Mme Mbono District—Ini Utuakibuot Inemesịt
1. Didie ke usọrọ nditọ Israel ẹbiet mme mbono district eyomfịn?
1 Joseph, Mary, nditọ mmọ ye mbon eken ẹma ẹsiwak ndika Jerusalem man ẹkedụk mme usọrọ eke isua ke isua. Ke mme ini edinam emi, mmọ ye mme andituak ibuot eken ẹsikpọn̄ mbubehe mmọ eke usen ke usen ẹnyụn̄ ẹwụk ntịn̄enyịn ke mme n̄kpọ eke spirit emi ẹdide akpan ikpehe uwem mmọ. Mme ini usọrọ emi ẹma ẹnọ mmọ ifet nditie n̄kere nnyụn̄ nneme nte Jehovah ọfọnde ido nnyụn̄ n̄kpep Ibet esie. Mme mbono district nnyịn oro ẹsụk ẹdide ke iso ẹyenọ nnyịn ukem ifet oro ndituak ibuot nnọ Jehovah ke inemesịt.
2. Nso ke ikpanam man itịm idem inọ mbono district oro edide do?
2 Oyom Ntịmidem: Ama oyom ubon Jesus ẹsan̄a n̄kpọ nte kilomita 200 ke uka ye unyọn̄ọ man ẹto Nazareth ẹkedụk usọrọ emi. Okposụkedi nnyịn mîfiọkke m̀mê Jesus ekenyene nditọeka ifan̄, imekeme ndikere ntịmidem emi akanade Joseph ye Mary ẹnam ye ukeme emi akanade mmọ ẹsịn. Ndi amanam kpukpru se akpanade anam man okpodụk usen mbono district mbita emi edide? Emi ekeme ndiyom afo esịn n̄wed ọbọ ini utre utom mîdịghe etịn̄ ye eteutom fo m̀mê ye andikpep eyen fo nte ke eyen fo ididịghe n̄wed ke ini mbono oro. Ndi ọmọbọ ubet ke ufọkisen edieke oyomde? Ndi emekeme ndin̄wam owo ke esop mbufo emi oyomde san̄asan̄a un̄wam ndidụk mbono?—1 John 3:17, 18.
3. Didie ke mme usọrọ nditọ Israel ẹkenọ mmọ ifet edinyene ebuana oro ọbọpde-bọp?
3 Itie Ebuana Oro Ọbọpde-Bọp: Nso ifet ke edidụk mme usọrọ mme Jew ekesinọ mme owo ntem ndinyene eti ebuana ye ekemmọ andituak ibuot nnọ Abasi! Anaedi ama esidọn̄ mbonubon Jesus ndifiak n̄kosobo ye n̄kani ufan mmọ. Mmọ n̄ko ẹma ẹsima ifet edinyene mbufa ufan ke otu udịm mme Jew ye mme okpono Abasi ke ido mme Jew oro ẹdidude do m̀mê mbon oro mmọ ẹdisobode ke usụn̄ uka ye ke usụn̄ unyọn̄ Jerusalem.
4. Didie ke nnyịn ikeme ndiwụt nte ke nnyịn idaha nditọete Christian ofụri ererimbot nnyịn ntre ntre?
4 Ntak kiet emi ofụn emi anamde akpanikọ onyụn̄ enyenede ọniọn̄ odiomide man nnyịn idiboho ọtọkiet ikop mme utịn̄ikọ ke mme mbono district utu ke ndimemịn̄ ndeme edi man nnyịn ikeme ndisịn udọn̄ nnọ kiet eken. (Heb. 10:24, 25) Ke ntre, nam ndutịm man ababak ekesịm an̄wa mbono kpukpru usen man ekenyene nneme ye mbon en̄wen mbemiso etieibuot okpokoro ikpehe edinam ọdọhọde ke ikwọukwak ọmọn̄ ọtọn̄ọ, ọdọhọde ke ekem ini ndidi nditetie. Utu ke ndikpọn̄ efe mbono n̄ka n̄kadia udia ke ebiet efen, ẹsịn udọn̄ ẹnọ nnyịn ndida mfefere udia ndi ndidia ke efe mbono man ikeme ndisobo nnyụn̄ nneme nneme ye mbon oro ẹtiede ẹkpere nnyịn. Nditọete Christian ofụri ererimbot nnyịn edi enọ oro Jehovah ọnọde, emi nnyịn mîkpadaha ntre ntre.—Mic. 2:12.
