“Nọ Akani Magazine m̀mê Ediye Uduot Ekpri N̄wed Ekededi Emi Edemerede Owo Oro Udọn̄”
Ekeme ndidi afo omokụt ke mme ọfiọn̄ oro inọde n̄wed Bible Ekpep inyụn̄ idomode nditọn̄ọ ukpepn̄kpọ Bible ke akpa ediwaha, edieke edide enyeneufọk ama enyenyene n̄wed emi mînyụn̄ inyịmeke ẹnịm ukpepn̄kpọ Bible ye imọ, ẹsisịn udọn̄ ẹnọ nnyịn ‘ndinọ n̄kani magazine m̀mê ediye uduot ekpri n̄wed ekededi oro edemerede owo oro udọn̄.’ Ntak esidide ntre?
Ndiye uduot n̄kpri n̄wed m̀mê n̄kani magazine ẹsineme nsio nsio ekemini ibuotikọ. N̄kpọ oro odude ke kiet ke otu n̄wed emi ekeme nditụk enyeneufọk esịt. Mmọdo, ke ini etịmde ekpat ukwọrọikọ fo, dọn̄ nsio nsio ndiye uduot n̄kpri n̄wed ye n̄kani nsiondi magazine. Edieke mûnyeneke n̄kani magazine, emekeme ndibọ ndusụk ke itie unọ magazine. Do, edieke edide enyeneufọk ama enyenyene n̄wed Bible Ekpep mînyụn̄ inyịmeke ẹnịm ukpepn̄kpọ Bible ye imọ, afo emekeme ndiwụt enye ndusụk magazine m̀mê ndiye uduot n̄kpri n̄wed oro afo enyenede onyụn̄ ọdọhọ enye emek ekededi oro enye amade. Ekem, diomi ndifiak n̄ka n̄kanam udọn̄ oro enye okowụtde ọkọri. Ekeme ndidi emi oyosụn̄ọ ke ukpepn̄kpọ Bible.