm ndusụk owo ẹdiyom mme Ufọkmbono Obio Ubọn̄ emi ẹkponide ẹnyụn̄ ẹwakde n̄kukọhọ ẹkan, nnyịn imoyụhọ ye ukeuke ndutịm emi nnyịn inyenede, emi ẹbọpde ekekem ye nte n̄kpọ etiede ke obio kiet kiet. (2 Cor. 8:14, 15) Ke ini n̄kpọ abiarade, ẹkpenyene ndidiọn̄ mmọ usọp usọp mbemiso n̄kpọ efen adiana.
14 Nnyịn idu uwem ke ata n̄wọrọnda ini emi ikọt Abasi ẹsịnde ifịk ẹnam utom. ‘Imenyene mbuọtidem ke ẹyenam’ se inemede ke esịne-esịt emi, imenịm ke mbufo ndinyịme ndida usọ mbufo nnam utom, nditiene ntịp okụk, ndinyụn̄ nda mme itie usopidem nnyịn nnam n̄kpọ ke eti usụn̄ ẹyewụt ke ẹmenyịme nditiene ndausụn̄ esop Jehovah.—Philem. 21.
[Ekebe ke page 5]
MME ETỊBE KABAN̄A MME UFỌKMBONO OBIO UBỌN̄
◼ Kaban̄a Ufọkmbono Obio Ubọn̄ Oro Ẹdibọpde ke Ini Iso: Mme esop oro ẹduakde ndibọp Ufọkmbono Obio Ubọn̄ ẹkeme ndibiere ndisisio okụk nnịm nnọ emi. Ẹsịn etịbe enye emi ke ekebe oro ẹwetde “Local Congregation Expenses” (Okụk Emi Esop N̄kann̄kụk Edibiatde) ke Ufọkmbono Obio Ubọn̄. Ẹda Contribution Remittance Form (S-20) ẹnọ etịbe emi ẹsọk n̄kọk itieutom ke utịt ọfiọn̄ kiet kiet.
◼ Kaban̄a Edida Ufọkmbono Obio Ubọn̄ Nnam N̄kpọ: Kpukpru esop oro ẹbọpde Ufọkmbono Obio Ubọn̄ mmọ ẹma ẹsibiere nditịp okụk ke ọfiọn̄ ke ọfiọn̄ nnọ ẹsọk n̄kọk itieutom ke ndida Ufọkmbono Obio Ubọn̄ oro nnam n̄kpọ. Ẹsịn etịbe enye emi ke ekebe oro ẹwetde “Local Congregation Expenses” ke Ufọkmbono Obio Ubọn̄. Ẹda Contribution Remittance Form (S-20) ẹnọ etịbe emi ẹsọk n̄kọk itieutom ke utịt ọfiọn̄ kiet kiet.
◼ Kaban̄a Ndutịm Edinọ Un̄wam ke Ini Mfịna Odude ke Ufọkmbono Obio Ubọn̄: Kpukpru esop oro ẹnyenede Ufọkmbono Obio Ubọn̄ ẹsibiere nditịp okụk ke ọfiọn̄ ke ọfiọn̄ kaban̄a ndutịm emi man ẹkeme ndida okụk do ndiọn̄ Ufọkmbono Obio Ubọn̄ oro unọmọ esịmde m̀mê ndida nse mban̄a mfịna emi ẹtịbede do. Ẹsịn etịbe enye emi ke ekebe oro ẹwetde “Local Congregation Expenses” ke Ufọkmbono Obio Ubọn̄. Ẹda Contribution Remittance Form (S-20) ẹnọ etịbe emi ẹsọk n̄kọk itieutom ke ọfiọn̄ ke ọfiọn̄ m̀mê ke isua ke isua.
