Mme Uyen—Nso ke Ẹdida Uwem Mbufo Ẹnam? (Ikpehe 2)

N̄wed Ecclesiastes 12:1 esịn udọn̄ ọnọ mme uyen ete: “Ti Akwa Andibot fi ke ini uyen.” (Today’s English Version) Mfọnn̄kan usụn̄ ndida uwem mbufo nnam n̄kpọ edi ndida enye nnam n̄kpọ nnọ Jehovah Abasi. Edi ana ẹbem iso ẹdot ndinam n̄kpọ Abasi. Mbufo ẹdinam didie ẹdot? Ndida uwem nnyịn nnam n̄kpọ Abasi abuana nso? Ẹyebọrọ mme mbụme emi ke ini idinemede mme ikpehe ekikere oro ẹkesụhọde ke ibuotikọ oro ikenemede urua oko.

Ndusụk ini unana nsọn̄idem, unana okụk, ye mme mbiomo ubon isiyakke owo anam se enye okpoyomde ndinam. Kpa ye oro, ana kpukpru mbon oro ẹma ẹkeyak idem ẹnọ Abasi ẹnam ewụhọ Bible emi ọdọhọde ete: “Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo.” (Matt. 22:37) Jehovah oyom mbufo ẹnam ofụri se mbufo ẹkemede ndinam, nte idaha mbufo ayakde. Mmọdo inamke n̄kpọ m̀mê nso idi idaha mbufo ke uwem, ẹyak utom Jehovah ẹdi akpan n̄kpọ ke uwem mbufo. Ẹnịm mme utịtmbuba eke spirit oro ẹdikemede ndisịm. ‘Ẹti Akwa Andibot mbufo ke ini uyen’—ndien Abasi ọyọdiọn̄ mbufo ke nsinsi ke ntak emi ẹtide enye!