Ẹyenọ Okopodudu Ikọ Ntiense
1. Utịn̄ikọ ye nso efen ikeme nditụk isenowo ke ini Editi? Nam an̄wan̄a.
1 Ini ewe? Ke mbubreyo usen Editi. Ima inen̄ede isịn ukeme ndikot mme owo ẹditiene nnyịn ẹdụk edinam emi. Idịghe se isenowo ẹkopde kpọt ekeme nditụk mmọ. N̄wan kiet ama etịn̄ aban̄a se enye okokụtde ke enye ama okodụk Editi—kpukpru mme andidụk ẹketie ufan ufan, ediye ufọk oro mme anamutom unyịmesịt ẹkebọpde ama asana, ẹnyụn̄ ẹtịm enye ẹkama. Ke ntre, kpukpru nnyịn ọkọrọ ye etịn̄ikọ imetiene ibuana ke ndinọ ikọ ntiense ke ata akpan edinam eke isua emi.—Eph. 4:16.
2. Didie ke nnyịn owo kiet kiet ikeme ndinọ isenowo ikọ ntiense?
2 Kọm Isenowo Ufiop Ufiop: Iyọnọ ikọ ntiense ke ndituak inua imam nnyụn̄ n̄kọm isenowo ufiop ufiop. (John 13:35) Idem ọkpọkọm ukemeke nditịn̄ ikọ ye kpukpru owo, emekeme ndisụk nsiak enyịn̄ fo nnọ mbon oro ẹdude ẹkpere fi. (Heb. 13:1, 2) Tịn̄ enyịn se m̀mê oyokụt isenowo oro ẹtiede nte ke idiọn̄ọke owo ndomokiet. Ekeme ndidi ẹkenọ mmọ ikot ke ini ẹkenamde ubịnikọt. Afo emekeme ndibụp ete, “Ndi akpa ini afo ndidi mi edi emi?” Dọhọ mmọ ẹditie ye afo, nyụn̄ dọhọ mmọ ke ikpama ndibọrọ mbụme ekededi oro mmọ ẹdinyenede. Edieke anade esop mbufo ẹsọsọp ẹwọrọ ke ẹma ẹkekụre man esop efen ẹkeme nditọn̄ọ, afo emekeme ndidọhọ ete: “N̄kpama ndifiọk se afo ekerede aban̄a edinam emi. N̄kpanam didie nsobo ye afo?”
3. Didie ke ikpadara mbon oro mîwọrọke an̄wautom aba?
3 Dara Mbon Oro Mîwọrọke An̄wautom Aba: Mme asuanetop oro mîwọrọke an̄wautom aba ẹyedụk edinam emi, ọkọrọ ye ndusụk mbon oro ẹsidụkde Editi kpọt. Dara mmọ, nyụn̄ nam mmọ ẹfiọk ke esịt enen̄ede enem fi ndikụt mmọ. (Rome 15:7) Mbiowo ẹkeme ndika ufọk mmọ esisịt ini ke oro ebede man ẹkesịn udọn̄ ẹnọ mmọ ẹka iso ẹbuana ye esop. Akam nnyịn edi yak se ediwak ke otu mme andidụk edinam emi ẹdikopde, ye ‘nti utom nnyịn oro mmọ ẹdikụtde,’ ẹnụk mmọ ndinọ Abasi ubọn̄.—1 Pet. 2:12.