Mme N̄wed Emi Ẹsiakde ke N̄wed Mbono Esop Uwem ye Utom Nnyịn
MARCH 1-7
MME AKPAN N̄KPỌ KE IKỌ ABASI | NUMBERS 7-8
“Se Ikpepde Ito Nte Jehovah Eketịmde Nditọ Israel”
it-1-E 497 ¶3
Esop
Ke Israel, ikpọ owo ẹkesiwak ndinam n̄kpọ ke ibuot ofụri esop. (Ezr 10:14) Ntre, “mbọn̄ esien kiet kiet” ẹkenọ enọ ke akpa usen oro ẹkewụkde tent utuakibuot. (Nu 7:1-11) N̄ko ke eyo Nehemiah, mme oku, nditọ Levi, ye “mme etubom mbio obio” ẹkeda ufịkn̄kpọ ẹfịk “ediomi emi enyenede nsọn̄ọ” ke ibuot ofụri esop. (Ne 9:38–10:27) Ke ini nditọ Israel ẹkesan̄ade ke wilderness, Bible ọdọhọ ke “mbọn̄ esop, mbon emi ẹsikotde ẹdi mbono, [ye] mbon etop” ẹma ẹsịne ke otu mmọ. Owo 250 ke otu mmọ ẹma ẹdiana ye Korah, Dathan, Abiram, ye On ẹnam ikọ ye Moses ye Aaron. (Nu 16:1-3) Jehovah ama ọdọhọ Moses emek owo 70 ke otu mbiowo Israel, emi ẹkenyụn̄ ẹdide ikpọ owo, man ẹtiene enye ẹbiom “mbiomo” nditọ Israel sia enye mîkekemeke ndibiom ikpọn̄. (Nu 11:16, 17, 24, 25) Leviticus 4:15 etịn̄ aban̄a “mbiowo esop,” ndien etie nte mbon emi ẹkedade ke ibuot ofụri esop ẹkedi mbiowo, mme etubom, mme ebiereikpe, ye ikpọ owo.—Nu 1:4, 16; Jos 23:2; 24:1.
it-2-E 796 ¶1
Reuben
Nditọ Reuben ẹkedu ke usụk ke itienna nditọ Israel, ndien nditọ Simeon ye nditọ Gad ẹdu mmọ ke nnasia ye ke ufien. Ke ini nditọ Israel ẹdahade isan̄, nditọ Reuben ẹkesida iso ke otu emi esịnede esien ita mi, ndien mmọ ẹkesitiene otu en̄wen emi esịnede esien ita, oro edi, esien Judah, Issachar, ye Zebulun. (Nu 2:10-16; 10:14-20) Nte mmọ ẹkenyụn̄ ẹsan̄ade edi oro ke ini esien kiet kiet ẹkenọde uwa ke akpa usen oro ẹkewụkde tent utuakibuot.—Nu 7:1, 2, 10-47.
Yom N̄kpọuto ke Ikọ Abasi
it-1-E 835
Akpan, Akpa Eyen ke Owo ye ke Unam
Sia akanade mme akpan ke Israel ẹkabade ẹdi ibuotufọk, mmọ ẹkeda ke ibuot ofụri idụt Israel. Jehovah akakam ọdọhọ ke ofụri idụt Israel ẹdi “akpan” imọ. Ediomi oro enye akanamde ye Abraham akanam enye ada idụt Israel nte akpan esie. (Ex 4:22) Sia Jehovah mîkowotke akpan nditọ Israel ini enye okowotde kpukpru akpan ke Egypt, Jehovah ama ọdọhọ yak ẹdian̄ade “kpukpru akpan eke ẹsịrerede itie eyen ke otu nditọ Israel [ẹnịm ẹnọ imọ] nte edisana, ke owo ye ke unam.” (Ex 13:2) Ntre, kpukpru akpan ẹkenyene Abasi.
