Mme Uyen—Nso ke Mbufo Ẹdida Uwem Mbufo Ẹnam?
“AMI nyom se itịmde ifọn ikan nto uwem.” Ntre ke n̄kaiferi kiet etịn̄. Eyịghe idụhe nte ke afo n̄ko omoyom ukem oro. Edi afo edikam asan̄a didie enyene se ‘ifọnde ikan’ oto uwem? Ndutịm usuanetop ye mme ubọkn̄ka fo, idem mme andikpep fo, ẹkeme ndidọhọ ẹte ke enye oto edinyene ediwak okụk nnyụn̄ nnyene eti ubọkọkọ—ndidi enye emi okụtde unen!
Nte ededi, Bible odụri n̄kparawa owo utọn̄ ete ke edibịne inyene obụkidem edi “idomo eke mîwọrọke usụn̄.” (Ecclesiastes 4:4) Ntak kiet edi koro ibat ibat n̄kparawa owo esika iso ẹnyene inyene ẹnyụn̄ ẹwọrọ etop. Mbon oro ẹnamde ntre ẹsiwak ndikụt nte mmimọ inen̄erede inana inemesịt. Uyen kiet otode Britain oro ekebịnede ubọkọkọ oro enyenede uku ke ufọkn̄wed ọdọhọ ete: “Enye etie nte ukpọk ekebe. Ini kiet ekededi oro onyụn̄ọde ese esịt, baba n̄kpọ kiet isịneke do.” Edi akpanikọ, ndusụk ini utom ekeme ndida uforo ye uwọrọetop ndi. Edi enye ikemeke ndiyụhọ udọn̄ n̄kpọ eke “spirit” fo. (Matthew 5:3) Ke akande oro, 1 John 2:17 odụri owo utọn̄ ete ke “ererimbot ke ebebe efep.” Idem ọkpọkọm afo enyenyene inyene ke ererimbot emi, enye edi ke ibio ini.
Ke ntem, Ecclesiastes 12:1 akpak n̄kparawa owo ete: “Ti Andibot fi ke ini afo edide akparawa.” Ih, mfọnn̄kan usụn̄ oro afo ekemede ndida uwem fo nnam n̄kpọ edi ndida enye nsịn ke utom Jehovah Abasi. Edi akpa, ana afo odot ndinam utom Abasi. Afo edisan̄a didie odot? Ndien nso ke ndinam utom Abasi abuana?
Ndidot Ndidi Ntiense Jehovah
Akpa kan̄a, ana afo ọkọri udọn̄ ndinam n̄kpọ Abasi—ndien udọn̄ oro idịghe ke mbuari, idem ọkpọkọm ete ye eka fo ẹdi mme Christian. Ana afo enyene ọkpọkpọ itie ebuana ye Jehovah. N̄kaiferi kiet ọdọhọ ete: “Ndibọn̄ akam an̄wam fi ndinyene ọkpọkpọ itie ebuana ye Jehovah.”—Psalm 62:8; James 4:8.
N̄wed Mbon Rome 12:2 owụt usio-ukot efen oro anade afo anam. Enye ọdọhọ ete: “Ẹdomo ẹfiọk se uduak Abasi edide, uduak Abasi eke edide eti, onyụn̄ enemde owo esịt, onyụn̄ ọfọnde ama.” Ndi akanam afo omokụt idemfo nte eyịkde ndusụk n̄kpọ oro ẹkekpepde fi? Do tiene item Bible oro, nyụn̄ ‘domo fiọk’ ete ke mme n̄kpọ emi ẹdi akpanikọ! Nam ndụn̄ọde ke idemfo. Kot Bible ye mme n̄wed oro ẹkọn̄ọde ke Bible. Nte ededi, ndikpep n̄kpọ mban̄a Abasi idịghe sụk edinam ifiọk ibuot. Da ini tie kere se afo okotde man enye osụhọde odụk ndamban̄a esịt fo. Emi ayanam ima oro afo amade Abasi ọkọri.—Psalm 1:2, 3.
