Ẹyak Iwụt Esịtekọm Editi Oro Ẹdinịmde ke April 17
1. Ewe ikọ andiwet psalm enen̄ede odot ke ini Editi?
1 Ke ntak emi andiwet psalm okowụtde esịtekọm aban̄a ediwak n̄kpọ oro Jehovah akanamde nditua enye mbọm nnyụn̄ nnyan̄a enye, enye ama obụp ete: “Nso ke ami ndinọ Jehovah ke usiene ke kpukpru mfọn emi enye ọfọnde ye ami?” (Ps. 116:12) Mfịn, mme asan̄autom Abasi ẹkam ẹnyene ekese ntak efen ndiwụt esịtekọm. Ke ata ediwak isua ẹma ẹkebe tọn̄ọ nte ẹkewet mme ikọ itie N̄wed Abasi oro, Jehovah ama ọnọ ubonowo akakan enọ—oro edi ufak. Nte nnyịn itịmde idem nditi n̄kpa Christ ke April 17, imenyene eti ntak ndiwụt esịtekọm.—Col. 3:15.
2. Nso idi ndusụk ntak emi ẹnamde nnyịn iwụt esịtekọm iban̄a ufak?
2 Mme Edidiọn̄ Oro Ẹtode Ufak: Ke ntak ufak, ẹkeme ‘ndifen mme idiọkn̄kpọ nnyịn.’ (Col. 1:13, 14) Emi anam nnyịn ikeme ndituak ibuot nnọ Jehovah ye edisana ubieresịt. (Heb. 9:13, 14) Nnyịn imekeme ndinyene ifụre utịn̄ikọ ke ini ibọn̄de akam inọ Jehovah. (Heb. 4:14-16) Mbon oro ẹbuọtde idem ke ufak ẹnyene akakan idotenyịn edidu uwem ke nsinsi!—John 3:16.
3. Didie ke ikeme ndiwụt esịtekọm nnọ Jehovah ke ndinọ ufak?
3 Wụt Esịtekọm: Usụn̄ kiet oro inen̄erede iwụt esịtekọm edi ndikot itie Bible eke ini Editi kpukpru usen nnyụn̄ ntie n̄kere se ikotde. Enyọn̄-Ukpeme eke February 1, 2011, enyene ibuotikọ oro ọdọhọde “Ndi Emeben̄e Idem Ọnọ Ata Akpan Usen ke Isua?” Ẹketịm ibuotikọ emi man an̄wam nnyịn inam emi. Imekeme ndisian Jehovah ke akam ofụri esịt adan̄a nte idade ufak ke ọsọn̄urua. (1 Thess. 5:17, 18) Nnyịn ndinam ewụhọ Jesus ke ndidụk Editi owụt ke nnyịn imowụt esịtekọm. (1 Cor. 11:24, 25) N̄ko-n̄ko, imekeme ndikpebe akwa ima Jehovah ke ndinọ ediwak owo ikot nte ikekeme man mmọ ẹtiene nnyịn ẹdụk edinam emi.—Isa. 55:1-3.
4. Nso ikpedi ubiere nnyịn?
4 Mme asan̄autom Abasi oro ẹsiwụtde esịtekọm ididaha ke Editi onyụn̄ edi mbono esop. Enye edi akakan mbono esop eke isua! Nte Editi asan̄ade ekpere, ẹyak nnyịn ibiere ukem nte andiwet psalm emi ekewetde ete: “O ukpọn̄ mi, toro Jehovah, kûnyụn̄ ufre kpukpru mme edinam esie.”—Ps. 103:2.