MARCH 8-14
MME AKPAN N̄KPỌ KE IKỌ ABASI | NUMBERS 9-10
“Nte Jehovah Esidade Ikọt Esie Usụn̄”
it-1-E 398 ¶3
itienna
Nte nditọ Israel ẹkesidahade isan̄ owụt ke Jehovah akada mmọ usụn̄. Ke Numbers ibuot 33, Moses ama asiak n̄kpọ nte itie 40 emi mmọ ẹkenamde nna. Mmọ ẹma ẹsidu ke itienna mmọ ke ofụri ini emi obubịt enyọn̄ ofụkde tent utuakibuot. Edi ke ini obubịt enyọn̄ adahade, mmọ ẹma ẹsidaha isan̄. Bible ọdọhọ ete: “Ke uyo Jehovah ke nditọ Israel ẹdaha isan̄, onyụn̄ edi ke uyo Jehovah ke mmọ ẹnam nna.” (Nu 9:15-23) Obukpon̄ iba oro ẹkedade silver ẹnam ke ẹkesida ẹnam nditọ Israel ẹfiọk ini emi Jehovah oyomde mmọ ẹdaha isan̄. (Nu 10:2, 5, 6) Ke ini ẹfride obukpon̄ oro uyo ọdọdọk ososụhọde, oro ama esinam mmọ ẹfiọk ke ekem ini ndidaha isan̄. Akpa ini emi ẹkefride obukpon̄ oro ekedi ke “ọyọhọ usen edịp, ke ọyọhọ ọfiọn̄ iba, ke ọyọhọ isua iba” (1512 B.C.E.) tọn̄ọ mmọ ẹkekpọn̄ Egypt. Ẹkesimen ekebe ediomi ẹsan̄a iso, ndien akpa otu emi esịnede esien ita ẹtiene; esien Judah ẹkesisan̄a iso ke otu emi, ndien esien Issachar ye Zebulun ẹtiene. Nditọ Gershon ye nditọ Merari, emi ẹkesimende n̄kpoduoho tent utuakibuot, ẹkesitiene mmọ edem. Ekem, otu emi esịnede esien ita en̄wen ẹtiene; esien Reuben ẹkesisan̄a iso ke otu emi, ndien esien Simeon ye Gad ẹtiene. Nditọ Kohath, emi ẹkesibiomde ndisana n̄kpọ, ẹkesitiene mmọ edem. Ndien otu emi esịnede esien ita en̄wen ẹtiene; esien Ephraim ẹkesisan̄a iso ke otu emi, ndien esien Manasseh ye Benjamin ẹtiene mmọ edem. Ke akpatre, otu emi esịnede esien ita en̄wen ẹma ẹtiene; esien Dan ẹkesisan̄a iso ke otu emi, ndien esien Asher ye Naphtali ẹtiene. Omokụt do ke esien ita emi ẹnen̄erede ẹwak ẹnyụn̄ ẹsọn̄de odudu ẹkesan̄a iso ẹnọ nditọ Israel, ndien esien ita en̄wen emi ẹnen̄erede ẹwak ẹnyụn̄ ẹsọn̄de odudu ẹsan̄a mmọ ke edem.—Nu 10:11-28.
