Mme N̄wed Emi Ẹsiakde ke N̄wed Mbono Esop Uwem ye Utom Nnyịn
JUNE 10-16
it-2-E 837 ¶4
Edisana Ndịben̄kpọ
Obio Ubọn̄ Emi Messiah Akarade. Se Paul ekewetde enen̄ede anam ifiọk nte ẹyararede edisana ndịben̄kpọ emi aban̄ade Christ. Ke Ephesus 1:9-11, enye ama etịn̄ nte Abasi anamde ẹfiọk “edisana ndịben̄kpọ” uduak Esie. Enye ọkọdọhọ ete: “Emi asan̄a ekekem ye se itịmde inem enye esịt, emi enye akaduakde ke idemesie ndinam ndutịm ke adan̄aemi edimek ini ekemde ọyọhọ ọyọhọ, oro edi, ndifiak ntan̄ kpukpru n̄kpọ ndọn̄ ọtọkiet ke Christ, mme n̄kpọ eke ẹdude ke heaven ye mme n̄kpọ eke ẹdude ke isọn̄. Ih, ke enye ke ẹnam nnyịn itiene ida udeme inyene, sia edide ẹma ẹbem iso ẹmek nnyịn ẹnịm nte asan̄ade ekekem ye uduak enye emi anamde kpukpru n̄kpọ nte ekemde ye usụn̄ emi uduak esie etemede.” “Edisana ndịben̄kpọ” emi aban̄a ukara, oro edi, Obio Ubọn̄ Abasi emi Messiah akarade. “Mme n̄kpọ eke ẹdude ke heaven,” oro Paul eketịn̄de aban̄a, ẹdi mbon oro ẹditienede Jesus Christ ikara ke Obio Ubọn̄ heaven. “Mme n̄kpọ eke ẹdude ke isọn̄” ẹdi mbon oro ẹdidude uwem ke nsinsi ke Paradise. Jesus ama anam mbet esie ẹfiọk ke edisana ndịben̄kpọ oro aban̄a Obio Ubọn̄ Abasi, ntak edi oro enye ọkọdọhọde mmọ ete: “Ẹyak mbufo ẹfiọk edisana ndịben̄kpọ obio ubọn̄ Abasi.”—Mr 4:11.
JUNE 17-23
it-1-E 1006 ¶2
Idiọkitọn̄
Se Owo Anamde ke Ẹsida Ẹdiọn̄ọ. Se owo anamde esiwụt ke owo ọdiọk itọn̄ onyụn̄ enyene idiọk udọn̄. N̄wed James ọdọhọ ke ini idiọk udọn̄ oyomode, ke esiman idiọkn̄kpọ. (Jas 1:14, 15) Ntre ẹsida se owo anamde ẹdiọn̄ọ ke enye edi owo idiọkitọn̄. Apostle Paul ọkọdọhọ ke ndidi owo idiọkitọn̄ ọwọrọ ndidi okpono ndem. (Eph 5:5) Owo idiọkitọn̄ esida n̄kpọ emi ọdọn̄de enye nte abasi sia n̄kpọ oro esidi ata akpan n̄kpọ ọnọ enye akan ndinam n̄kpọ Abasi emi okobotde nnyịn.—Ro 1:24, 25.
JUNE 24-30
it-2-E 528 ¶5
Uwa
Edin̄wọn̄ uwa. Ẹma ẹsiwa edin̄wọn̄ uwa ke ini ẹwade ediwak uwa eken, akpan akpan ke nditọ Israel ẹma ẹkesịm Isọn̄ Un̄wọn̄ọ. (Nu 15:2, 5, 8-10) Nte ẹkesiwade edin̄wọn̄ uwa ekedi nditọhọ wine (“ọkpọsọn̄ mmịn”) nduọk ke itieuwa. (Nu 28:7, 14; men Ex 30:9 ye Nu 15:10 domo.) Apostle Paul ọkọdọhọ mme Christian ke Philippi ete: “Ọkpọkọm ẹn̄wan̄wan̄a mi ẹduọk nte edin̄wọn̄ uwa ke enyọn̄ uwa ye utom emi mbuọtidem esịnde mbufo ẹnam ẹnọ mme owo, mmokop idatesịt.” Se enye eketịn̄de emi ọkọwọrọ ke esịt ekenenem enye ndinam n̄kpọ nnọ nditọete esie. (Php 2:17) Esisịt ini mbemiso Paul akakpade, enye ama ewet leta ọnọ Timothy ete: “Ẹn̄wan̄wan̄a mi ẹduọk nte edin̄wọn̄ uwa, ini ndisana mi nyak onyụn̄ ekpere.”—2Ti 4:6.