Ekem, domo ndibuana se afo ekpepde, iso-ọfọn ye mme nsan̄a ufọkn̄wed fo. Ndikwọrọ ikọ to ke enyịnusụn̄ sịm enyịnusụn̄ edi udiana usio-ukot. Afo ndusụk ini emekeme ndisobo nsan̄a ufọkn̄wed nte afo ọkwọrọde ikọ, ndien emi ekeme ndinam fi okop bụt ke akpa ini. Edi Bible esịn udọn̄ ọnọ nnyịn ete ‘bụt okûnam nnyịn ye gospel.’ (Rome 1:16) Afo akama etop oro ọnọde uwem ye idotenyịn! Ntak emi bụt akpanamde fi aban̄a enye?
Idahaemi, edieke ete ye eka fo ẹdide mme Christian, ekeme ndidi afo emesitiene asan̄a ye mmọ ke utom emi. Edi nte afo emekeme ndinam se ikande edidodop uyo nda ke enyịnusụn̄ m̀mê sụk edinịm mme magazine ye tract? Nte afo emekeme nditịn̄ ikọ ke enyịnusụn̄ ke idemfo, adade Bible ọnọ enyeneufọk ukpep? Edieke mûkemeke, do bọ ndusụk un̄wam to ete ye eka fo m̀mê andibuana ke esop oro ama ọkọkọri esịm ọyọhọ idaha. Nam edi utịtmbuba fo ndidot nte asuanetop eti mbụk oro mînaha baptism!
Nte ini akade, oyonụk fi ndinam uyakidem—ọn̄wọn̄ọde ọnọ Abasi ete ke imọ iyanam n̄kpọ esie ọtọn̄ọde ke emi. (Rome 12:1) Nte ededi, uyakidem idịghe ikpîkpu mbubehe idem owo. Abasi oyom kpukpru owo ‘ẹda inua ẹnyịme ẹnyene edinyan̄a.’ (Rome 10:10) Ke ini baptism, afo eyebem iso ada inua enyịme mbuọtidem fo. Baptism ke mmọn̄ eyetiene. (Matthew 28:19, 20) Nte ẹnyịmede, baptism edi akpan usio-ukot. Edi kûmen̄e koro afo ekerede ke imọ ke ndusụk usụn̄ imekeme ndikpu. Edieke afo eberide edem ke Abasi kaban̄a ukeme, enye ọyọnọ fi “akwa ubom odudu” man an̄wam fi ọsọn̄ọ ada.—2 Corinth 4:7; 1 Peter 5:10.
Ke ini afo anade baptism, afo akabade edi kiet ke otu Mme Ntiense Jehovah. (Isaiah 43:10) Akpana emi enyene akwa odudu ke usụn̄ nte afo edidade uwem fo anam n̄kpọ. Uyakidem abuana ‘nditụk idemfo.’ (Matthew 16:24) Afo emekeme nditre ndibịne ndusụk utịtmbuba ye udọn̄ ikpọ n̄kpọ idemfo onyụn̄ ‘ebem iso oyom Obio Ubọn̄ Abasi.’ (Matthew 6:33) Uyakidem ye baptism ke ntem ẹberede ediwak ifet ndinam ntre. Ẹyak ikere iban̄a ndusụk ke otu mmọ.
Mme Ifet Ndinam N̄kpọ Abasi ke Utom Uyọhọ Ini
● Utom usiakusụn̄ edi kiet ke otu ifet oro. Asuanetop edide asiakusụn̄ edi Christian oro ama akana baptism emi enịmde eti uwụtn̄kpọ onyụn̄ odiomide ndibiat ke nsụhọde n̄kaha hour 70 ke ọfiọn̄ kiet kiet ndikwọrọ eti mbụk. Ndibiat ini oro okponde akan ke an̄wautom ayan̄wam fi ndikọri mme usọ ukwọrọikọ ye edikpep owo n̄kpọ. Ediwak mme asiakusụn̄ ẹmekop idatesịt otode edin̄wam nditọ ukpepn̄kpọ Bible mmọ ẹkabade ẹdi Mme Ntiense oro ẹnade baptism. Ewe utom idịbi udia ekeme ndikama nduaidem nnyụn̄ nnọ uyụhọ ntem?
