Ukwọrọikọ Oyom Ime
1 Apostle Paul ama okop uyụhọ ke ndida utom ukwọrọikọ nte akpan utom esie ke se ibede isua 30. Nte esidide ye n̄kpọ ekededi oro anade ẹnam, enye ama osobo afanikọn̄ ke utom ukwọrọikọ esie. (2 Cor. 11:23-29) Edi Paul ikakpaha mba. (2 Cor. 4:1) Enye ama ọdiọn̄ọ ke Jehovah ọyọnọ imọ ukeme ndiyọ ke adan̄aemi inamde utom ukwọrọikọ imọ. (Phil. 4:13) Sia Paul ekenịmde eti uwụtn̄kpọ ke ndime ime, enye ama ekeme ndidọhọ ete: “Ẹkabade ẹdi mme andikpebe mi, kpa nte ami n̄kpebede Christ.”—1 Cor. 11:1.
2 Ndiyọ Mme Idomo Mfịn: Usen kiet kiet, ẹsisak ẹnyụn̄ ẹbiọn̄ọ ediwak nditọete nnyịn; mbonubon, mme nsan̄autom, m̀mê nditọ ufọkn̄wed mmọ isinyụn̄ inyeneke udọn̄. (Matt. 10:35; John 15:20) Ekeme ndidi emi esitịbe n̄ko ọnọ fi. Ke n̄kan̄ eken, ekeme ndidi mfịna fo edi unana nsọn̄idem, onyụn̄ ekeme ndidi editịmede esịt ye mme idomo emi ẹdomode mbuọtidem ye ime fo. Nnyịn ndikere mban̄a uwụtn̄kpọ mme anam-akpanikọ asan̄autom Abasi ke eset ye uwụtn̄kpọ ekemmọ mme Christian mfịn emi ẹkesobode ẹnyụn̄ ẹkande mme n̄kpọ-ata ekeme ndinọ nnyịn odudu.—1 Pet. 5:9.
3 Nnyịn imekeme ndinyene odudu ndisọn̄ọ nda n̄kaiso ke utom ukwọrọikọ nnyịn edieke ‘imende ofụri n̄kpọekọn̄ Abasi isịne.’ (Eph. 6:10-13, 15) Edi akpan n̄kpọ n̄ko ndibọn̄ akam mben̄e ime. Abasi esinọ nnyịn edisana spirit esie man ikeme ndiyọ mme idomo. (2 Cor. 6:4-7) Man ikụt unen ke ekọn̄ eke spirit nnyịn, ana nnyịn inam item Abasi inyụn̄ ikop odudu ke n̄kan̄ eke spirit. (Ps. 119:24, 85-88) Nte eyenọwọn̄ ekemede ndikot mfiak n̄kot leta emi edima ete esie ekewetde ọnọ ẹsọk enye, nnyịn ndikot Bible ke usen ke usen ọsọn̄ọ itie ebuana nnyịn ye Jehovah. Edieke ikpepde n̄kpọ kpukpru ini, nnyịn iyenyene ọniọn̄ ndiyọ mme idomo, ntem iyakde ekikere Abasi akara mme ubiere oro inamde onyụn̄ an̄wam nnyịn isọn̄ọ ida.—N̄ke 2:10, 11.
4 Ime Esida Mme Edidiọn̄ Edi: Nte ekedide ye Paul, nnyịn ndime ime nnam utom ukwọrọikọ nnyịn esinam esịt Jehovah adat onyụn̄ ada edidiọn̄ ọsọk nnyịn ye mbon efen. (N̄ke 27:11) Ẹyak nnyịn ikam ibiere ndisịn ifịk n̄kwọrọ ikọ inyụn̄ iwụt ke imenyene ata ọkpọsọn̄ mbuọtidem emi ọsọn̄de “urua akan gold eke abiarade kpa ye oro ẹma ẹkeda ikan̄ ẹdomo enye ẹwụt.”—1 Pet. 1:6, 7.