5. Nso idin̄wam nnyịn ibọ ufọn ọyọhọ ọyọhọ ito ndutịm emi?
5 Ini Ndikpep N̄kpọ: Toto ke uyen, Jesus ama esida mme ini usọrọ oro ekpep n̄kpọ aban̄a Ete esie eke heaven. (Luke 2:41-49) Nso idin̄wam nnyịn ye ubon nnyịn ibọ ọyọhọ ufọn ito ndutịm emi ẹdinemede? Ke ini ikpehe edinam osụk akade iso, sọn̄ọ du ke itie fo nyụn̄ fep nditịn̄ ikọ sọt-sọt-sọt. Kûyak urụk ukopikọ fo oro ẹkamade-kama ẹsan̄a, n̄kpri ukwak ubọ etop, ye n̄kpọ ntre ẹtịmede fi m̀mê mbon efen. Wụk ntịn̄enyịn ke mbot utịn̄ikọ, nyụn̄ wet akpan n̄kpọ mbio mbio. Ẹtie ọtọkiet nte ubon man ẹkụt ẹte ke nditọ mbufo ke ẹkpan̄ utọn̄ n̄ko. Ẹda ini mbubreyo usen oro ẹneme se ẹkemade ke edinam usen oro.
6. Nso ke ikpeti iban̄a ọfọn̄ ye ukamaidem nnyịn?
6 Ọfọn̄ ye Ukamaidem: Mme anam mbubehe ẹtode ebiet en̄wen emi ẹnyụn̄ ẹsan̄ade ke usụn̄ oro ẹma ẹkeme ndisọsọp mfiọk mbonubon Jesus ye mme Jew eken emi ẹkade ndituak ibuot ke mme ini usọrọ oro ke ntak ọfọn̄ mmọ emi ẹkenamde nyeriye ẹdian ke mben ẹnyụn̄ ẹkịmde awawa erebin ẹdian ke nyeriye oro. (Num. 15:37-41) Okposụkedi mme Christian mîsisịneke san̄asan̄a ọfọn̄ emi ẹdade ẹdiọn̄ọ mmọ, mme owo ẹdiọn̄ọ ke nnyịn isisịne ọfọn̄ oro owụtde iso o-bụt, asanade, onyụn̄ eyede. Akpana inen̄ede ikere nte idikamade idem ke ini ikade mme obio mbono, isụk idude do, ye ke ini inyọn̄de. Idem ọkpọkọm ikpokpụhọ ọfọn̄ ke ini edinam usen kiet kiet okụrede, ana isịne ọfọn̄ ukpono ukpono inyụn̄ idian kad idiọn̄ọ mbono nnyịn. Emi ayanam ikpụhọde ye mbon oro mîdịghe Mme Ntiense inyụn̄ inam mbon oro ẹkụtde nnyịn ẹtịn̄ nti ikọ ẹban̄a nnyịn.
7. Ntak emi ikpekerede ndinam utom unyịmesịt ke mbono?
7 Ẹyom Mme Anamutom Unyịmesịt: Ẹyom ediwak mbonutom man ndutịm mbono asan̄a ọfọn. Ndi emekeme ndinọ idem fo unyịme unyịme? (Ps. 110:3) Utom oro ẹsinamde ke mme mbono district nnyịn edi ubak edisana utom nnyịn onyụn̄ ọnọ eti ikọ ntiense. Etubom ke ebiet kiet oro ẹsidade ẹnịm mbono district ama enen̄ede okop inemesịt ye mme anam utom unyịmesịt oro ẹkenamde ebiet oro asana tutu enye ewet ete: “Nyom ndikọm mbufo ke utọ anana-mbiet mboho emi. Mmesikokop nte ke Mme Ntiense Jehovah ẹdi san̄asan̄a mme owo emi ẹnyenede ido edinam itie mboho asana akan nte ekedide ke mmọ ẹma ẹkụre edinam mmọ. Mbufo ye esop mbufo ẹmenam itie mboho emi edi ata eti itie ke obio emi, ẹkenyụn̄ ẹda ata nti owo oro akanam isobode ẹnam utom emi.”
8. Nso ifet ke idinyene ndinọ ikọ ntiense ke mme obio mbono?
8 Mme Ifet Edinọ Ikọ Ntiense: Ediwak owo ke mme obio mbono oro ẹyekụt isenowo emi ẹsịnede ọfọn̄ ẹnyụn̄ ẹkamade idem ọfọn nte ẹdiande kad idiọn̄ọ mbono ke ọfọn̄ mmọ, ndien emi ekeme ndinam mmọ ẹyom ndifiọk se itịbede, ke ntem ọnọde nnyịn ifet ndisian mmọ mban̄a mbono. Eyenọwọn̄ kiet emi ekedide isua inan̄ ama emen obufa n̄wed oro ẹkesiode ke mbono aka okowụt n̄wan kiet emi esinọde udia ke itie unyamudia. Emi ama anam ete ye eka eyen oro ẹkeme ndikot n̄wan oro edidụk mbono.