◼ Kaban̄a Okụk Oro Ẹdade Ẹse Ẹban̄a Ufọkmbono Obio Ubọn̄: Esop kiet kiet enyene nditịp okụk oro ẹdade ẹse ẹban̄a Ufọkmbono Obio Ubọn̄ ke ibio ini m̀mê ke anyan ini. Ini kiet ke isua otu mbiowo ẹsidụn̄ọde ẹnyụn̄ ẹsian esop se ẹyomde ke ọfiọn̄ ke ọfiọn̄ man ẹda ẹnam emi. Ẹsịn etịbe enye emi ke ekebe oro ẹwetde “Local Congregation Expenses” ke Ufọkmbono Obio Ubọn̄. Ẹsịn udọn̄ ẹnọ mme esop ndisịn okụk emi ke ban̄k. Mîdịghe mmọ ẹkeme ndinọ okụk emi ẹsọk n̄kọk itieutom enịm ọnọ mmọ.
◼ Kaban̄a Edibọp Ufọkmbono Obio Ubọn̄ ke Ofụri Ererimbot: Ẹda etịbe emi ẹbọp Ufọkmbono Obio Ubọn̄ ke idụt emi ye ke mme ebiet en̄wen. Ẹsịn etịbe enye emi ke ekebe oro ẹwetde “Kingdom Hall Construction Worldwide” (Etịbe Kaban̄a Edibọp Ufọkmbono Obio Ubọn̄ ke Ofụri Ererimbot) ẹsinyụn̄ ẹsion̄o etịbe emi ẹnọ ẹsọk n̄kọk itieutom ini kiet ke ọfiọn̄. Kpukpru esop ẹnyene ifet nditiene ntịp etịbe emi, ọkpọkọm mmọ ke ẹbọp itie utuakibuot mmọ ke ubọk. Owo inịmke ekebe emi man ẹsịn etịbe edida Ufọkmbono Obio Ubọn̄ nnam n̄kpọ, edi man ẹsịn etịbe kaban̄a mme Ufọkmbono Obio Ubọn̄ oro ẹbọpde ke ofụri ererimbot.
[Ekebe ke page 6]
MME ETỊBE KABAN̄A MME ITIE MBONO
◼ Kaban̄a Edida Itie Mbono Nnam N̄kpọ: Kpukpru esop ẹnam ubiere ndisitịp okụk ke ọfiọn̄ ke ọfiọn̄ nnọ ẹsọk n̄kọk itieutom ke mmọ ndidụk mbono ke itie mbono oro, edide Ufọk Mbono m̀mê Ufọkmbono Obio Ubọn̄ oro ẹsidade ẹnịm mbono n̄ko. Ẹsịn etịbe enye emi ke ekebe oro ẹwetde “Local Congregation Expenses” ke Ufọkmbono Obio Ubọn̄. Ẹda Contribution Remittance Form (S-20) ẹnọ mme etịbe emi ẹsọk n̄kọk itieutom ke utịt ọfiọn̄ kiet kiet. Ẹda kpukpru okụk oro ẹsịnde ke ekebe etịbe ke ikpọ mbono ẹsịn ke utom ofụri ererimbot, emi esịnede edibọp mme Ufọk Mbono ye mme Ufọkmbono Obio Ubọn̄.
◼ Kaban̄a Okụk Oro Ẹdade Ẹse Ẹban̄a Itie Mbono: Circuit kiet kiet enyene nditịp okụk oro ẹdade ẹse ẹban̄a itie mbono ke ẹma ẹkedụn̄ọde se ẹyomde ke isua ke isua. Asuanetop kiet kiet esitịp n̄kpọ man ẹda ẹnam emi ke itie mbono ke ini mmọ ẹdụkde mbono circuit ye usen akpan mbono. Ke ini okụk mîdụhe, utọ nte ke ini okụk emi mme circuit etịpde mîkemke, esenyịn circuit ọyọdọhọ mme esop ẹnam ubiere ẹnyụn̄ ẹtịp okụk man ẹda ẹnam se owo mîkenyeneke okụk inam.—Se od-EF, page 130.
[Ndise ke page 3]
Ufọkmbono Obio Ubọn̄ oro ẹsidade ẹnịm mbono n̄ko ke Kaduna
[Ndise ke page 4]
Ufọkmbono Obio Ubọn̄ Mayowa
[Ndise ke page 5]
Ufọk Mbono Benin City