Yom N̄kpọuto ke Ikọ Abasi
it-1-E 199 ¶3
Mbono
Ntak Ọfọnde Ẹsisop Idem. Se Jehovah eketịn̄de ọnọ nditọ Israel aban̄a ndinịm Passover owụt ke enye enen̄ede oyom ikọt esie ẹsisop idem ọtọkiet man ẹkpep n̄kpọ ẹban̄a enye. Enye ọkọdọhọ ke edieke owo asanade mînyụn̄ ikaha isan̄, edi etre ndinịm Passover, ke ẹkenyene ndiwot owo oro. (Nu 9:9-14) Ke ini Edidem Hezekiah okokotde ofụri Judah ye Israel ẹdi Jerusalem ẹdinịm Passover, enye ọkọdọhọ mmọ ete: “Mbufo nditọ Israel, ẹfiak ẹtiene Jehovah . . . mbufo ẹkûsọn̄ obotitọn̄ mbufo nte mme ete ete mbufo ẹkesọn̄de. Mbufo ẹnọ Jehovah ufan̄ ẹnyụn̄ ẹdụk ke edisana ebiet esie emi enye anamde asana ke nsinsi, ẹnyụn̄ ẹnam n̄kpọ ẹnọ Jehovah Abasi mbufo, man ikan̄-ikan̄ iyatesịt esie ọkpọwọn̄ọde ọkpọn̄ mbufo. . . . Koro Jehovah Abasi mbufo ọfọnde ido onyụn̄ atuade owo mbọm, enye idinyụn̄ iwọn̄ọkede iso esie ikpọn̄ mbufo edieke mbufo ẹfiakde ẹtiene enye.” (2Ch 30:6-9) Owo ndikokoi ntre ndika usọrọ Passover okowụt ke enye ọkpọn̄ Abasi. Kpa ye oro Abasi mîdọhọke mme Christian ẹsinịm utọ usọrọ nte Passover, apostle Paul ọkọdọhọ mme Christian ẹkûsịn ndisisop idem ọtọkiet nte ikọt Abasi. Kop se enye eketịn̄de mi: “Ẹyak nnyịn inyụn̄ ikere nte ikpedemerede kiet eken inọ ima ye nti utom, ikûsịn ndisop idem ọtọkiet, nte ido ndusụk owo edide, edi isịn udọn̄ inọ kiet eken, ndien mbufo ẹdọdiọn̄ ẹnam ntem adan̄a nte ẹkụtde ẹte usen oro ke asan̄a ekpere.”—Heb 10:24, 25.
MARCH 15-21
MME AKPAN N̄KPỌ KE IKỌ ABASI | NUMBERS 11-12
it-2-E 719 ¶4
Utọk
Nsụkuyo. Nsụkuyo esinanam idem emem owo inyụn̄ iyakke mme owo ẹdiana kiet. Esisịt ini ke nditọ Israel ẹma ẹkekpọn̄ Egypt, mmọ ẹma ẹsụk Jehovah uyo, ẹdọhọ ke Moses ye Aaron idotke ndida mmimọ usụn̄. (Ex 16:2, 7) Nte ini akade, nsụkuyo mmọ ama anam idem emem Moses tutu enye edibọbọn̄ akam oyom n̄kpa. (Nu 11:13-15) Edieke owo esimade ndisụk owo uyo, oro ekeme ndida enye ibuot. Ke ini nditọ Israel ẹkesụkde Moses uyo, Jehovah ọkọdọhọ ke imọ ke mmọ ẹsụk uyo, n̄ko ke edinam mmọ owụt ke mmọ imaha nte imọ idade mmọ usụn̄. (Nu 14:26-30) Ediwak mmọ ẹma ẹkpan̄a ke ntak nsụkuyo.
Yom N̄kpọuto ke Ikọ Abasi
it-2-E 309
Manna
Nte Manna Eketiede. Manna “akafia nte n̄kpasịp coriander” onyụn̄ “ebiet itai bdellium,” oro edi, afia afia n̄kpọ emi etiede nte obukpa ọkwọk. Enye ekenem nte “mfefere uyo eke ẹsịnde aranọkwọk” m̀mê “inịn̄e-inịn̄e uyo emi ẹbuakde aran.” Ẹma ẹsikọk enye ke itiat ukọkn̄kpọ mîdịghe ẹtịm ke udụn̄, ekem ẹtem ẹdia, mîdịghe ẹda ẹnam uyo.—Ex 16:23, 31; Nu 11:7, 8.
MARCH 22-28
MME AKPAN N̄KPỌ KE IKỌ ABASI | NUMBERS 13-14
Yom N̄kpọuto ke Ikọ Abasi
it-1-E 740
isọn̄ Oro Abasi Ọkọnọde Nditọ Israel
ISỌN̄ oro Abasi ọkọnọde nditọ Israel ekedi ata eti isọn̄. Ke ini Moses ọkọdọn̄de mbon uyep ẹkese Isọn̄ Un̄wọn̄ọ ẹnyụn̄ ẹmen mfri do ẹdi, mmọ ẹma ẹmen fig, pomegranate, ye etuek grape emi okokponde tutu edi se owo iba ẹda anyan eto ẹmen! Kpa ye oro ndịk akanamde mmọ ke ntak emi mmọ mîkọbuọtke idem ye Jehovah, mmọ ẹma ẹdọhọ ke isọn̄ oro “ọfiọrọ mmọn̄eba ye aranọkwọk.”—Nu 13:23, 27.
