Mbono District Mme Ntiense Jehovah eke 2010
1. Ntak emi ikpanamde ndutịm man idụk mbono district eke 2010 ke ofụri usen ita oro?
1 Nnyịn ke itie ye ọkpọsọn̄ udọn̄ ibet akwa usọrọ eke spirit oro idinyenede ke mbono district eke 2010. Ẹsịn udọn̄ ẹnọ kpukpru owo ndidụk mbono emi ofụri usen ita. Do ke nnyịn idisịn udọn̄ inọ kiet eken ndisan̄a ke nsọn̄ọnda nnyụn̄ nda Jehovah nte otuekọn̄ nnyịn. (Ps. 26:1, 11, NW; N̄ke 2:7, NW) Babak nam mme andikpep ye mme eteutom ẹdiọn̄ọ ke mbono emi edi akpan ikpehe ke utuakibuot fo. Ke ini ọtọn̄ọde idahaemi anam ndutịm, onyụn̄ an̄wamde mbon en̄wen ẹnam eke mmọ edieke oyomde, Jehovah iditreke ndidiọn̄ ukeme oro afo esịnde.—Ps. 37:5; N̄ke 10:22.
2. M̀mọ̀n̄ ke ikeme ndikụt mme obio mbono district, ndien didie ke ikeme ndinyene ufọkidụn̄?
2 Ndibụp N̄kpọ Mban̄a Mbono: Kpukpru mbono district oro idinyenede oyodu ke ikpehe ndutịm Intanet nnyịn, www.jw.org. Edieke anade odụk mbono emi owo mîdemeke esop mbufo isịn, emekeme ndibọ Room Request Form. Wet n̄kpọ yọhọ babru emi nyụn̄ nọ ẹsọk nnennen adres oro odude ke edem Room Request Form eke ndondo emi. Ẹyenọ mme babru emi ẹsọk mme ewetn̄wed esop ke mîbịghike.
3. Didie ke ikpan̄wam mbon oro ẹyomde san̄asan̄a un̄wam?
3 San̄asan̄a Un̄wam: Ndi ọmọfiọk owo ke esop mbufo oro oyomde ẹkpe usụn̄ uka ye unyọn̄ọ mbono ẹnọ enye? Ntak mûn̄wamke enye? (N̄ke 19:17) Ke ini asuanetop oyomde ẹn̄wam imọ ẹbọ ufọkidụn̄, Kọmiti Utom Esop eyebiere m̀mê enye odot ndiwet n̄kpọ nyọhọ ikpehe “Special Needs” ke Room Request Form. Mmọ ẹkpenyene ndidụn̄ọde ndausụn̄ oro ẹnọde ke babru oro mbemiso ewetn̄wed esop ọnọde babru emi ẹsọk Itieutom Unọ Ufọkidụn̄ Mbono.
4. (a) Nso ndutịm ke ẹnam ẹnọ ufọkidụn̄ ke mbono kiet kiet? (b) Nso ke ẹti nnyịn man ika iso inyene eti enyịn̄ ke ebiet ekededi emi nnyịn idụn̄de? (Se ekebe ke page 6, “Mme Item Oro Ẹnọde Mme Andiyom Ufọkidụn̄.”)
4 Ufọkidụn̄: Man efere mbufo ke idem, ẹyenam ndutịm ndinọ ufọkidụn̄ ke mme obio mbono kiet kiet. Ufọk esidu ke ndusụk itiembono, edide ufọk ibio ini m̀mê dọmitri oro ẹbọpde man mme owo ẹsidụn̄. Ẹkeme ndibọ ufọk nnọ ndusụk owo ke mme ọkpọkpọ ufọkidụn̄ mme owo. Ẹyebọ ufọkisen ẹnọ mbon oro ẹdiyomde. Ke itie ekededi oro ẹnọde fi, afo ekpenyene ndibere ye Itieutom Unọ Ufọkidụn̄.
5. Mme edidiọn̄ ewe ke idori enyịn ndibọ ke mbono district eke 2010?
5 Iyenyene akwa ifet ndibọ item Abasi inyụn̄ inyene inem inem itie ebuana ye nditọete nnyịn ke mbono district nnyịn emi isinịmde ini kiet ke isua mi. (Deut. 16:15) Jehovah akpakam ọdiọn̄ ukeme nnyịn ke adan̄aemi itịmde idem ndidụk mme mbono district eke 2010!
[Ekebe ke page 5]
Mme Ini Edinam:
Friday ye Saturday
9:20 usenubọk - 4:55 mbubreyo
Sunday
9:20 usenubọk - 3:40 mbubreyo
[Ekebe ke page 6]
Mme Item Oro Ẹnọde Mme Andiyom Ufọkidụn̄:
◼ Ẹnyịme ndibọ itieidụn̄ oro Itieutom Unọ Ufọkidụn̄ ọnọde. Ẹkûdụn̄ ke mme ufọkidụn̄ edieke Itieutom Unọ Ufọkidụn̄ mîdọhọke mbufo ẹdụn̄ do. Ẹkûyak ibat owo oro ẹdụn̄de do awak akan se ẹkenyịmede.
◼ Ẹkûdụk mme itie oro ẹdọhọde mme owo ẹkûdụk ke itie oro mbufo ẹdude. Ẹtem udia n̄kukụre edieke ẹnyịmede ẹnam oro ye ke itie oro ẹdọhọde ẹtem.
◼ Kûnọ enyene-ebiet okụk awak akan se Itieutom Unọ Ufọkidụn̄ ọkọnọde man afo enyene itieidụn̄.
◼ Ke anamde ọkpọkpọ ndutịm man enyene itieidụn̄, mbọk bụp Itieutom Unọ Ufọkidụn̄ mbak afo udubọ ufọkidụn̄ oro ẹma ẹkebọbọ.