Un̄wana Abasi Ebịn Ekịm Efep!

Ke Bible, un̄wana enyene n̄kpọ ndinam ye akpanikọ, ke adan̄aemi ekịm enyenede n̄kpọ ndinam ye nsu. (Ps. 43:3; Isa. 5:20) Apostle John ekewet ete: “Abasi edi un̄wana ndien ekịm baba kiet isan̄ake n̄kpọ ye enye.” (1 John 1:5) Tịmfiọk ukpụhọde oro odude ke ufọt un̄wana ye ekịm. Un̄wana eke spirit oto Jehovah, ndien ekịm eke spirit isan̄ake n̄kpọ ye enye. Ekịm ọtọn̄ọ oto anie ndien? Se idinemede mbubreyo emi ayanam nnyịn ifiọk ebiet emi ekịm eke spirit otode ye nte ikemede ndifep enye. Iyeneme n̄ko nte ikemede ndiwụt esịtekọm nnọ un̄wana eke spirit oro inyenede.

Imenyene ediwak ntak nditoro Jehovah, enye emi ọkọnọde nnyịn un̄wana akpanikọ esie. Nnyịn itiene Edidem David idọhọ ite: ‘Afo edi utuenikan̄ mi, O Jehovah, ndien edi Jehovah anam ekịm mi an̄wan̄a.’ (2 Sam. 22:29) Kpa ye oro, ikpanaha itie ke ndueidem, koro emi ekeme ndinam nnyịn ifiak ikodụk ekịm oro ẹma ẹkesosio nnyịn. Ke ererimbot ekịm eke spirit emi, ẹyak nnyịn idi ifịk ifịk mme ọnọ-un̄wana emi ẹnyenede uko. Nnyịn ikpakam ‘ika iso isan̄a nte nditọ un̄wana.’—Eph. 5:8.