APRIL 5-11
MME AKPAN N̄KPỌ KE IKỌ ABASI | NUMBERS 17-19
Yom N̄kpọuto ke Ikọ Abasi
g02-E 6/8 14 ¶2
inụn̄ Edi Ata Akpan N̄kpọ
Ẹkeda inụn̄ n̄ko nte idiọn̄ọ n̄kpọ oro ebịghide mînyụn̄ ibiarake. Ntak edi oro Bible okotde nsinsi ediomi, “ediomi inụn̄.” Mbon emi ẹkenamde ediomi oro ẹma ẹsiwak nditie kiet ndia udia emi ẹsịnde inụn̄ man ẹwụt ke imodụk ediomi. (Numbers 18:19) Ibet Moses ọkọdọhọ ke ana ẹsidori inụn̄ ke mme uwa oro ẹwade ke itieuwa, ndien etie nte ẹkenam oro sia inụn̄ adade aban̄a n̄kpọ emi mîsibiarake.
APRIL 26–MAY 2
Yom N̄kpọuto ke Ikọ Abasi
it-1-E 359 ¶1-2
Adan̄a
Ntre etie nte n̄kpọ iba ke ẹkesida ẹbiere ebiet emi ẹkpenọde esien kiet kiet isọn̄: itie emi afia ọduọde ọnọ esien kiet kiet ye nte esien oro okponde eketre. Etie nte ẹma ẹsisịn afia man ẹdiọn̄ọ n̄kan̄ emi ẹkpenọde esien kiet kiet, utọ nte edem usiahautịn, edem usoputịn, edem usụk, edem edere, n̄kan̄ emi ekperede mmọn̄, m̀mê n̄kan̄ emi etiede obot obot. Jehovah ekesibiere ebiet emi afia ọduọde, ndien emi ikesiyakke esien kiet ẹfịbe m̀mê ẹtọhọ ye esien en̄wen. (N̄ke 16:33) N̄ko, Abasi ama okụt ete ke ebiet oro afia ọduọde ọnọ esien kiet kiet ekem ye prọfesi oro Jacob eketịn̄de ọnọ nditọ esie mbemiso akpade, nte ikụtde ke Genesis 49:1-33.
Ke ẹma ẹkesịn afia ẹnyụn̄ ẹdiọn̄ọ ebiet emi ẹkpedemede ẹnọ esien kiet kiet, akana ẹbiere nte isọn̄ oro ẹdinọde esien kiet kiet edikponde iketre. Ibat owo emi ẹdude ke esien kiet kiet ke ẹkesida ẹdiọn̄ọ nte isọn̄ mmọ okpokponde eketre. Abasi ọkọdọhọ ete: “Mbufo ẹnyene ndisịn afia ndeme isọn̄ oro nda ke idem mbufo ke ubon ke ubon. Ẹnam udeme mmọ eke ẹwakde okpon, ẹnyụn̄ ẹnam udeme mmọ eke mîwakke ekpri. Ebiet emi afia owụtde, do edidi udeme mmọ.” (Nu 33:54) Ebiet ekededi emi afia ọduọde ọnọ esien kiet kiet ke ẹkesinọ mmọ, edi ẹma ẹsisịbe isọn̄ emi ẹkenọde esien kiet ẹdian ẹnọ esien en̄wen etiene nte mmọ ẹwakde m̀mê ẹkpride. Ntak edi oro ẹkesịbede isọn̄ esien Judah ẹnọ esien Simeon ke ini ẹkekụtde ke isọn̄ nditọ Judah okpon akaha.—Jos 19:9.