9. Didie ke ikeme ndikpebe esịtekọm oro mbonubon Jesus ẹkewụtde ẹnọ mme ndutịm eke spirit oro Jehovah akanamde?
9 Mme ini usọrọ ke eset ẹkedi ini inemesịt oro mme Jew oro ẹkemade mme n̄kpọ eke spirit ẹkesitiede-tie ẹbet. (Deut. 16:15) Mbonubon Jesus ẹma ẹsikop inemesịt ndinam n̄kpọ ekededi oro akanade mmọ ẹnam man mmọ ẹkeme ndidụk nnyụn̄ mbọ ufọn ọyọhọ ọyọhọ. Ukem ntre ke nnyịn iwụt esịtekọm inọ mme mbono nnyịn, idade mmọ nte enọ oro otode ima ima Ete nnyịn eke heaven. (Jas. 1:17) Ini edi emi nditịm idem nnọ ifet emi isinyenede mi ke isua ke isua ndituak ibuot nnọ Jehovah ke inemesịt!
[Ekebe ke page 6]
Se Ẹtide Owo Ẹban̄a Mbono District
◼ Mme Ini Ndutịm: Ke usen mbita emi, ndutịm editọn̄ọ ke usenubọk ke n̄kanika ebede 9 ke minit 20. Ke ini ẹtọtde ikwọ ediberede, kpukpru nnyịn ikpenyene ndidu ke itie nnyịn man ndutịm ekeme nditọn̄ọ ke ido nte eyede. Ke Friday ye Saturday, mbono edisuana ke ayakde minit ition ndimia n̄kanika ition mbubreyo; ndien ke Sunday, ke n̄kanika inan̄ mbubreyo.
◼ Itie Ubon N̄kpọisan̄: Mme adaidaha ẹyedu ke kpukpru an̄wa mbono ndiwụt mme owo ebiet oro ẹdibonde n̄kpọisan̄ mmọ. Mbọk ẹbere ye mmọ.—1 Cor. 14:40.
◼ Edimụm Itie Nnịm: N̄kukụre mbon oro ẹkemede ndimụm itie nnịm nnọ ẹdi mbon oro ẹsan̄ade ye mbufo ke n̄kpọisan̄ mbufo m̀mê mbon oro ẹdụn̄de ye mbufo, ọkọrọ ye mbon oro afo ekpepde mmọ Bible idahaemi.—1 Cor. 13:5.
◼ Udia Uwemeyo: Mbọk ẹda udia uwemeyo ẹdi utu ke ndikpọn̄ itiembono man ẹkedep udia ke ini nduọkodudu uwemeyo. Ẹmekeme ndikama ekpri n̄kpọ udọn̄ udia emi ẹkemede ndinịm ke idak n̄kpọitie. Owo inyịmeke ẹmen ikpọ n̄kpọ udọn̄ udia, mme ọtọ-akpa, ye ọkpọsọn̄ mmịn ẹdụk efe mbono.
◼ Mme Etịbe: Nnyịn imekeme ndiwụt esịtekọm mban̄a ndutịm oro ẹnamde ke mbono emi ebe ke nditịp n̄kpọ ke imaesịt nsịn ke mme ekebe etịbe ke Ufọkmbono Obio Ubọn̄ nnyịn m̀mê ke itiembono kaban̄a utom ofụri ererimbot. Ẹkpenyene ndiwet “Watch Tower,” nte ikọ iba, ke babru ubọ okụk ekededi oro ẹnọde nte etịbe ke itiembono.
◼ Mme Mbabuat N̄kpọntịbe: Edieke oyomde ẹsọsọp ẹnọ owo usọbọ ke itiembono, mbọk ẹneme ye adaidaha oro odude ekpere, emi edisọpde an̄wam man ẹmen owo udọn̄ọ oro ẹka Itieutom Akpa Usọbọ oro mme ọnọ usọbọ emi ẹdotde, emi ẹdude ke itiembono ẹkemede ndise nte idem esie ọdiọkde eketre nnyụn̄ nnọ un̄wam.