Man ẹnyene okụk ndise mban̄a se mmọ ẹyomde ke uwem, ata ediwak mme asiakusụn̄ ẹsinam utom idịbi udia ibio ini. Ediwak mmọ ẹsibem iso ẹnam ndutịm ẹnọ utom emi ebe ke ndikpep ubọkutom ke ufọkn̄wed m̀mê ndikpep nto mme ete ye eka mmọ. Edieke afo ye ete ye eka fo ẹkerede ẹte ke ọfọn ọbọ ndusụk udiana ukpep ke ama okokụre ufọkn̄wed sekọndri, kụt ete ke uduak fo idịghe ndin̄wana ediwak okụk, edi edi man ada an̄wam idem ke utom ukwọrọikọ fo ndien iso-ọfọn anam utom nte asan̄autom uyọhọ ini.
Nte ededi, asiakusụn̄ isiwụkke ntịn̄enyịn ke utom idịbi udia esie, edi esiwụk ke utom ukwọrọikọ esie—an̄wamde mbon efen ndinyene uwem! Ntak mûnịmke utom usiakusụn̄ nte ọkpọkpọ utịtmbuba? Utom usiakusụn̄ esiwak ndida nsịm mme ifetutom efen efen. Ke uwụtn̄kpọ, ndusụk mme asiakusụn̄ ẹsiwọrọ ẹka mme ebiet oro udọn̄ kaban̄a mme asuanetop Obio Ubọn̄ okponde akan. Mbon efen ẹsikpep usem esenidụt ẹnyụn̄ ẹnam utom edide ye esop n̄kann̄kụk oro esemde usem esenidụt m̀mê ke idem esenidụt. Ih, utom usiakusụn̄ edi usụn̄ uwem oro ọnọde utịp!
● Utom isụn̄utom edi ifet efen oro ebererede. Ọtọn̄ọde ke 1943 Ufọkn̄wed Enyọn̄-Ukpeme Ukpep Bible eke Gilead ọmọnọ mme asiakusụn̄ oro ẹdotde ata eti ukpep ke utom isụn̄utom. Ẹsinọ mme andikụre ukpep utom nte mme ọkwọrọikọ uyọhọ ini ke isenidụt. Ke ediwak ke otu idụt emi, mme idaha udu uwem ẹsọn̄, ntre eti nsọn̄idem ye odudu ẹdi akpan n̄kpọ ke utom isụn̄utom. Kpa ye oro, mme isụn̄utom ẹdu uwem oro ọyọhọde ye nduaidem onyụn̄ ọnọde uyụhọ.
● Ẹketọn̄ọ Ufọkn̄wed Unọ Mme Asan̄autom Ukpep man ẹnọ mbiowo ye mme asan̄autom unamutom oro mîdọhọ ndọ oro ẹdotde ukpep. Ntotụn̄ọ ukpep urua itiaita oro esitụk mme utọ ibuot nneme nte mme mbiomo mbiowo ye mme asan̄autom unamutom, ndutịm esop, ye editịn̄ ikọ nnọ mme owo. Ẹsinọ ndusụk mmọ ẹkenam utom ke idụt mmọ. Ẹnọ mbon efen ẹkenam utom ke esenidụt.
● Utom Bethel abuana ndidi anamutom unyịmesịt ke kiet ke otu ufọkutom n̄kọk itieutom eke Mme Ntiense Jehovah. Ndusụk mme andibuana ke ubon Bethel ẹnam utom nnennen nnennen ke ndision̄o mme n̄wed Bible. Ẹnọ mbon efen ẹnam utom edinọ un̄wam, utọ nte edidiọn̄ ufọk ye mme ukwakutom m̀mê edise mban̄a n̄kpọ obụkidem ubon Bethel. Kpukpru utom ẹdi edisana utom oro ẹnamde ẹnọ Jehovah. Ke adianade do, mbon oro ẹdude ke Bethel ẹkop idatesịt ndidiọn̄ọ nte ke se ededi oro mmimọ inamde enyene ufọn ọnọ akamba ibat nditọete mmimọ ke ofụri ererimbot.
