Wụt Esịtekọm Ban̄a Ima-Mfọnido Jehovah
Nditi N̄kpa Christ ke March 24
1. Didie ke Jehovah okowụt nnyịn ima-mfọnido?
1 Andiwet psalm ọkọdọhọ ete: “Yak owo ẹkọm Jehovah ke ima esie, ye ke mme utịbe n̄kpọ emi enye anamde ye nditọ owo.” (Ps. 107:8) Ima-mfọnido Abasi ikụreke ke enye ndikere mban̄a mme owo. Ẹnam oro an̄wan̄a ke itoro eke odudu spirit emi: “Ima fo, O Jehovah, omụm mi akama.” (Ps. 94:18) Nso n̄wọrọnda ima-mfọnido ke Jehovah okowụt ntem ke ndinọ ikpọn̄-ikpọn̄ edibon Eyen esie ke ibuot nnyịn.—1 John 4:9, 10.
2. Didie ke nnyịn ikeme ndiwụt esịtekọm nnọ Jehovah?
2 Nte ini Editi n̄kpa Christ asan̄ade ekpere, didie ke nnyịn ikeme ndikọm “Abasi ima”? (Ps. 59:17) Oyoyom nnyịn owo kiet kiet ida ini itie ikere mme n̄kpọ oro ẹketịbede ke mme akpatre usen uwem Jesus ke isọn̄. (Ps. 143:5) Ọyọfọn n̄ko ndikot san̄asan̄a edikot Bible ini Editi nte ẹwụtde ke Ẹdụn̄ọde N̄wed Abasi ke Usen ke Usen—2005, ndien edieke ikemede, ifiak ikot inyụn̄ idụn̄ọde ibuot 112 esịm 116 ke n̄wed Akakan Owo ọkọrọ ye mme n̄wed ukpepn̄kpọ efen emi ẹkọn̄ọde ke Bible. Tie kere mme ikpehe emi afo okotde, nyụn̄ mehe ye mmọ ofụri ofụri. (1 Tim. 4:15) Ndinen̄ede ntie n̄kere Ikọ Abasi ibọkke esịt nnyịn kpọt edi n̄ko owụt ima oro nnyịn imade Jehovah.—Matt. 22:37.
3, 4. (a) Didie ke nnyịn ikeme ndikpebe edu nditọete nnyịn ke Liberia? (b) Mmanie ke afo oyom ndikot Editi?
3 Sịn Udọn̄ nọ Mbon Efen Ndikọm Abasi: Isua oko, owo 16,760,607 ẹkedụk Editi ke ofụri ererimbot. Ke obio-in̄wan̄ kiet ke Liberia, nditọete ẹkeda an̄wambre ikpa n̄kann̄kụk ẹnịm usọrọ oro ndien ẹma ẹtọt mme owo ẹban̄a Editi oro ke ofụri n̄kann̄kụk oro, ẹnọde mmọ ikot ndidụk. Okposụkedi mme asuanetop ition kpọt ẹkedude ke obio-in̄wan̄ oro, owo 636 ẹkedụk Editi oro!
4 Kpasụk ntre, nnyịn iyom ndin̄wam adan̄a ediwak owo nte ikekeme nditiene nnyịn ndụk Editi. Ntak mûwetke enyịn̄ mbon oro afo oyomde ndikot? Mme ndise emi ẹdude ke edem Awake! eke March 8 ye Enyọn̄-Ukpeme eke March 15 ẹnọ ikot. Emekeme ndikama n̄wedikot Editi n̄ko. Da masịn uwetn̄kpọ mịn̄ mîdịghe da ubọk tịm wet ini ye ebiet ẹdinịmde Editi ke babru oro, nyụn̄ nọ owo kiet kiet oro afo okotde idem kiet. Nte March 24 asan̄ade ekpere, fiak keti owo kiet kiet nyụn̄ nam ndutịm ben̄e edidi mmọ.
5. Didie ke nnyịn ikeme ndisịn udọn̄ nnọ nditọ ukpepn̄kpọ Bible ndidụk?
5 Didie ke nnyịn ikeme ndin̄wam nditọ ukpepn̄kpọ Bible oro mîdụkke mme mbono esop kan̄a ndidụk nnyụn̄ mbọ ufọn ọyọhọ ọyọhọ nto edinam emi? Da minit ifan̄ ke ini ukpepn̄kpọ kiet kiet nam mmọ ẹdiọn̄ọ nte edinam emi edide akpan n̄kpọ. Emekeme ndikụt ata eti ntọt ndida nnyene nneme ke Enyọn̄-Ukpeme eke March 15, 2004, page 3-7, ye n̄wed Reasoning, page 266-269.
6. Ntak edide akpan n̄kpọ ndidara isenowo emi ẹdụkde Editi?
6 Dara Isenowo: Ke itie usọrọ Editi, ka bịne isenowo nyụn̄ dara mmọ. (Rome 12:13) Tie ye mbon oro okokotde, nyụn̄ kụt ete ke mmọ ẹnyene Bible ye n̄wedikwọ. Nnyịn akpan akpan iyoyom ndinen̄ede n̄kọm nditọete iren ye iban ekededi oro mîsiwọrọke an̄wautom aba, emi ẹsịnde ukeme ndidụk. Ima ima udọn̄ nnyịn ekeme ndin̄wam mmọ ndifiak mbuana kpukpru ini ye esop. (Luke 15:3-7) Ke ata edisana edinam emi, nnyịn ikpakam inam kpukpru se ikemede ndisịn udọn̄ nnọ mbon en̄wen ẹdiana ye nnyịn ẹnọ Jehovah ekọm ke “utịbe ima esie.”—Ps. 31:21.