◼ N̄kpọ Umụmikọ: Owo ikpenyeneke ndida n̄kpọ umụmikọ ekededi mfak ke ikan̄ ilektrik m̀mê ke ndutịm ukwak utịn̄ikọ itiembono, edi ẹkeme ndikama enye n̄kukụre ke usụn̄ oro mîdifịnake mbon efen.
◼ Ukpatn̄kpọ Nseknditọ: Owo ikpenyeneke ndida ukpatn̄kpọ nseknditọ ndi itiembono. Edi ekeme ndida n̄kpọitie nseknditọ oro ekemede ndinịm n̄kpere ete ye eka ndi.
◼ Drama: Idiwụtke ima edieke nditọete iban ẹbọbọde ikpọ bọkịt ke uwemeyo Sunday ke ini drama, sia emi mîdiyakke mbon oro ẹtiede ke edem ẹkụt se ikade iso. Ẹtịn̄ emi akpan akpan ke ntak ukeuke usụn̄ oro ẹbọpde Ufọk Mbono ye mme Ufọkmbono Obio Ubọn̄ oro ẹsidade ẹnịm mbono n̄ko.—1 Cor. 10:24.
◼ Ufuọn̄: Oyowụt mfọnido edieke iduọkde esisịt m̀mê itrede ndidọduọk ufuọn̄ nte perfume emi ọsọn̄de utebe mbak edifịna mbon oro ẹnyenede utọ udọn̄ọ nte ikọn̄ obun̄wek.—Phil. 2:4.
◼ Itie Unyamudia ye Mme Anyam N̄kpọ: Yak nti edu fo ẹnọ enyịn̄ Jehovah ubọn̄ ke ini akade itie unyamudia. Iwụtke eti ibuot ndikedep n̄kpọ ke ini edinam osụk akade iso. Ọkpọfọn nnyịn idep se ededi oro iyomde mbemiso mbono ọtọn̄ọde m̀mê ke mbono ama asuana.
◼ Mme Ufọkidụn̄: (1) Ke ẹsịmde itiembono, ẹnam n̄kpọ nte mbon emi spirit Abasi adade usụn̄ ke ini ẹbọde ufọkidụn̄. (2) Ẹkûdụn̄ ke mme dọmitri edieke Itieutom Unọ Ufọkidụn̄ mîdọhọke mbufo ẹdụn̄ do. Ẹdụn̄ ke ebiet oro ẹnọde mbufo. (3) Nditọete iren ikpenyeneke ndidu tutu eyo ọsọn̄ m̀mê ndide ke mme ufọkidụn̄ oro ẹnọde iban m̀mê iban ndinam ntre ke eke irenowo. (4) Edieke mfịna odude ke ebiet oro odụn̄de, sọsọp dọhọ itieutom oro ẹsede ẹban̄a ufọkidụn̄ ke ini osụk odude ke an̄wa mbono. (5) Edieke ẹnọde fi itie ke ufọkisen, tiene ndausụn̄ oro mme andise mban̄a ufọkisen oro ẹnọde. (6) Ẹtem udia n̄kukụre ke mme ebiet oro ẹnọde unyịme. (7) Ẹkûtem udia ke ini edinam osụk akade iso sia emi edide unana ediwụt esịtekọm nnọ mme n̄kpọ eke spirit.—Luke 10:38-42.
◼ N̄kpọisan̄: Sia uwem edide edisana, ana kpukpru owo ẹda ndutịm n̄kpọisan̄ ke ata akpan n̄kpọ ke ini ẹnamde ndutịm n̄kpọisan̄ mbono isua emi. Mbiowo ẹnyene ndikụt nte ke n̄kpọisan̄ oro ẹyomde ndidụk n̄ka mbono ọfọn, enyene eti tire, brake, ye ikan̄. Okposụkedi ekemede ndiyom ẹkpe okụk awak akan, ọfọn ẹdụk eti moto. Ẹda awat ubomisọn̄ emi ediberede ye mbufo ke mme afan̄ emi: inaha ẹdọn̄ mbiomo m̀mê ẹmen owo awak akaha, inaha ẹwat ọsọp akaha, ana enye ọduọk odudu ede idap ọfọn okoneyo emi edisierede usen uka mbono oro, okûnyụn̄ ọn̄wọn̄ ọkpọsọn̄ mmịn mbemiso ye ke ini awatde uwat. Owo ikpadaha n̄kpọ emi mfefere mfefere; ana ẹfep mme n̄kpọndịk oro ẹkemede ndifep.—N̄ke 22:3.