Ndusụk ini ẹsinọ nditọete emi ẹnyenede san̄asan̄a usọ ikot ndinam utom ke Bethel. Nte ededi, ata ediwak ẹsibọ ukpep ke mmọ ẹma ẹkedisịm. Mbon oro ẹdude ke Bethel inamke utom iyom udori n̄kpọ obụkidem edi ẹyụhọ ye mme ndutịm oro ẹnamde ẹban̄a udia, itieidụn̄, ye ekpri okụk ekpatọfọn̄ kaban̄a ọkpọkpọ ubiatokụk. Uyen kiet oro abuanade ke ubon Bethel anam utom esie an̄wan̄a ke usụn̄ emi: “Enye edi utịbe! Utom oro akama n̄kpọ-ata, edi ami mmọbọ ekese edidiọn̄ ke ndinam utom mi.”
● Utom ofụri ererimbot ayak owo abuana ke edibọp mme ufọkutom n̄kọk itieutom ye mme Ufọkmbono Obio Ubọn̄. Mme asan̄autom ofụri ererimbot, nte ẹkotde mmọ, ẹsinam isan̄ ẹka mme esenidụt man ẹken̄wam ke mme utọ utom ubọpn̄kpọ oro. Emi edi orụk edisana utom, ukem nte utom mbon oro ẹkebọpde temple Solomon. (1 Ndidem 8:13-18) Mme ndutịm oro ẹnamde ndise mban̄a mme asan̄autom ofụri ererimbot ẹdi ukem ye eke mbonubon Bethel. Nso ifet ke nditọete iren ye iban emi ẹnyene ntem ke ikpehe utom emi ke itoro Jehovah!
Nam N̄kpọ Jehovah ke Ofụri Ukpọn̄
Ndinam n̄kpọ Jehovah edi mfọnn̄kan usụn̄ ndida uwem fo nnam n̄kpọ. Ntak mûkereke uban̄a edinịm ọkpọkpọ utịtmbuba eke edinam n̄kpọ Abasi ke utom uyọhọ ini? Neme ye ete ye eka fo, mbiowo n̄kann̄kụk mbufo, ye esenyịn circuit mbufo ban̄a utom uyọhọ ini. Edieke afo enyenede udọn̄ ke Bethel, Gilead, m̀mê Ufọkn̄wed Unọ Mme Asan̄autom Ukpep, dụk mbono oro ẹsinịmde ẹnọ mbon oro ẹnyenede udọn̄ ke mme mbono circuit ye district.
Edi akpanikọ, idịghe kpukpru owo ẹkeme ndidot m̀mê ẹkeme ndinam utom uyọhọ ini. Ndusụk ini mme mfịna unana nsọn̄idem, mfịna okụk, ye mme mbiomo ubon ẹsisụhọde se owo ekemede ndinam. Kpa ye oro, ana kpukpru Christian oro ẹma ẹkeyak idem ẹnọ ẹnam ẹwụhọ Bible emi: “Ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo.” (Matthew 22:37) Jehovah oyom afo anam ofụri se mme idaha fo ẹyakde fi anam. Ntre se ededi emi idaha fo edide, nam edinam n̄kpọ Jehovah edi akpan n̄kpọ ke uwem fo. Nịm mme utịtmbuba ukara Abasi emi ekemede ndisịm. Ih, “ti Andibot fi ke ini afo edide akparawa”—ndien ẹyediọn̄ fi ke nsinsi ke ndinam ntre!
Ibọhọke ẹwụt ke usụn̄ efen, kpukpru itie Bible oro ẹkotde ẹsịn ẹto Edisana Ŋwed Abasi Ibom, ẹwetde ekekem ye ido uwetn̄wed eyomfịn.